ما بين تأثير الفراشة والقرد رقم مئة.. 5 تأثيرات غريبة هيسحلوك
من وقت للتاني، بتظهر نظريات وتأثيرات مختلفة، البعض منها قد يكون له تفسير علم والبعض التاني لا، وبيفضل الجزء اللي مالوش تفسير علمي هو المحير وشاغل بال البعض، ولذلك قررنا نعرف سوا عن 5 تأثيرات قد تبدو غريبة أو تسمع عنها لأول مرة ولكن هي موجودة وبيفتحوا أبواب لنقاشات كتير ومحاولة إيجاد تفسيرات ليهم.
تأثير مانديلا: سبب تسمية المصطلح بالاسم ده هو نفس سبب ظهورها، لإن في 2009 كان في باحثة اسمها فيونا بروم لاحظت خلال حضورها لمؤتمر، إن هي والناس الحاضرين عندهم ذكريات خاطئة متعلقة بنليسون مانديلا، زي إنهم شافوا جنازته على التلفزيون بعد ما توفى في معتقل في الثمانينات القرن الماضي، ولكن فعليا هو اتوفى في 2013 وهو رئيس جنوب أفريقيا.
ولكن تعريف التأثير ده هو إن مجموعة من الناس عندهم ذكريات غلط عن حاجة معينة ولكن فعليا ده مش موجود ومحصلش.
كنا عملنا موضوع كامل عن تأثير مانديلا هتلاقي هنا لو عايزين تعرفوا تفاصيل أكتر.
تأثير الفراشة: ملخص النظرية دي هو إن أي حاجة صغيرة بتحصل ممكن يكون ليها تأثير قوي وكبير على حاجات تانية.
على سبيل المثال يعني: “تركب أتوبيس غلط فا تتأخر على شغلك فا يتخانقوا معاك ويرفدوك فا متلقيش شغل فا تكتئب ومراتك تزهق من نكدك فا تروح تخلعك في المحكمة وعيالك يتشردوا وهكذا”.
مفهوم الفراشة وسبب تسميته، إن رفرفة جناح فراشة في مكان ما في العالم، ممكن يعمل إعصار في مكان تاني خالص في العالم برضه، حدث بسيط قد يبدو لك إن مالوش أثر ولكن هو له.
تأثير بيجميليون: 2 من الخبراء في علم النفس “روبرت روزنتال” و”لينور جيكبسون” هما اللي صاغوا مصطلح بيجميليون، والنظرية دي بتقول باختصار إن لو مديرك مقتنع إن أدائك في شغلك عالي، أنت هتكون كده فعلا، ولو مقتنع إنك شخص فاشل فا هتكون كده برضه، فا أنت كشخص سواء في شغل أو جامعة أو مدرسة أو أي مكان، بتتأثر بالإيجاب أو السلب بتوقعات مديرينك أو أساتذتك.
تأثير القرد رقم مئة: مجموعة علماء عملوا دراسة على شوية قرود بالقرب من ساحل اليابان، لما واحد من القرود بدء يغسل البطاطس بطريقة معينة في المياه المالحة، بدأت باقي القرود تقلده، والسلوك ده بدء ينتشر ما بين مجموعة تانية من القرود بعيدة جدا عن المجموعة الأولى رغم إن مفيش بينهم أي تواصل.
فا تواصلوا إلى إن القرد رقم مئة بيرمز لما يسمى بالكتلة الحرجة، والنظرية بتقول إنه بمجرد الوصول لرقم الكتلة الحرجة بيبدأ نفس السلوك يظهر بين ناس تانية.
تأثير البلاسيبو: وده باختصار إن شخص ياخد دواء وهو مقتنع إنه هيكون أحسن ولكن فعليا، الدواء مالوش أي تأثير سواء إيجابي أو سلبي.
النوع ده من الأدوية ساعد حوالي 30% من المرضى في عملية الشفاء، وبعض الأبحاث أكدت إن الدواء الوهمي ده مش بيشتغل على الحالة النفسية للمريض ولكن الجسدية كمان، وده لإن الجسم والعقل مرتبطين ببعض، والأبحاث بترجح إن ده راجع بشكل بسيط لأفراز مادة الإندروفين في الدماغ وهي من أهم مسكنات الألم اللي جسم الإنسان بيقوم بفرزها بشكل طبيعي، يعني مسكن منه فيه.
مش كل النظريات أو التأثيرات دي يكون لها تأثير على الكون اللي بنعيشه، أو على الأقل لسه العلم موصلش لذلك، ولكن وجودهم والكلام الدائم عليهم ممكن يكون مؤشر على حقيقتهم أو إنهم مش مجرد نظريات فارغة، ولكن مع تطور العلم أكتر وأكتر ده ممكن يفسرلنا أكتر وأكتر ونكتشف حاجات تانية عن نفسنا كأشخاص أو عن الكون نفسه اللي بنعيش فيه.
