موضوع مايهمكش: ليه أول علاقة حب بتشكّل حياتنا العاطفية بعد كده؟
يوم 18 سبتمبر هو يوم الحب الأول، وحسب Days of The Year، اليوم ده اتعمل للاحتفال -أو الصياح مش متأكدين- بعلاقة الحب الأولى اللي تعتبر أكتر وأقوى حدث بيشكّل وبيكوّن حياتنا العاطفية والرومانسية بعد كده، بكل الحاجات الحلوة والوحشة اللي بتحصل في العلاقة الأولى دي.
موقع Fischer Institute بيقول إن الحب الأول بيبقى فيه تعمق في العواطف والذكريات والعلاقات، وده اللي بيشكّل تجاربنا الرومانسية والعاطفية الأولى. غالبًا بيكون الحب الأول معيار مهم لعلاقاتنا الرومانسية في المستقبل، لأنه بيحط نمط وتوقعات للحاجات اللي بنستناها وبنحتاجها في شريك حياتنا، وتجربة الحب الأول بتسيب أثر مابيتنسيش في قلبنا وعقلنا وبتأثر على علاقتنا العاطفية بعد كده.
وحسب دراسة اتعملت في 2005 من “هيلين فيشر” باستخدام فحوصات التصوير بالرنين المغناطيسي لمجموعة من الكابلز، ولقوا إن الحب الرومانسي بيشتغل بشكل أساسي كنظام تحفيز بدل العاطفة والمشاعر، ولقوا تشابه ما بين الحب وبين التجارب المرتبطة بالإدمان، وإن فيه عدد كبير من الهرمونات اللي بتتفرز في الجسم لما بنحب أو بنحس بالحب، زي الأوكسيتوسين والدوبامين والنورادرينالين.
ودراسات تانية قالت إن دماغنا بتمر بحالة شبه حالة الإدمان لما بنحب، وبتكون تجربة الحب الأولى ليها أهمية خاصة ومميزة، لأنها غالبا بتحصل خلال فترة المراهقة، ودي الفترة اللي بيحصل فيها أصلا تطور دماغنا وشخصيتنا.
علماء الأعصاب في معهد ماساتشوستس للتكنولوجيا بيقولوا إن أقصى قدراتنا في المعالجة والذاكرة بتحصل في حوالي سن الـ 18، وده الوقت اللي بتحصلنا فيه تجارب بنعيشها للمرة الأولى في حياتنا، بما فيهم علاقة الحب الأولى.
حسب Fischer Institute، الحب الأول غالبا بيكون قوي ومشاعره قوية جدا، وده اللي بيخلي الناس تفتكر إنهم حبوا أول شخص دخلوا معاه في علاقة رومانسية أكتر من أي حد تاني، والفكرة دي ممكن تخليهم مشتاقين باستمرار إنهم يحسوا المشاعر والأحاسيس اللي عاشوها في الماضي دي في كل علاقة جديدة بيدخلوها، ولما بيفشلوا أو مبيلاقوش نفس المشاعر دي في شريكهم الجديد، بيبدأوا يفكروا في علاقتهم الأولى وفي الإكس الأولاني، وأحيانا حتى بيفكروا يرجعوا علاقتهم بالإكس ده.
ومع كل ده، الحب الأول مش شرط يكون الحب الأحسن أو الأعمق، وممكن لمجرد إنه “الأول” يعمل زي تشويه لانطباعات الشخص، فيخليه دايما يفتكره بأهمية أكبر من أهميته الواقعية.
الحب الأول كمان بيعلمنا شوية حاجات مهمة بتأثر على كل العلاقات العاطفية أو الرومانسية اللي بعد كده. فمثلًا، أنت بتحس للمرة الأولى في حياتك إنك مرغوب فيك، وبتتعلم أنت عايز شريكك يعاملك إزاي، ولما العلاقة بتنتهي، قلبك بيتكسر للمرة الأولى في حياتك، وغالبا أول مرة فركشة بتكون الأصعب لأنها أول مرة وأعمق مرة.
وبالإضافة لكل ده، الحب الأول غالبًا بيكون في نفس فترة النمو والتطور الشخصي، لأنك بتعمل تجارب جديدة وبتواجه مخاوف جديدة، وعلاقة الحب الأولى بتعرفك على نفسك وحياتك العاطفية والرومانسية، وإزاي تتعامل مع الناس اللي بتحبهم، وإزاي أنت عايز تتحب.
وأخيرا، رغم إن الحب الأول ممكن يبقى صعب يتنسي، لكن ده مش معناه خالص إنه الحب الحقيقي الوحيد اللي هتعيشه، ومهما لقيت صعوبة في إنك تتخطى العلاقة الأولى دي فأنت هتتخطاها مع الوقت، والتخطي مش هو النسيان، بس هتتعلم وهتعرف أكتر عن نفسك وهتعرف أنت محتاج إيه وشريكك محتاج إيه، وعلى رأي الفنان مصطفى شعبان: “محدش بينجرح أوي، غير لما بيحب أوي”.
