ليه إنت محتاج تقعد لوحدك شوية!
وسط سرعة وزحمة ايقاع حياتنا الطبيعي.. مابيكونش في وقت للواحد إنه يقعد لوحده شوية.. بس بما إن في إجازة عيد طويلة جاية فممكن الواحد يجيله فرصة يقعد مع نفسه شوية
“الوحدة” ممكن تبقى أكبر الكوابيس لناس كتير في الدنيا.. بس الحقيقة إنها مش دايماً كابوس بالعكس هي ممكن تبقى صحية ومفيدة جداً
عشان تقدر تشوف أي عمل فني زي لوحة أو عمل نحتي بشكل أحسن.. بتحتاج تبعد عنه شوية عشان عينيك تلقط كل تفاصيه.. لأن طول ما إنت قريب هتتوه عنك بعض التفاصيل.. لأن العين البشرية ما بتقدرش تشوف أكتر من زاوية في وقتٍ واحد
حياتك بقى عاملة زي العمل الفني ده.. وإنت مسحول جواها
عمرك ما هتقدر تشوفها بشكل واضح.. بس لما يكون عندك فرصة تقعد لوحدك فترة كافية في هدوء هتقدر تشوف كل حاجة سببتلك أي مشاعر سلبية أو حتى شخص عندك مشكلة معاه.. كل حاجة هتبان أصغر لأنك شايفها من بعيد وده هيخليك تقدر تتعامل معاها بشكل أسهل من أي وقت قبل كده
الوحدة هتديك فرصة تصاحب نفسك وتكتشفها بشكل أعمق
وتكسب الصاحب الوحيد اللي مش هيفارقك من أول لآخر لحظة في عمرك اللي هو “إنت”
الوجود في وسط ناس طول الوقت بيستنزف طاقة ومشاعر وده اللي بيسبب الإحساس اللي كتير بيحسوا بيه.. إنهم مش قادرين يعملوا حاجة عشان مفيش طاقة.. قعدتك لوحدك هتبقى الفرصة إنك تفصل وترجع تشحن الطاقة دي عشان تعرف تكمل
وده اللي بتأكده دراسة لأستاذة علم النفس “ثوي نجوين” بجامعة دورهام البريطانية واللي بتقول فيها إن “الدراسات حول الانعزال قليلا أفادت بأنه لا يضر الحياة الاجتماعية، بل في الواقع قد يحسنها ويثريها؛ وهو ما يجعلنا أكثر استعدادا للتعامل مع الآخرين”.
وجودك لوحدك هيخليك تقدر القيمة الحقيقية للحاجات وتحط كل شيء في مكانه الطبيعي.. هيساعدك ترتب أولوياتك وتعرف إنت فعلا عايز إيه من غير ضغوط أو أي مؤثرات خارجية ممكن تشتتك وتأثر على تفكيرك .. لأن معظم الوقت آراء اللي حوالينا بتأثر بشكل كبير على انفعالاتنا وقرارتنا
وفي دراسة اتنشرت في موقع “PsyArXiv” لنشر أبحاث علم النفس بتقول ” أن الانعزال قليلا يحمي من التقلبات العاطفية الحادة، ويساعد على إدارة المشاعر، ويعزز الشعور بالسلام الداخلي.
ممكن كلمة الوحدة بتخوف شوية زي ما قولنا في الأول وده لأن زي ما قال أستاذ علم النفس بجامعة كارلتون الكندية “روبرت كوبلان” أن “العزلة لطالما كانت تعتبر شكلا من أشكال العقاب، لأن البشر كائنات اجتماعية تحتاج إلى التفاعل مع من حولها”.. والفكرة دي اللي متوارثة عبر الأجيال اجتماعيًا بكلمات زي “هنسيبك لوحدك.. أو خليك كده قاعد لوحدك” وجمل شبهها.. واللي بتخلي الواحد يخاف ويتوتر من فكرة إنه ممكن يقعد لوحده.. لكن كلنا من فترة للتانية محتاجين ناخد بريك ونقف شوية ناخد نفس.. ونشوف إحنا واقفين فين في الدنيا.. ورايحين فين!
