في يوم ميلاد المخرج ” أيان موخرجي” ليه”yeh jawaani hai deewani” فيلم مُختلف

النهاردة  15 أغسطس بيوافق يوم ميلاد المخرج الهندي “أيان موخرجي” اللي ليه مجموعة من الأفلام من ضمنها الفيلم الأيقوني “yeh jawaani hai deewani” والفيلم من إنتاج سنة 2013م.. وعلى الرغم إن الفيلم بقاله أكتر من عشر سنين إلا إن في عدد كبير من محبي السينما الهندية بيحبوا الفيلم ده وبيعملوله Rewatch كل فترة.. بس ليه هو فيلم مُختلف؟

في مقابلة للممثل”أميتاب باتشان” أتسأل فيها عن سر وجود أغاني واستعراضات في الأفلام الهندي.. قال فيها إنهم بيهتموا بالاستعراضات لإنهم عايزين الناس تتبسط وتحس بسعادة كإنهم راحوا فرح والفيلم الهندي بيكون زي الفرح بالنسبالهم..

يمكن الفيلم ماختلفش كتير عن الأفلام الهندي في الأغاني المميزة والاستعراضات أو حالة الـ feeling good اللي بتحسها أخر الفيلم ولا بيختلف في وجود قصة حب..
لكن طريقة الحكي في الفيلم مختلفة وده اللي بيميزه. الفيلم  من نوعية الأفلام اللي بتخليك تحبها على طول وبتدخل قلبك  ورغم طول مدته إلا أنك مابتحسش بالوقت..

والفيلم متقسم جزئين حسب ترتيبه الزمني.. جزء فلاش باك وجزء في الحاضر.. لأنه فيه لاينات كتير من أهمها الصداقة وكمان علاقتهم بالأهل وعلاقة الحب ..
ويمكن الفيلم اللي بيميزه كمان وجود شخصيات مختلفة وحقيقية ممكن تكون عدت علينا مع صحابنا أو شبهنا احنا أصلًا!..وبيبدأ الفيلم بعلاقة البطل “باني” بصحابه وحبه للسفر اللي بيظهر من أول الفيلم طموحه وأحلامه إنه يوصل لحاجة في المستقبل.. وبتجمعه علاقة صداقة كبيرة بـ “أفيناش” اللي على عكسه تمامًا شاب غني وماعندوش أحلام كبيرة لكنهم best friends..

وبيكمل المثلث صديقتهم”إديتي” اللي دايمًا بتصلح أي خناقات بينهم.. وبيدخل على مثلث الصداقة ده “نينا” البنت اللي كل حياتها مذاكرة ودح وماعندهاش صحاب لكن بتحاول تتعرف عليهم من خلال سفرية بتحاول تثور بيها على واقعها الممل..

وبيبدأ من هنا اللاين التاني وهو لاين الحب اللي بتحسه “نينا” ناحية “باني” رغم اختلافهم الكبير في الشخصيات واللي عايزينه في الحياة فبتقرر ماتقولوش عن حبها..

ومن الحاجات اللي اهتم بيها الفيلم علاقة الأهل وبنلاحظ ده من خلال علاقة “نينا” بأهلها اللي مقفلين عليها.. وبتظهر علاقة الأهل بالعكس مع علاقة والد”باني” اللي دايما خايف عليه ونفسه مايسافرش لكنه بيسيبه يعمل اللي بيحبه ولما بتيجي لحظة السفر بيخلي ابنه يختار أحلامه.

وبنشوفهم في الزمن التاني (الحاضر) بعدها بسنين تاني بعد ما شخصياتهم اتغيرت في فرح صديقتهم”أديتي”وبنشوف علاقة”باني” و”أفيناش” اللي اختلفت بسبب سفر باني وشعور “أفيناش تجاهه إنه شخص أناني بعد ماكان شخصه المفضل..
صحيح الفيلم هينتهي نهاية سعيدة من خلال عودة صداقتهم.. وتفضيل “باني” لنينا عن سفره برة وقرر يكمل معاها حياته وده شيء جايز مايحصلش في الحياة الواقعية (ويمكن ده سبب كمان بيخلي الناس تحب السينما الهندية وهو النهايات السعيدة المنافية للواقع)..

لكن في حاجات كتير بنتعلمها من الفيلم من أهمها:

1-إننا يكون عندنا أحلام زي “باني” ونحاول نسعى وراها حتى لو فشلنا



2- إننا مهما حاولنا نسبق كل حاجة لازم في حاجة هتفوتنا فاللي المفروض نعمله إننا نستمتع باللحظة وبس !



3-إننا ندي الحاجات بس شوية وقت وهتظبط!

4- وإن الوقت مابيقفش عشان حد فلازم مانضيعش الفرص من أيدينا

5- إن أوقات لازم نـ let go الحاجات لما مايبقاش فيها أمل في وقتها



6-إن أهلنا حاجة مهمة بالنسبالنا مهما كانت أحلامنا مهمة عندنا



الفيلم ده يمكن تذكرة إن وظيفة السينما هي الامتاع والترفيه مش لازم كل الأفلام تكون فلسفية ومعقدة بس المهم إنها تدخل قلبنا.