ليه إنك تكون مش عارف تعبر عن مشاعرك ممكن يخسرك كتير؟

إنك تكون شخص مش قادر يعبر عن مشاعره مش مجرد حاجة هتخليك عندك مشكلة في التواصل بس لأ دي هيكون ليها تأثير كبير على حياتك.. وكمان ممكن توصل لمشاكل نفسية وجسدية فاتبقى متوتر وقلقان على طول وده لأن في العلاقات الإنسانية كلها التعبير عن المشاعر عامل مهم في الثقة والتفاهم بين الناس.. فا تعالوا نشوف الموضوع من كل الجوانب بتاعته سواء المشكلة أو تأثيرها أو حلها.

حسب موقع psychologytoday وموقع verywellmind

ليه بنميل لإننا نكبت المشاعر أو نكتمها؟

فيه حالات كتير بنحس فيها إن لأ أنا مش هتكلم ولا أقول الحاجة اللي جوايا ولا هعبر عنها حتى بأي شكل.. أول حالة بتكون سوء تقدير للمشاعر نفسها بمعنى إنك بتكون فاكرها مش مهمة ومش مهم تعبر عنها والحالة التانية هي إنك تكسل أو عايز تعدي اليوم وخلاص وتقول هبقى أتكلم بعدين ومابتتكلمش بعدين ولا نيلة وبتراكم الموضوع على نفسك وعلى الناس اللي معاك والحالة التالتة بتكون الإحراج والكسوف وهنا إنت بتبقى عندك مشاعر وعندك اللي بيعبر عنها بس إنت مكسوف تقولها.. الحالة الرابعة وهي إنك خايف من النتيجة أو رد الفعل فا بتخبي المشاعر جواك عشان مثلًا لو عبرت عن مشاعرك ممكن تخسر الشخص اللي بتكلمه فابتحاول تنجح العلاقة ولكن مش عارف إن ده بيكون على حساب نفسيتك ونفسية الشخص اللي معاك ومن العوامل اللي بتبوظ العلاقة اللي إنت في الأساس خايف عليها!

وإيه تأثيره؟

إحنا قولنا شوية أسباب ممكن تكون بتعملها كلها وممكن تكون بتعمل حاجات منها.. لكن لما بيحصل أي حالة من الحالات اللي دي بتشوف الواقع بتاعها عامل إزاي.. وهنا ممكن نقسمهم لـ 3 حاجات:

1- نفسيًا 

بكل بساطة إنت مابتعبرش عن مشاعرك فا ماتعرفش الناس هتقدرها أو هتهتم بيها ولا لأ وكمان هتحس إن ماحدش فارق معاه رأيك أو كلامك أو مشاعرك وده هيبدأ يبوظ ثقتك بنفسك.. طب ليه نحط نفسنا تحت الدح وترجع تقول يح؟!

أما اللي مش ببساطة هو الجزء التاني اللي هيقلب معاك بتوتر واكتئاب وقلق.. وساعات هتحس بالغضب ومش أي غضب لأ هتكون طاقة غضب كبيرة وإنت في الأساس مابتعرفش تعبر عن مشاعرك فاتبقى Loop تقيلة وإنت محطوط فيها.. وده يا إما هيكرهك في الناس أو يكره الناس فيك أو الاتنين مع بعض

2- جسديًا

الموضوع مش بس بيأثر نفسيًا كمان تأثيره الجسدي كبير وده لأن الكبت المستمر بيزود خطر التعرض للإصابة بأمراض القلب وده لأن الضغط اللي الناتج عن كبت المشاعر بيزود معدل ضربات القلب وضغط الدم 

الضغط كمان بيأثر على القولون العصبي وبيعمل ألم في المعدة وحموضة بتكون مستمرة.. وكلها حاجات أغلبنا بيحاول يعالجها ويتجنبها فا تخيل الموضوع يكون بزيادة!

هتحس دايمًا إنك مفرهد ومش قادر تتحرك أو تعمل حاجة وده لأن جهازك المناعي بيتأثر ونومك بيبوظ وتحس دايمًا فيه صداع ووجع ضهر ورقبة وحوارات كتير

3- العلاقات 

كلنا عارفين أهمية العلاقات في حياتنا.. إنك ماتعبرش عن مشاعرك ده بيخليك شخص مقفول وغامض ماحدش عارف إنت حكايتك إيه ولما بتقول حاجة بتبقى قاصد إيه وهنا الناس مش هتعرفك على حقيقتك ولا هيعرفوا يحددوا مشاعرهم تجاهك وده هيخلي الناس تبعد عنك تلقائي أو تقلل تعاملها معاك

طب إزاي نتعامل معاه ونحله؟

الموضوع عامل زي المهارات بتحتاج تدرب عليها وتنميها عشان تظبط معاك والدنيا تبقى حلوة وجميلة.. وأفضل طريقة للتعامل مع الموضوع ده بقى هي قاعدة بسيطة “إنك تقول الحاجة اللي إنت عايزها بالظبط وماتزودش ولا تقلل” 

لما تحس بمشاعر إيجابية أو سلبية جرب ده الأول مع نفسك أو مع حد بتحسه مساحة آمنة وعبر عن الموضوع سواء بالكلام أو الكتابة.. وماتكبتش المشاعر جواك وزي ماقولنا تطلعها بطريقة صح اللي هو تقول الحاجة بالظبط واعرف كويس إن المشاعر بتكتمها دي مش هتختفي وهتفضل موجودة وهتكبر كمان

فا جرب في المواضيع البسيطة زي:
– لو الأكل عجبك في البيت تقول حلو
– حد ضايقك من صحابك بهزار رخم أو بحركة سخيفة تقوله عليها
– حد من صحابك عمل حاجة كويسة أو ساعدك تشكره وتقوله إنك مبسوط بالحاجة دي

وده هيساعدك بعد كده تكون ده قاعدة عامة وتطبقها في كل علاقاتك الحياتية من البيت لصحابك للشغل للناس في الشارع وتستخدم الموضوع بشكل عام

في النهاية كبت المشاعر أو عدم التعبير عنها هي حاجة سهلة فا احنا بنميل ليها ومع الوقت كمان بتبقى صفة أو عادة بنكتسبها ونتعامل بيها لكن الموضوع زي ماقولنا مضر بكل الأشكال سواء على نفسك أو الناس اللي قدامك.. بس أفضل حاجة في الحالات اللي زي كده إنك تكسر الحاجز وتتغلب على العادة السيئة دي وساعتها هتتبسط أوي بـ رد الفعل على الموضوع وبالنتيجة اللي هتوصلها في حياتك بشكل مستمر.