لو ولادك داخلين الجامعة جديد وحاسسهم متغيرين يبقى لازم تعرف عن مصطلح”soiling the nest”
لو عندك أولاد داخلين الجامعة جديد أو بيمروا بفترة المراهقة وملاحظ عليهم تغييرات كتير في طريقة تصرفهم أو شخصيتهم وحاسس إنهم دايمًا واخدين جنب فالموضوع ده عشانك.. وهنقولك فيه إيه السبب وراء ده وفقًا لموقع CNN
الفترة اللي فاتت انتشر مصطلح “soiling the nest” على السوشيال ميديا عن المراهقين واللي لسه داخلين الجامعة جديد ومعناه باللغة العربية “تدنيس العش”
والمصطلح معناه: المرحلة اللي بيبقى فيها المراهقين صعبين في التعامل جوه البيت مع أهلهم خاصة في فترة دخولهم مرحلة جديدة وهي المرحلة الجامعية.
وهو تحديدًا الوقت اللي بيحس فيه المراهق إنه مابقاش طفل صغير ومحتاج يتم التعامل معاه على إنه كبير وناضح.. فبيبتدي يثور على كل حاجة وبيبقى بالنسباله الملجأ الوحيد هما صحابه اللي من نفس سنه لأنه حاسس إنهم أكتر ناس هيفهموه ويستوعبوا بيمر بإيه..وطبعًا التصرفات دي بتسبب غضب للأهل وبيحسوا إنهم مش عارفين يتصرفوا إزاي!
لكن دكتورة علم النفس السلوكي “ريجين غالانتي” قالت إنه ده شيء طبيعي جدًا في مرحلة النمو عند المراهقين.. حتى لو بان الموضوع إن المراهقين بيفتعلوا مشاكل مع أهلهم وبيتعاملوا معاهم بشدة.. وبتقول كمان الدكتورة “ريجين” إنهم في المرحلة دي بيكون أولوياتهم إنهم يطوروا من نفسهم ويخلقوا لنفسهم هوية خاصة ومستقلة.. بس بيحسوا إنهم صعب يعملوا ده تحت تأثير أهلهم فبيبدأوا يفتعلوا المشاكل معاهم عشان يحسوا بالاستقلالية عنهم ويدوا لنفسهم مساحة للتفكير..
وبتقول الدكتورة “ريجين” إن الموضوع هيبقى أفضل بالنسبة للأهل لو بدأوا يتقبلوا إن ولادهم بيكبروا وإن الموضوع مش شخصي.. وبالعكس الأهل لو تقبلوا ده هيساعد في تكوين شخصية ولادهم وشعورهم بالاستقلال للمرحلة الجاية الجامعية في حياتهم وهيخليهم عندهم ثقة في نفسهم أكبر وفي قراراتهم..
وقالت إن المراهقين في الفترة دي مش كل حاجة بيعملوها بتكون واعية ومابيكونوش قاصدين يتعاملوا بالطريقة اللي بتظهر منهم..
فو حاسس إن ابنك أو بنتك بيمروا بده.. يبقى أحسن حاجة تعملها إنك تحتويهم وتدعمهم الفترة دي من غير ماتحسسهم بأي ضغوط زيادة لإنهم بيكونوا بيمروا بضغوط نفسية كتير وبيفكروا هيعملو إيه في اللي جاي وتايهين.. وافتكر دايمًا إنك لازم تكون الجانب اللي ولادك يجروا عليه لما يحسوا بخوف مش الجانب اللي يجروا منه!
