إيه هي الضوضاء البيضاء وإيه أغرب أنواعها اللي بتنيم الناس؟

أكيد كلنا فاكرين فيلم صاحب الجلالة بتاع فريد شوقي وفؤاد المهندس اللي كان فيه فريد شوقي بينام فيه على صوت الغسالة وعلى قد ما الإفيه لسه عايش ومستخدم لحد دلوقتي بس هو مش إفيه هو حقيقة بتحصل لناس كتير لما بيسمعوا صوت معين بيكبس عليهم النوم فجأة زي صوت المروحة أو التكييف أو صوت البحر

الظاهرة دي بقى اسمها الـ White noise أو الضوضاء البيضاء وزي ما هي بتحصل لناس وبتنيمهم بالصدفة ففيه ناس بتبقى عارفة إيه الصوت اللي بيناموا عليه وبيستخدموه عشان يركزوا فيه ويناموا أو حتى يهدوا.. طاب إيه هي بقى الضوضاء البيضاء وإزاي بتنيم الناس كده.. تعالى نقولك شوية معلومات عنها حسب ما قال موقع “Sleep Foundation” وموقع ” Verywell Mind” في مقالاتهم عنها:

الضوضاء البيضاء هي نوع من أنواع الأصوات اللي بتبقى ثابتة ومتكررة وبتتوزع فيها الترددات الصوتية بشكل متساوي. يعني مفيش صوت أعلى من صوت فده بيدي إحساس ثابت ومريح للودان والدماغ وبيكون شبه صوت المروحة أو صوت البحر اللي بيوصل للوادن بشكل متواز، فمابيخليكش تركز على صوت معين وتبدأ تحس إن الصوت زي خلفية ثابتة.

طيب أكيد سألت نفسك إزاي وليه بقى النوع ده من الضوضاء بيشتغل جوا دماغنا فتعالى نقولك برضه

الدراسات اللي اتكلمت على تأثير الضوضاء البيضاء على الدماغ قالت إننا لما بنسمع صوت ثابت زي ده بيبدأ المخ يقلل من نشاطه ويركز على الصوت الواحد ده بدل الضوضاء المتنوعة اللي حوالينا.. وده بيعمل حاجة اسمها “masking effect” يعني بيغطي على الأصوات المزعجة وبيخلي دماغنا تتجاهلها ووبالتالي دماغنا بتستريح، وده ممكن يساعد الناس على النوم بسرعة وده اللي بيخلي ناس كتير بتشغل الضوضاء البيضاء في الخلفية قبل ما يناموا ويسبوها تكمل وهما نايمين زي التراكات اللي بتلاقيها موجودة كده على اليوتيتوب صوت المطرة 10 ساعات وصوت البحر 8 ساعات صوت بتاع الأنابيت 50 ساعة وكده.

والسبب إن الضوضاء البيضاء بتساعد على النوم هو إنها بتعمل نوع من العزل بينك وبين الأصوات المزعجة زي أصوات الشارع أو الكلام اللي حوالين البيت أو المكتب.. وكمان بتحفز المخ إنه ينتج مواد كيميائية زي السيروتونين والميلاتونين والمواد دي بتشتغل على إنها  تهدي الجسم والدماغ وبيساعدوا الشخص إنه يحس بالراحة والنعاس.

لكن مش كل الناس بتحس بنفس التأثير من الضوضاء البيضاء.. وده بيختلف من شخص للتاني فيه ناس بتلاقيها مريحة ومفيدة جدًا وبتساعدهم على التركيز والنوم، لكن فيه ناس تانية ممكن ماتحبهاش خالص وبتشوفها نوع من الإزعاج.. الفكرة في إن كل واحد يجرب ويشوف هل الضوضاء دي بتهدي أعصابه ولا لأ.. ده غير إن فيه ناس بتلاقي إن الضوضاء البيضاء بترفع تركيزهم خصوصًا في الشغل أو الدراسة وبيستخدموها في الأوقات دي وده بيحصل لما الصوت الثابت بيمنعهم من الانتباه لأي صوت تاني حوالينهم.

فيه أنواع مختلفة من الضوضاء البيضاء اللي الناس بتستخدمها وبتلاقي فيها راحة، فتعالى نقولك أغرب الأنواع اللي ممكن تسمع عنها:

1- صوت المكنسة الكهربائية: فيه ناس بتحب تسمع صوت المكنسة كنوع من الضوضاء المريحة، بيقولوا إن الصوت الثابت والمستمر وبالتالي بيريحهم

2- صوت القطار وهو ماشي: أصوات القطارات وهم بيتحركوا بيوفروا صوت ثابت، وناس كتير بتحب تسمع أصوات القطارات عشان بتهدي الأعصاب وبتدي إحساس بالحركة المريحة

3- صوت المطر والرعد البعيد: المطر والرعد البعيد صوتهم شبه الأصوات الطبيعية، وده بيهدي الناس اللي بتحب الأصوات الطبيعية أو بتحب تحس إنها في جو طبيعي أوي

5- صوت العصافير في الغابة: ده صوت ثابت نوعًا ما برضه وبعض الناس بتعتبره مريح جدًا وفيه تطبيقات كتير بتقدم النوع ده من الأصوات كنوع من الضوضاء البيضاء الطبيعية.

6- صوت المياه اللي بتخبط في الصخور: فيه ناس بتستمتع بصوت الشلالات أو صوت المياه وهي بتضرب الصخور، وده بيعمل إحساس بالراحة للناس اللي بتحب الطبيعة.

وفي الأخر فيه أبحاث كتيرة بتقول إن الضوضاء البيضاء ممكن تساعد الناس اللي عندهم صعوبة في النوم، زي الدراسة اللي عملها “المركز الوطني لأبحاث النوم” في أمريكا، واللي بيقول إن الضوضاء البيضاء بتساعد على تحسين جودة النوم عند الناس اللي بيعانوا من اضطرابات النوم وكمان فيه بحث تاني من “جامعة براون” أثبت إن الضوضاء البيضاء بتقدر ترفع التركيز عند الناس اللي بيشتغلوا في بيئات مليانة ضوضاء.. فيعني ابقى جرب عشان  لو كويسة معاك تبقى تستخدمها الفترة اللي جايه عشان تبقى اي حاجة تريح أعصابك وتخليك تركز.