ليه فيه ناس بتفكر زيادة وتضايق قبل النوم وناس تانية بتصحي متضايقة أصلا!

كلنا عارفين الكليشية بتاع إنك بتفكر كتير قبل ما تنام وبتضايق وبتحس إنك مش كويس وبتـ Overthink كل حاجة في يومك وأوقات بتوصل مع الناس لمرحلة العياط قبل النوم وفيه ناس عندها الموضوع ده بيحصل كل يوم.. بس اللي مش كليشيه واللي ناس قليلة بتتكلم عنه هو إنك قبل ما تنام تبقي كويس وتصحي من النوم متضايق وبتفكر في حاجات كتير وصاحي تعبان كده.

والحقيقة إن فيه فرق كبير بين الناس اللي بتكون مضايقة قبل النوم بس بتصحى مرتاحة، وبين الناس اللي بتنام كويسة لكن بتصحى الصبح مضايقة ومتعبة.. فلو أنت من النوع الأولاني أو التاني تعالي نقولك إيه الفرق بين الحالتين وليه كل فيه فرق بين الناس في ده وليه كل واحد بيحصل معاه كده بالاختلاف ده حسب ما قال موقع “mindbodygreen” وموقع “verywellhealth” في أحد مقالاتهم:

في الأول خلينا نتكلم عن النوع الأول واللي هو الكليشية اللي كل الناس بتتكلم عليه على الإنترنت وهو اللي بيكون متضايق قبل ما ينام بس بيصحى مرتاح وعادي بيندمج في اليوم اللي بعده ولا كأن أي حاجة حصلت بليل ولا كأنه عيط ولا كان بيفكر في حاجة أصلا.. الحوار ده ممكن يحصل نتيجة لأن الناس دي ممكن يبقوا بيفرغوا كل التوترات قبل النوم، حتى لو بدون وعي والنوم بيساعد العقل إنه يعيد تنظيم الأفكار ويرتاح من التوترات وده بيخليهم يصحوا بروح متجددة وأحسن.

أما النوع التاني اللي هو مظلوم واللي ناس قليلة بتتكلم عليه وده اللي هم الناس اللي بيناموا كويس وبيصحوا متضايقين فده ممكن يكون بسبب حاجة اسمها “خمول النوم” أو Sleep Inertia، ودي عبارة عن حالة بتحصل بعد النوم وبتخلي الشخص يحس بجسمه تقيل وبيحتاج وقت علشان يبتدي يومه.. وده ممكن يحصل بسبب اضطرابات في النوم العميق، أو النوم غير الكافي، أو مشاكل في الساعة البيولوجية زي اضطرابات الإيقاع اليومي اللي بتأثر على توقيتات النوم والاستيقاظ الصحيحة.

وبرضه النوم العميق أو الـ (REM) ممكن يكون له دور؛ فيه ناس بتقضي وقت طويل في النوم العميق أو بيصحوا في مراحل مش مناسبة للنوم، وده ممكن يخليهم يحسوا بالإرهاق أول ما يصحوا وده حسب ما قال موقع “Psychology Today” برضه في أحد مقالاته.

طيب خلينا نتكلم بالتفصيل شوية ونعرف الأسباب اللي بتوصل كل نوع منهم للحالة دي بعد ما وصفناهم وعرفنا بشكل عام ده ليه ممكن يحصل لكل نوع منهم:

1- النوع الأول “اللي قبل ما ينام بيتضايق وبيركّز على الأفكار”

بيبقوا من الناس اللي بيكون عندهم ميل إنهم يسرحوا قبل النوم في حاجات كتير سواء كانت مشاكل أو خطط أو حتي قلق من المستقبل.. الحاجات دي بتأثر على حالتهم المزاجية وبتخليهم متضايقين أو حاسين بالتوتر وبالرغم من كده بيلاقوا نفسهم لما بيصحوا مرتاحين نسبيًا أو ناسين اللي كانوا مضايقين منه.

ده بيحصل لأن المخ بيشتغل بشكل أكبر قبل النوم على معالجة المشاعر والتجارب اللي حصلت خلال اليوم زي ما يكون بيعمل عملية “تنضيف” للأفكار والمشاعر السلبية وده ممكن يخليهم يناموا ويحسّوا براحة أكتر بعد النوم، وده لأن النوم في حد ذاته عملية بتساعد على تصفية المخ وبتهدي المشاعر.

2- النوع الثاني “اللي بينام مرتاح ويصحى مضايق”

فيه ناس تانية بتنام وهي حاسة بالراحة أو حتى مش بتفكر في أي حاجة، لكن بتلاقي نفسها لما تصحى متضايقة أو حاسة بضغط جامد، وده ممكن يحصل لأن عقلهم الباطن بيشتغل وبيحلل الأفكار بشكل غير مباشر وهم نايمين وبيظهر الأثر ده لما يصحوا.. وده ممكن يكون بسبب حاجة اسمها “القلق المزمن” واللي بتخلي الشخص يحس بالخنقة أو الضغط من غير ما يكون عارف السبب المباشر.

فيه كمان دراسات بتقول إن الأحلام بتلعب دور كبير في إعادة ترتيب الذكريات والمشاعر، وده ممكن يخلي الشخص يمر بمواقف في أحلامه تخلّي حالته المزاجية تتأثر لما يصحى.

أكيد سألت نفسك إيه أسباب الفرق ده بين النوعين ولو أنت من أي نوع فيهم هتبقى عايز تعرف أنت ليه مش النوع التاني وهل ده بيكون بسبب حالة نفسية معينة أو اضطراب نفسي مثلا ولا عادي حاجات بتحصل بسبب عقلية الشخص بتشتغل إزاي؟.. فخلينا نقولك إيه أسباب الفرق بين النوعين:

1- النوع الأول “التفكير الزيادة قبل النوم”: الناس اللي بتفكر كتير قبل ما تنام غالبًا بتكون عندها حساسية أعلى تجاه المشاعر وبتواجه صعوبة في تجاهل الأفكار وده بيخليهم يصحوا مرتاحين لأنهم خلصوا عملية المعالجة دي قبل ما يناموا

2- النوع التاني “عقل باطن نشيط”: الناس اللي بتلاقي نفسها مضايقة بعد ما تصحى غالبًا بيكون عقلها الباطن شغال بشكل مكثف أثناء النوم وساعات بيبقى مش معروف إيه السبب لكن المخ بيكون شغال على المستوى اللاوعي وده اللي بيسبب الضغط على النوع ده لما يصحوا

3- الروتين وأسلوب الحياة: طريقة الحياة اليومية زي الضغوط المستمرة أو الروتين اللي بيتكرر يوميًا ممكن يكون له دور في نوعية التفكير والمشاعر اللي بتيجي قبل وبعد النوم

ومهما كنت بتنام كويس وتصحي متضايق أو بتنام متضايق وبتصحي كويس المهم حاجتين بس إنك تنام وتريح جسمك وإنك تبقى كويس وتفضل تحاول تبقى كويس.