أغنيتين بقالهم أكتر من نص قرن قالوا الحل السحري للحياة “الحياة حلوة بس نفهمها”و”الدنيا ريشة في هوا”

كتير بنفكر إن الناس زمان كانوا عندهم صبر أكتر من دلوقتي وكانوا
رايقين بس يمكن الروقان ده ماجاش بسهولة وكان له أسباب كتيرة
من ضمنها رؤيتهم للحياة ويمكن اختلاف ظروفهم  خلاهم يشوفوا الحياة بشكل  مختلف وده بان من بعض الأغاني اللي اتكتبت في الأربعينيات والخمسينيات زي أغنية “الحياة حلوة” اللي كتبها أحمد بدرخان وغناها فريد الأطرش سنة 1949م وأغنية “الدنيا ريشة في هوا” اللي كتبها “مأمون الشناوي” وغناها “سعد عبد الوهاب” سنة 1957م.. وأنت بتسمعهم هتحس بالسعادة تلقائي وإن الدنيا بسيطة خالص.. فتخيل بقى لو دخلت أكتر في معانيهم وتفسيراتهم اللي سبقت عصرهم ولسه بنسمعهم لحد دلوقتي ونتمزج بيهم..

نبدأ مع كلمات “أحمد بدرخان” اللي رغم بساطتها وسهولة وقعها على السمع لكنها قالت كتير:

“الحياة حلوة بس نفهمها”
يعني من الأخر كده طول ما إحنا مش مدركين إنها مجرد حياة ودنيا وهتخلص طول
ما هنحزن عليها.. وكل ما ادركنا بدري إنها هتخلص وهنعدي الليفل ده بعد شوية طول ماهتبقى حلوة يعني من الأخر إننا نسلملها كل حاجة!”

“فوزوا بمتاعها و انسوا أوجاعها ليه نضيعها”
النسيان من أهم الحاجات اللي ممكن تعملها عشان تقدر تكمل.. احتفل بالحلو وانبسط بيه وسيب الوقت ينسيك الوجع ماتفضلش لازق فيه..

“الحياه تضحك للي يتبّسم
و اللى بيكشّر ده اللي يتألم”
عارفين قانون الجذب اللي قارفينا بيه في العالم وطالع تريند دلوقتي.. أهو الأغنية لخصته من زمان وقالت الحياة هتضحكلك لو بصتلها نظرة إيجابية وهتديك على وشك لو كشرت كده كده هتعيشها بس
Make your choice تحب تعيشها إزاي؟

“هني أحبابك ود أصــحابــك وأرضى بـمـنابك”
وقفلت الأغنية بالكوبليه اللي هيخليك تعيش مرتاح.. إنك تكون قريب للناس اللي بتحبها وتحافظ على علاقاتك الإجتماعية لأنها هي اللي باقيالك في الحياة الصغيرة دي ودول هتعرف قيمتهم أوي في اللحظات الصعبة وهتلاقيهم جنبك من غير ماتدور
+ أهم حاجة بقى هي “الرضا” لأن الرضا والقناعة باللي معاك هو اللي هيخليك سعيد وده عمره ماهيجي بسهولة بالعكس محتاج وقت وتدريب بس كل ماعرفت المفاتيح بدري كل ما عيشت الحياة وشوفتها حلوة قدام!

نيجي بقى لجمال كلمات مأمون الشناوي اللي كمل بيها تلخيص الحياة لما قال:

“إحنا النهاردة سوا
وبكرة هنكون فين
في الدنيا في الدنيا”

يمكن مأمون الشناوي حب يفكرنا إن مفيش حاجة دايمة فبيقولنا
نتبسط باللحظات الموجودة دلوقتي قبل ماتروح وتختفي في الدنيا!
زي صحابك وحبايبك ولحظاتك الحلوة حاول تعمل منها ذكريات قبل ماتخلص
وزي مابيقولوا الدنيا تلاهي..

“ياللي بتسأل عن الحياة
خدها كده زي ما هي
فيها إبتسامه و فيها آه
فيها قاسية وحنية”
يعني من الأخر ماتـفكرش كتير وتشغل دماغك بالـ overthinking خد كل
حاجة زي ماهي الحلو والوحش هي الحياة كده ميكس عمرها ماهتبقى
كلها حلوة ولا عمرها هتبقى كلها وحشة.

وبيأكد “مأمون الشناوي على ده تاني وقال:
“ياما الحياة فيها اللي بيشكيهاو اللي بيرضيها و اللي يقاسيها”

يعني من الأخر كده هتشوف كل الأشكال والألوان في الحياة بس حاول تحط الحاجات تحت مسمياتها وتعرف إنها فترات وهتعدي وبتحصل لكل الناس مش معاك لوحدك
وافتكر إن أي حاجة بتحصل في الحياة هتضيفلك شيء وتعلمك حتى لو حاسس إنها بتعلم عليك دلوقتي.. بكره هتعرف قيمتها.. وماتنساش تفكر نفسك كل يوم الصبح
“إن الحياة حلوة بس تفهمها!”