ليه فيه ناس مابتحبش الأحضان واللمس عموما؟

فيه ناس لما بتبقى زعلانة أو متضايقة مابتحبش حد يطبطب عليها أو يلمسها.. وغالبًأ هم هم نفس الناس اللي مابيحبوش يسلموا ويحضنوا ويبوسوا بأنفعال أوي وبيتضايقوا برضه لو حد لمسهم مهما كان الحد ده قريب منهم حتى لو حط ايده على وشهم.. الناس دي كتير وحوالينا في كل مكان بس مش دايما بيعبروا عن ضيقهم من ده فساعات بيضطروا يتقبلوه وساعات بيقولوا للناس القريبة منهم أو اللي هيتفهموا ده.

ده عمرك سألت نفسك هم كده ليه؟ في الغالب هتقول إن هم “براوين” أو ممكن تتقمص وتقول خلاص لا هسلم ولا هحضنهم تاني.. بس بالمناسبة دي بقى تعالى نقولك ليه الناس دي بتضايق من التلامس حسب ما قال موقع “wellbeingscounselling” وموقع “treatmyocd”  في أحد مقالاتهم:

1- عدم الثقة بالنفس:

تخيل حد مش واثق في جسمه أو شكله، طبيعي هيحس بعدم ارتياح لما حد يلمسه… وبيبقى فيه نوع من القلق إن الشخص التاني ممكن يلاحظ حاجة هو مش عايز يبانها زي لما حد يبقى مش مرتاح في لبسه، بس هنا بالذات الموضوع أعمق من كده ومرتبط بنظرة الشخص لنفسه

2-تربية وثقافة مختلفة: 

فيه بعض البيوت أو الثقافات بتعتبر التلامس الجسدي مش حاجة أساسية في التعبير عن المشاعر يعني مثلًا لو حد اتربى في بيت مافيش فيه أحضان أو حتى سلامات دافية، مش هيبقى عارف يتعامل إزاي لما حد يحاول يقرب منه.. ولو الموضوع في سياق أوسع شوية فيه مجتماعات وثقافات بتحافظ على الخصوصية شوية عكس ثقافات تانية زي الفرنسيين مثلا اللي بيحضنوا ويتلامسوا أغلب الوقت

3- تجارب صعبة في الماضي:

فيه ناس مرت بتجارب مؤلمة زي الاعتداء الجسدي أو التحرش، والتجارب دي بتخلق عندهم خوف من التلامس لأن ده بيكون مرتبط عندهم بالذكريات السيئة اللي عايزين يهربوا منها بأي طريقة.

4- “هافيوفوبيا” أو رهاب التلامس:

ده نوع من أنواع الرهاب اللي بيخلي الشخص يخاف من أي تلامس جسدي اللي عندهم الحالة دي ممكن يبقى عندهم قلق أو حتى شعور بالتهديد لو حد قرب منهم وده أحيانًا بيكون مرتبط بمشاكل نفسية زي الاكتئاب أو التوتر المزمن

5- الخوف من الجراثيم:

فيه ناس بتخاف جدًا من فكرة العدوى أو التلوث والأمراض خصوصًا بعد انتشار الأمراض والوعي الزايد اللي حصل للناس.. فالشخص ده ممكن يبقى بيشوف التلامس الجسدي شئ غير آمن مش عشان مابيحبكش، لكن لأنه قلقان على صحته

6- الحساسية الزايدة تجاه اللمس:

فيه أشخاص عندهم حساسية مفرطة من اللمس بسبب طبيعة أعصابهم أو طريقة عمل الجهاز العصبي عندهم.. وده ممكن يخليهم يحسوا إن أي تلامس حتى لو بسيطم زعج أو غلس

7- الصدمات النفسية في الطفولة: 

لو الشخص مرّ بتجارب زي الإهمال أو عدم الاحتواء في صغره ممكن يكبر وهو مش متعود على الأحضان أو مابيعرفش يتقبلها.. التلامس بالنسبة له بيكون حاجة غريبة لأنه مااختبرهاش وهو صغير

8- تفضيلات شخصية بحتة:  

ببساطة جدا فيه ناس شخصياتهم مابتميلش للتلامس وده جزء من طبيعتهم.. زي ما فيه ناس بتحب الزحمة والدوشة وناس بتحب الهدوء فكمان فيه ناس بتفضل مساحتها الشخصية تكون أوسع

9- التربية الصارمة:

لو الشخص اتربى في بيئة صارمة أوي ممكن يكون التلامس بالنسبة له مرتبط بشعور بالضعف أو فقدان السيطرة.. فبيبعد عنه لأنه شايفه نوع من الانكشاف اللي هو مش مرتاح بيه

10- الانطوائية أو القلق الاجتماعي: 

الناس الانطوائيين أو اللي بيعانوا من القلق الاجتماعي ممكن يفضلوا إنهم يبعدوا عن التلامس لأنهم بيشوفوا فيه نوع من التقارب اللي يخلّيهم مش مرتاحين.. وده لأنهم بيحتاجوا وقت أكبر للتأقلم مع العلاقات الحميمية.

11- الخوف من المشاعر القوية:

بعض الناس بتخاف من إنهم يغرزوا عاطفيًا أو يتعلقوا أو يحبوا الشخص اللي قدامهم عشان الأحضان أو التلامس بيكونوا بالنسبة لهم زي بوابة للمشاعر العميقة اللي مش عايزين يفتحوا بابها

في الأخر أهم حاجة ماتاخدش الموضوع بشكل شخصي، لو عرفت حد ما بيحبش الأحضان أو التلامس حاول تحترم مساحته كل واحد فينا عنده طريقته الخاصة للتعبير عن مشاعره ومش لازم يكون الحب أو القرب مرتبطين بالتلامس الجسدي.. والمهم إن العلاقات كلها تكون مبنية على التفاهم والاحترام ومهما كانت الأسباب لازم نحترم خصوصية كل شخص وطريقته في التعامل.