تفاصيل الاكتشاف الأثري الجديد في منطقة البهنسا الأثرية بالمنيا

البعثة الأثرية المصرية الإسبانية التابعة لجامعة برشلونة ومعهد الشرق الأدنى القديم أعلنت النهاردة السبت 14 ديسمبر 2024 عن اكتشاف مجموعة مقابر من العصر البطلمي عليها نقوش وكتابات ملونة وبداخلها مومياوات وهياكل عظمية وتوابيت وحاجات أثرية نادرة وده أثناء التنقيب في منطقة البهنسا.

واكتشفت البعثة ألسنة وأظافر دهب لمومياوات في مقابر من العصر البطلمي.. وتم العثور على تمائم وجعارين عليها رموز زي علامة “الجد”، وإيزيس، وحورس، وجحوتي، ونصوص ومناظر طقسية لمعبودات تظهر لأول مرة بمنطقة البهنسا

وقال الأمين العام للمجلس الأعلى للآثار الدكتور محمد إسماعيل خالد إن الاكتشاف ده مهم جدًا لأنهم لأول مرة في البهنسا يلاقوا بقايا أدمية فيها 13 لسان وأظافر ذهب لمومياوات من العصر البطلمي.. وده بالإضافة لعدد من النصوص والمناظر اللي ليها طابع مصري قديم واللي بتظهر لأول مرة في منطقة البهنسا وده بيضيف كتير لتاريخ المنطقة  وبيوضح العادات الدينية اللي كانت موجودة في العصر البطلمي.

وقال الدكتور حسان إبراهيم عامر الأستاذ في كلية الآثار بجامعة القاهرة ومدير الحفريات إنهم لقوا جعران القلب في مكانه جوه المومياء مع 29 تميمة عليها علامة “الجد” وجعارين لبعض المعبودات زي حورس وجحوتي وإيزيس، وتمائم جمعت التلاتة مع بعض.

ووضح الدكتور إستير بونس ميلادو من الجانب الإسباني إن البعثة خلال أعمال الحفر لقت بئر دفن من الحجر مستطيل الشكل بيوصل لمقبرة من العصر البطلمي فيها صالة كبيرة رئيسة بتوصل لثلاث أوض بداخلها عشرات المومياوات جنب بعض، وده دليل إنها كانت مقبرة جماعية.. وجنب البئر ده تم العثور على بئر تاني بيوصل لـ 3 أوض كمان، واحدة منهم متزينة برسوم وكتابات ملونة لصاحب المقبرة وهو “ون نفر” وأسرته وده أمام معبودات زي أنوبيس وأوزوريس وآتوم وحورس وجحوتي، والسقف كمان متزين برسوم للمعبودة “نوت” ربة السماء، باللون الأبيض على خلفية زرقا فيها نجوم ومراكب مقدسة شايلة معبودات زي خبري ورع وآتوم.

واكتشفت البعثة كمان طبقة دهب رقيقة جدا وبتلمع على وش المومياء اللي بيحنطها المعبود أنوبيس وكمان على وش أوزوريس وإيزيس ونفتيس.. وقالت البعثة إن المناظر والنصوص دي بتمثل صاحب المقبرة وأسرته مع المعبودات المختلفة اللي بتظهر لأول مرة تظهر في البهنسا.

البعثة كمان اكتشفت أربعة توابيت من الحجر الجيري جوا الحجرة دي.

والدكتورة مايته ماسكورت رئيسة البعثة أكدت إنهم في موسم حفائرها اللي فات لقوا مقابر بترجع للعصر الصاوي واليوناني والروماني، واكتشفوا كنيسة البازيليكا الرومانية، ومعبد الأوزريون.. وأكدت إن البعثة مكملة أعمالها في الموقع عشان تكتشف أسرار أكتر عن المنطقة الأثرية المميزة دي.