في اليوم العالمي للمهاجرين.. معاناة النزوح في 2024 من فلسطين ولبنان والسودان والكونغو
في الوقت الحالي اللي فيه حروب وصراعات مسلحة وأزمات وإبادة جماعية.. النزوح واللجوء والهجرة بقوا واقع بيواجه ملايين من البشر كل يوم.. ناس كتير بتضطر تسيب بيوتها وبلادها وتهرب لمكان تاني عشان بس يقدروا يعيشوا، حتى لو بشكل مؤقت. وفي اليوم العالمي للمهاجرين هنتكلم عن بعض أشكال المعاناة دي بالأرقام والإحصائيات والتفاصيل، ونشوف قد إيه الوضع بقى كارثي في سنة 2024 في بلاد زي السودان، والكونغو، وفلسطين ولبنان.. حسب UNHCR و UNRWA و UNOCHA
السودان..
من بداية الحرب في السودان في أبريل 2023 بين القوات المسلحة السودانية وقوات الدعم السريع، الأزمة دي اتسببت في أكبر أزمة نزوح داخلي اتسجّلت عالميًا. وبعد أكتر من سنة على بداية الحرب.. لسه أعداد كبيرة من الناس بينزحوا من بيوتهم.. العدد الإجمالي للأشخاص اللي نزحوا داخليًا من أبريل 2023، واللي بيشمل كمان اللي كانوا عايشين أصلًا في نزوح واضطروا يهربوا تاني، وصل لأكتر من 7.7 مليون شخص.. وبين يناير ويونيو 2024، حوالي 1.6 مليون شخص اضطروا للنزوح جوه السودان.. وده كان أكبر عدد نزوح جديد على مستوى العالم خلال الـ 6 شهور دول.. وبكده وصل العدد الإجمالي للنازحين قسريًا في السودان في نص 2024 لـ 12.8 مليون شخص.. والوضع في السودان كل مدى بيبقى أسوأ بكتير.. وبيُقدّر إن أكتر من نٌص السكان بيعانوا من مستويات عالية من انعدام الأمن الغذائي الحاد.
وفي نفس الفترة.. حوالي نص مليون سوداني طلبوا الحماية الدولية، معظمهم في الدول المجاورة زي إفريقيا الوسطى، وتشاد، ومصر، وإثيوبيا، وجنوب السودان.. ودول تانية قريبة زي ليبيا، وتونس، وأوغندا، بدأت هي كمان تستقبل أعداد أكبر من السودانيين. وفي أول 6 شهور من 2024، زاد عدد اللاجئين السودانيين اللي اتمنحوا حماية دولية بحوالي ربع مليون شخص زيادة، ونتيجة ده إن وصل عدد اللاجئين السودانيين لـ 1.8 مليون في نص 2024.. ومعظمهم لسه موجودين في الدول المجاورة.
الكونغو..
الصراع المسلح في الكونغو مستمر بقاله كتير أوي من غير أي بوادر لنهايته.. والحرب مستمرة في شرق البلاد من 2022.. وزادت بشكل كبير في إقليم شمال كيفو في النٌص الأول من 2024.. ونتيجة ده إنه اتعرض حوالي 852000 شخص للنزوح الداخلي الجديد.. و35400 مواطن كونغولي طلبوا الحماية الدولية.. وبكده وصل العدد الإجمالي للنازحين قسريًا في نص السنة لـ 8.7 مليون كونغولي.
وكمان الفيضانات الكبيرة اللي حصلت في النُص الأول من السنة أثرت على حوالي 2.2 مليون شخص على مستوى البلاد بما فيهم اللي موجودين في الأقاليم الشرقية وده زوّد معاناة الناس اللي أصلاً نزحوا بسبب النزاع.
فلسطين..
الإبادة الجماعية في غزة مستمرة.. وكل سكان القطاع عايشين في وضع إنساني كارثي.. وغير القصف والمجازر فيه نقص المياه وسوء التغذية وانتشار الأمراض المعدية بسبب تكدس القمامة والصرف الصحي والجثث والدم.
التقديرات بتقول إن عدد النازحين قسريًا جوا قطاع غزة وصل لـ 1.7 مليون شخص في نٌص 2024.. معظمهم اضطروا ينزحوا أكتر من مرة من بداية الإبادة في أكتوبر 2023.. ومن 27 نوفمبر 2024، الأمم المتحدة قالت إن حوالي 1.9 مليون نازح موجودين في مدارس الأونروا اللي بقت مخيمات للنازحين دلوقتي.
صندوق الأمم المتحدة للسكان (UNFPA) أشار إلى إن حوالي 130000 شخص نزحوا قسريًا من شمال غزة لمدينة غزة من 6 أكتوبر 2024، وإن 70% من الناس اللي بيبحثوا عن مأوى في مواقع النزوح أطفال وستات. والصندوق نوّه إن كتير من الستات والبنات بيناموا في بيوت مهجورة وعيادات مدمرة أو حتى في الشارع.. والنزوح ده رفع عدد السكان في مدينة غزة من حوالي 250000 اللي كانوا موجودين لحد نهاية سبتمبر 2024 لـ حوالي 375000 شخص.
وفي وسط كل ده، حسب صندوق الأمم المتحدة للسكان، فيه حوالي 50000 ست حامل في غزة، ومن المتوقع يكون فيه 4000 ولادة في الشهر الجاي بس.. وفيه أكتر من 550000 ست بيعانوا من الجوع الحاد.. وحوالي 15000 ست حامل على وشك المجاعة.
وبكده حسب تقديرات الأمم المتحدة، على الأقل 1.9 مليون شخص –يعني حوالي 90% من السكان– جوا قطاع غزة نازحين داخليًا.. عدد كبير منهم اضطر ينزح أكتر من مرة، وبعضهم نزح أكتر من 10 مرات لحد دلوقتي.
لبنان..
اللبنانيين بيواجهوا أزمة كبيرة بسبب النزوح والعدوان الإسرائيلي.. العائلات في المناطق المستهدفة نزحت لمناطق في شمال ووسط البلاد.. ووفقًا لمكتب الأمم المتحدة لتنسيق الشؤون الإنسانية (OCHA)، من 7 أكتوبر 2024، أكتر من 600 ألف شخص نزح داخليًا.. لكن الحكومة اللبنانية بتقول إن العدد بيتجاوز المليون.
وعدد كبير من النازحين عايشين في مراكز إيواء زحمة جدا، وغيرهم اضطروا يعيشوا في الشارع، زي في ساحة الشهداء في بيروت.. لكن تصاعد العدوان الإسرائيلي خلى حتى الانتقال لمناطق تانية خطر.. والطرق والبنية التحتية الحيوية في مناطق كتير بقت مستهدفة ومنها طريق بيروت-دمشق السريع.. وده قطع الوصول للأماكن اللي المفروض “آمنة”.. وعطل جهود الإغاثة الإنسانية.
وبعض المواطنين اللبنانيين اتعرضوا لـ اللجوء أو الهجرة للخارج، خصوصًا لسوريا والعراق. التقارير بتاريخ 8 أكتوبر 2024 بتقول إن حوالي 75 ألف لبناني عبروا لسوريا، رغم الظروف الصعبة اللي هناك.. وفي العراق فيه أكتر من 6500 لبناني وصلوا من بداية العدوان.
وفي النهاية.. المعاناة اللي بتمر بيها ملايين الناس مش مجرد أرقام بنسمعها ونعدّيها.. ورا كل نازح أو مهاجر أو لاجيء فيه حكاية.. بيت ضاع، حلم اختفى، وأمان بقى مجرد ذكرى.
