إزاي ترجع تركز في الحاجة اللي كنت بتعملها بعد ما حد يشتتك؟

ساعات بتبقى قاعد في أمان الله بتشتغل أو بتذاكر أو مركز حتى في فكرة ما في دماغك وهتوديك لحتة مهمة وتلاقي حد قام طلع مرة واحدة بوظلك كل اللي بتعمله ده.. سواء إنه بيكلمك بقى أو بشوية دوشة عملهم في المكان أو بمسدج حتى على الموبايل جاتلك أو حتى جرس الباب يرن.. وفيه ناس من طبعها أصلا إنها مابتقدرش تركز في حاجة لوقت طويل وغصب عنها دماغها بتخليها تتشتت 

طاب لو أنت من الناس دي أو فيه حد بيشتتك كل شوية في حاجة مهمة بتعملها.. إزاي ترجع تاني للي بتعلمه بسرعة من غير ما تاخد وقت طويل.. تعالى نقولك بقى تعمل إيه حسب ما قال موقع “Verywell Mind” وموقع “HubSpot Blog”:

1- افهم إن دماغك محتاج وقت عشان يرجع يركز:

لما حد يقاطعك دماغك بتاخد وقت عشان تبدل بين الحاجتين، فمتحبطش خليك صبور عادي وحاول ترجع بهدوء، ودي حاجة اسمها “Attention Residue”، يعني عقلك بيحتاج فترة عشان يسيب الحاجة اللي كان فيها ويركز في حاجة تانية.

2- اعمل وقفة صغيرة:

لو حد شتتك، خد نفس عميق وريح شوية وبدل ما تقوم تضربه أو تزعقله عشان شتتك عادي ممكن تقوم تمشي دقيقة أو تشرب مية أو قوم نفسك يعني وبعد كده ارجع لحاجتك اللي بتعلمها عشان ده بيعمل كده زي الـ “ريسِت” لدماغك.

3- اعرف إيه الحاجة اللي شتتك:

هل هو الموبايل؟ صوت؟ حد من الناس حواليك؟ حاول تقلل من الحاجات اللي بتعملك إزعاج، مثلاً حط الموبايل على وضع الطيران أو استخدم سماعات لو الجو حواليك دوشة.

4- اكتب المهمة بتاعتك قدامك:

لو حد قاطعك، ساعات بتنسى أنت كنت بتعمل إيه.. فإيه الحل أصلا بقى هنا؟ اكتب دايمًا على ورقة صغيرة أو نوتس على الكمبيوتر التاسك اللي أنت شغال عليها. فلما ترجع عينك هتلقطها  وهتلاقي نفسك عارف تكمل بسهولة وعارف إيه اللي وراك.

5- استخدم تكنيك “بومودورو”:

ده أسلوب إنتاجية مشهور وهو عبارة عن إنك بتشتغل ٢٥ دقيقة من غير أي مقاطعة، وبعدها بتاخد 5 دقايق بريك.. وكده بتقلل فرص إنك تتشتت، ولو حصلت مقاطعة تعرف ترجع تاني بسهولة.

6- سامح نفسك لو مخك لسه مش حاضر:

لو حسيت إنك لسه مش قادر تركز عادي فكك ماتلومش نفسك.. أحيانًا كل اللي بتبقى  محتاجه إنك تبدأ بأي خطوة صغيرة، حتى لو كانت حاجة بسيطة زي فتح ملف أو ترتيب الحاجات اللي شغال عليها.

وأخيرا نحب نقولك إن التشتت بيحصل لأي حد، لكن الأهم هو إزاي تتعامل معاه فجرب الخطوات دي وافتكر دايمًا إن التركيز مهارة بتتطور مع الوقت وخلي عندك نية واضحة وابدأ بخطوة صغيرة، ومع الوقت هتلاقي نفسك أكتر إنتاجية وأقل عرضة للتشتت وماتنساش إن الراحة جزء من النجاح