ليه ما بنقدرش نفتكر شكل الناس اللي بنشوفها في الشارع؟

أوقات كتير بتمشي في الشارع أو تبقى في الطريق وتشوف ناس وتبصلهم على قد ما تبصلهم عمرك ما هتفتكر شكلهم تاني مهما قابتلهم ومهما كنت شخص بيفتكر أو مركز برضه صعب أوي تفتكر شكلهم أو ملامحهم حتى لو شوفتهم بعدها قريب.. بس عمرك فكرت ده بيحصل ليه معاك هل ده مثلا بسبب ذاكرتك أو إنك مابتفتكرش ولا ده عادي جدا وبيحصل لكل الناس وله تفسير علمي.. لو شكيت في نفسك وذاكرتك أو لو عايز تعرف ده سببه إيه تعالي نقولك الأسباب حسب موقع “scientific american” وموقع “Psychology Today”:

1- دور التعرف على الوشوش في الدماغ:

في المخ عندنا منطقة اسمها “FFA” وهي اختصار لـ “fusiform face area” والمنطقة دي هي مسؤولة عن التعرف على الوشوش، المنطقة دي بتشتغل أكتر لما تكون عارف الشخص اللي قدامك أو لما تركز عليه بشكل خاص لكن لما تشوف حد غريب في الشارع، النشاط فيها بيكون أقل بكتير لأن المخ مش شايف أهمية في تخزين تفاصيل الشخص ده وده حسب دراسة جامعة MIT في كامبريدج اللي أثبتت إن الـ FFA بتشتغل كأنها نظام فلترة وبتتجاهل تخزين أشكال الأشخاص الغريبة اللي مافيش بينهم وبينك علاقة اجتماعية أو أهمية.

2- الذاكرة الانطباعية:

لما نشوف ناس في الشارع دماغك غالبًا مابتركزش على تفاصيل ملامحهم، لكن بتبني “انطباع عام” عنهم، زي: هم طوال ولاقصيرين؟ لابسين رسمي ولا كاجوال؟ شكلهم واثق في نفسهم ولا مهزوزين؟ بس طبعاالانطباع ده بيكون سطحي جدًا وما بيستمرش لفترة طويلة عشان مبني على ثواني من الملاحظة.

زي مثلا لو شفت شخص لابس بدلة سوداء وشكله واثق في نفسه غالبًا هتفتكر إنه كان “شخص مهم” أكتر من لما تفتكر ملامح وشه.

3- ظاهرة التشابه:

أحيانًا كتير بنشوف كل الناس شبه بعض خصوصا بقى لو كانوا بيشاركوا صفات عامة زي مع بعض زي لون بشرتهم أو تسريحات شعرهم شبه بعض أو ستايل لبسهم زي بعض وده اللي قاله بحث من جامعة كامبريدج وضح فيه إن المخ أحيانًا بيستخدم “قوالب ذهنية” لتصنيف الناس وده بيخليه يحط تفاصيل مختلفة تحت نفس القالب، وبالتالي  بيبقى صعب فعلا تفتكرهم بعد كده.

4- التشتيت:

وأنت ماشي في الشارع، بتتعرض لكمية ضخمة من المعلومات في وقت واحد زي الإعلانات، والعربيات وأصوات الكلاكسات والناس اللي بتتكلم ده غير المواقف الكتير اللي ممكن تحصلك، والكم الكبير ده من المحفزات ده بيخلي المخ مضطر يختار إيه المهم.. فطبيعي جدًا إن شكل الناس اللي بتعدي حواليك يتفلتر تلقائيًا عشان يوفر طاقة لعقلك.

5- ظاهرة “العابر المجهول”:

فيه دراسة اتعملت في جامعة ستانفورد في كاليفورنيا أثبتت إن المخ البشري بيميل أكتر إنه يفتكر الأشخاص المرتبطين بعواطف معينة زي الصحاب أو حتى الناس اللي حصل معاهم مواقف محورية.. وده بناءًا على إن في علم النفس في مفهوم بيقول إن الناس الغريبة اللي بنقابلها في الشارع غالبًا ما بيبقاش لهم أي تأثير طويل الأمد على حياتنا.. وبالتالي المخ بيتعامل معاهم على إنهم تفاصيل مش مهمة وماتستحقش تتخزن يعني

6- النظرية التطورية:

لو هنبص للموضوع من نظرة تطوررية فهنلاقي إن الإنسان القديم ركز على إنه يخزين معلومات الناس اللي في دايرته الاجتماعية عشان البقاء زي أفراد القبيلة اللي بيعيش معاهم أما بالنسبة للناس الغيريبة فكان بيتم تصنيفهم على إنهم خطر أو حاجة مش مهمة.. وده بطبيعة الحال انعكس على طريقة تخزين المعلومات في المخ.

7- تأثير الزمن القصير: 

لما بتشوف حد لمدة ثواني أو دقيقة ده وقتمش كفاية خالص عشان تسجل تفاصيل ملامحه خصوصا لإن ذاكرة التفاصيل بتحتاج تكرار واستمرارية عشان المعلومة ترسخ وتثبت.

مثلا زي: لو قعدت مع شخص غريب أو حتى صاحب صحابك على القهوة ساعة كاملة أكيد هتفتكر شكله أكتر من لو شفته في الشارع لمدة 5 ثواني

وفي النهاية خلينا نقولك إن الموضوع ده فعلا مفيد لدماغك عشان لو مخنا ركز على كل التفاصيل اللي حواليه كنا هنحتاج ذاكرة حجمها مش طبيعي فإننا مانفتكرش شكل الناس دي ميزة مش عيب عشان بتساعدنا نحافظ على طاقتنا العقلية ونركز على الحاجات اللي فعلاً تهمنا وتستاهل.