ليه بيبقى عندنا “Celebrity crush” ونتشدله أكتر من الناس العادية؟
أكيد مر عليك وقت حسيت فيه بانجذاب لشخصية مشهور زي ممثل أو مغني أو لعيب كرة أو حتى إنفلونسر على السوشيال ميديا.. بعدين بترجع لنفسك كده وتفتكر إن الشخص ده مايعرفش إنك موجود معانا على الكوكب أصلا وتفوق بقى وتحس إن إيه الهبل اللي بعمله ده بس لو حسيت إنك مستغرب من اللي بتعمله أو بتحسه خليك عارف إنك مش لوحدك اللي ممكن يحصل معاك كده عادي فيه كتير زيك والموضوع ده منتشر لدرجة إن له اسم بقاله سنين ومعروف على السوشيال ميديا كمان باسم “Celebrity crush”
بس ليه أصلا ده بيحصل سوا ليك أو لغيرك؟ وليه ممكن تلاقي نفسك معجب بشخص مشهور أكتر من حد عادي في حياتك؟ تعالى نقولك الأسباب ورا الموضوع ده حسب ما قال موقع “Verywell Mind” وموقع “Psychology Today”:
1- الإعجاب عن بعد من غير مخاطرة:
لما بتكرش على حد مشهور العلاقة بتكون من طرف واحد فمافيش قلق من الرفض ومافيش دراما ومافيش توقعات أو التزامات.. وده بيخلي الإعجاب بالمشاهير شئ آمن نفسيًا مقارنة بالإعجاب بشخص حقيقي في حياتك اليومية واللي ممكن يسببلك إحراج أو متاعب لو مش مهتم بيك بنفس الطريقة.
2- الدماغ مش بتفرق بين الحقيقي والخيالي:
دماغنا ساعات بتبقى مبرمجة على إنها تتفاعل مع الوشوش اللي بنشوفها كتير حتى لو كانت على الشاشة يعني لما بتشوف ممثل أو مغني مفضل ليك بشكل متكرر مخك بيبدأ يتعامل معاه كأنه جزء من حياتك.. والعلماء بيقولوا إن ده راجع لحاجة اسمها “العلاقات الطيفية” أو الـ (Parasocial Relationships) ودي علاقات أحادية الاتجاه بتحصل لما بنرتبط نفسيًا بشخص مشهور رغم إنه مايعرفش حاجة عن وجودنا.
3- المشاهير بيظهروا في أحسن حالاتهم:
أغلب الوقت إحنا بنشوف المشاهير في لحظاتهم المثالية على الريد كاربيت بقى وفي الانترفيوز أو في صورهم المتعدلة على إنستجرام.. حتى لو عندهم مشاكل شخصية إحنا مش بنشوفها بشكل مباشر وده بيخلينا نشوفهم كأنهم “الكراش المثالي” مقارنة بالناس العاديين اللي بنشوف عيوبهم كل يوم.
4- الهروب من الواقع:
حياتنا اليومية ساعات بتكون روتينية أو مملة، فبنلاقي متعة في متابعة المشاهير وحياتهم المثيرة دي، فممكن تلاقي نفسك متعلق بشخصية مشهورة لأن خيالك بيكمل الجزء الناقص في حياتك وبتشوفهم كأنهم جزء من عالم مثالي تحب تعيش فيه.
5- الكاريزما والجاذبية العالية:
المشاهير عندهم حاجة مشتركة وهي الكاريزما سواء بسبب ثقتهم بنفسهم أو لباقتهم أو حتى شكلهم ومظهرهم فبيكون عندهم حضور قوي بيخليهم جذابين ولو تدقق شوية أصلا هتلاقي إن ده جزء من شغلهم وهو إنهم يبقوا محبوبين ومؤثرين.. وعلى العكس الناس العادية ممكن يكونوا جذابين بس مش بنفس الأسلوب المثالي اللي بيظهر بيه المشاهير.
6- التأثير الإعلامي والتسويق:
شركات التسويق والبرامج التلفزيونية بتساعد إنها تخلي صورة المشاهير أجمل أكتر جاذبية، فلما بنشوف نفس الوش في كل مكان عقلنا بيتبرمج على الإعجاب بيه تلقائيًا.. وده جزء من مفهوم “التعرض المتكرر” أو الـ (Mere Exposure Effect) اللي بيقول إننا بنميل للإعجاب بالحاجات اللي بنشوفها باستمرار.
7- المقارنة الاجتماعية:
بعض الناس بيستخدموا المشاهير كنوع من الإلهام في حياتهم وبيبصوا عليهم كأنهم رموز للجمال والنجاح والقوة.. وساعات بنكرش على شخصيات مشهورة لأننا بنشوف فيهم صفات نتمنى تكون عندنا سواء الثقة أو الشجاعة أو أسلوب الحياة نفسه.
8- المشاهير بيبقوا “نسخة محسنة” من شريك الحياة المثالي:
في العلاقات الحقيقية لازم تتعامل مع عيوب الشخص.. بس لما يبقى عندك “Celebrity crush” فأنت بتشوف نسخة مثالية من غير أي مشاكل حقيقية وده بيخلي الإعجاب بيهم أسهل لأن مفيش توقعات أو مسؤوليات زي العلاقات الواقعية وزي ما قولنا في أول الموضوع.
وعموما يعني في الأخر نحب نقولك إن الإعجاب بالمشاهير مش حاجة غلط بالعكس ممكن يكون حاجة ممتعة وتديك نوع من الإلهام وترسملك أحلام لشريك حياتك وتعلي توقعاتك اللي واقعة في الأرض وتخليك تحس إنك تستاهل الأفضل.. بس لو لقيت إنك متعلق بحد من المشاهير لدرجة إنك تعمل زي سمير سبوت في فيلم بحبك وأنا كمان وتبعد عن العلاقات الحقيقية أو بتقارن كل اللي حواليك بيهم فهنا بقى لا يبقى فيه مشكلة لازم تقعد وتفكر وتعيد حسباتك تاني.
