بعد تشييع جنازته النهاردة في أسوان.. مين هو الأمير/ كريم أغاخان؟
النهاردة كانت مراسم دفن الأمير/ كريم أغاخان بمدينة أسوان وده بعد ما امبارح 8 فبراير رئاسة الوزراء أصدرت قرار ترخيص بدفنه بضريح الأغاخان الموجود بمدينة أسوان واللي توفى مساء يوم الثلاثاء بمدينة لشبونة البرتغالية.. فخلونا نعرف أكتر عن “كريم أغاخان”
مين هو؟
كريم الحسيني الأغاخان الرابع هو الإمام الـ 49 للطائفة الإسماعيلية وفضل أكتر من 6 عقود على رأس الطائفة اللي بيتبعها حوالي 15 مليون شخص حول العالم.. اتولد 13 ديسمبر 1936 في مدينة جينيف السويسرية وهو الابن الأكبر للأمير علي خان من زوجته اللي اسمها جوان يارد بولر.. وبيحمل الجنسية البريطانية والإنجليزية
كمان في 2010 خد الجنسية الفخرية الكندية.. وعمل إمبراطورية خيرية بتساهم في بناء المستشفيات والمدارس في البلاد النامية
علاقة الأغاخان بمصر
الطائفة الإسماعيلية النزارية دي ارتبطت بمصر من أول ما اتنشأت وأسسها الإمام الأول حسن الصباح وده كان ولاءً لنزار الابن الأكبر للمستنصر بالله الخليفة الفاطمي حاكم مصر وقتها واللي أقصاه أخوه الأصغر المستعلي بالله عن الحكم وسموا نفسهم “الطائفة الإسماعيلية النزارية” نسبة إلى نزار بن المستنصر بالله
ده بالإضافة للعلاقة التاريخية مع القاهرة اللي بناها الخليفة الفاطمي الرابع والإمام الإسماعيلي الرابع عشر “المعز لدين الله الفاطمي” سنة 969م.. وزاد في الخمسينات بعد ما اختار الإمام الـ 48 محمد شاه الحسيني محافظة أسوان عشان يتعالج فيها ومش بس كده
طب ليه اتدفن في أسوان؟
قصة دفن الأغاخان في أسوان بترجع لإن فيه مقبرة مخصصة للأسرة هناك ولزعماء الطائفة الإسماعيلية النزارية.. واللي بناها كان السلطان محمد شاة الحسيني “الأغاخان الثالث” على ربوة عالية في أسوان ووصى بالدفن فيها.. وده لأنه كان بيعاني من الروماتيزم وجرب العلاج الطبيعي في رمال أسوان وتأثيرها كان إيجابي جدا عشان كده حب البلد وحب يتدفن فيها.. والمقبرة اتصممت التراث المعماري الإسلامي الفاطمي واللي اتحولت مزار سياحي بعدها لكن الأسرة وصت بإغلاقها أمام الزائرين
أما بالنسبة لكريم الحسيني الأغاخان فكانت وصيته أن يتم دفنه بجوار جده السلطان محمد شاه بالجبل الغربي
تفاصيل دفنه
وامبارح بالليل رئيس الوزراء أصدر قرار بترخيص دفن الأمير كريم أغاخان وبعدها وزير الطيران المدني وجه بتقديم كافة التسهيلات لاستقبال جثمانه والوفود المرافقة بمطار أسوان الدولي على متن طائرات خاصة جاية من لشبونة.. وكمان محافظ أسوان استقبل الطائرة والمحافظة نسقت مع كافة الجهات المعنية لإعداد وتجهيز مراسم الجنازة واللي بدأت النهاردة من من أمام مقبرة عملاق الأدب الراحل عباس العقاد لميدان الدكتور مجدى يعقوب.. واتحركت في عدد من المراكب النيلية إلى البر الغربي لنهر النيل متوجهة إلى مقبرة الأغاخان الثالث ليواري مثواه الأخير.
