تفاصيل ولادة أول طفل في العالم بالتلقيح الصناعي باستخدام الذكاء الاصطناعي
انتشرت أخبار عن ولادة أول طفل في العالم من خلال عملية تلقيح صناعي كاملة تمت بشكل آلي بالكامل باستخدام الذكاء الاصطناعي والروبوتات.. تعالوا نتكلم أكتر عن تفاصيل الولادة دي.
الطفل اتولد بعد ما اتعمله حقن مجهري بشكل شبه كامل عن طريق روبوتات بيتم التحكم فيها عن بُعد.
العملية دي حصلت في المكسيك لكن اللي نفذوها مهندسين وأخصائيين أجنة موجودين في نيويورك.. وكل ده اتعمل عن طريق أجهزة بيحركوها عن بُعد.. والنتيجة إن الطفل اتولد فعلًا بعد ما حصل الحمل بنجاح.
اللي حصل يعتبر خطوة كبيرة لإثبات إن العملية دي ممكن تتنفذ بشكل آلي ومنظم.. وده ممكن يخلي نسبة نجاح نوع معين من عمليات الحقن المجهري تزيد في المستقبل.
الجنين اتكون باستخدام تقنية اسمها “الحقن المجهري داخل السيتوبلازم” (ICSI).. ودي طريقة موجودة من التسعينات.. في الطريقة التقليدية للحقن المجهري، البويضة بتتحط وسط آلاف الحيوانات المنوية، لكن في الـ ICSI بيتم حقن حيوان منوي واحد جوه البويضة مباشرة.. وده بيبقى مفيد في حالات ضعف الحيوانات المنوية.
ومؤخرًا اتنشر بحث يوم الخميس (10 أبريل) في مجلة علمية اسمها Reproductive BioMedicine Online بيشرح إزاي العملية دي اتعملت بشكل آلي بالكامل.
ليه العملية أصلا تتعمل باستخدام الذكاء الاصطناعي والروبوتات؟
في الدراسة.. كل خطوة في العملية اتعملت باستخدام أجهزة في مدينة “جوادالاخارا” في المكسيك.. أما الأطباء في نيويورك كانوا بيراقبوا ويتحكموا فيها عن بُعد.. وده أدى لتكوين جنين اتزرع بنجاح في رحم سيدة عمرها 40 سنة.. وقدرت تكمل حملها لحد الولادة.
الشركة اللي عملت التكنولوجيا دي اسمها “Conceivable Life Sciences”.. ودي شركة متخصصة في تكنولوجيا الخصوبة في نيويورك.. هم اللي صمموا نظام بيقدر ينفذ 23 خطوة من خطوات ICSI “الحقن المجهري داخل السيتوبلازم” من أول اختيار الحيوان المنوي المناسب لحد حقنه في البويضة واختيار الأجنة الأفضل.. بس النظام مش بيقوم بجمع البويضات أو الحيوانات المنوية ولا بزرع الجنين في الرحم.
والتنظيم ده ممكن يقلل الأخطاء البشرية وكمان يقلل من فرص تلف البويضات خلال العملية وده تحدي كبير في النوع ده من العمليات.. وحسب الخبراء العملية دي مرهقة جدًا خصوصًا لو بتتعامل مع مئات البويضات في يوم واحد.. وأي تكنولوجيا ممكن تسهّل ده هتكون مفيدة جدًا.. والعملية دي بتعتمد على اختيار الحيوان المنوي وتثبيته وسحبه وحقنه في البويضة.
النظام الآلي ده بيشتغل إزاي؟
النظام الآلي بيعتمد على خوارزمية ذكاء صناعي بتختار الحيوان المنوي المناسب حسب شكله.. وبعد كده خوارزمية تانية بتختار الأجنة الأفضل حسب شكل الكروموسومات وفرص النجاح في الانغراس في الرحم.. بيتم استخدام ليزر علشان يثبت ذيل الحيوان المنوي في النص بالظبط.. وبعد كده جهاز آلي بيخرم غشاء البويضة مرة واحدة وبيحقن الحيوان المنوي.. وكل خطوة بيتابعها حد بشري وبيضغط على زرار علشان يبدأها.
الحقن نفسه مش ضمان إن يحصل تخصيب.. بس هو خطوة أساسية.. ولو حصل تخصيب.. الدكتور بيزرع الجنين في الرحم.
بس النظام الآلي ده بياخد وقت أطول شوية من اليدوي.. حوالي 10 دقايق للبويضة الواحدة مقارنة بدقيقة ونص في الطريقة اليدوية.. في التجربة دي استخدموا 8 بويضات.. 5 اتعملهم تخصيب بالطريقة الآلية.. و3 بالطريقة اليدوية.. وكلهم نجحوا.
طب إيه الخطوة الجاية؟
الخطوات الجاية هتشتغل على تحسين النظام أكتر وأكتر.. ولازم تجارب تانية عشان الخبراء يتأكدوا من الأمان والكفاءة ويضمنوا اختيار أحسن الحيوانات المنوية وتقليل الضرر على البويضات.
بس برضه أغلب الناس في المجال شايفين إن ده تطور مهم جدًا.. وإن الشغل اليدوي في المعمل هو أبطأ جزء في الحقن المجهري.. ولو التكنولوجيا دي اتنفذت صح ممكن توسع وتسهل الوصول للعلاج ده.. وإن دايمًا هيكون فيه دور للبشر سواء أطباء أو مهندسين علشان يضمنوا إن كل حاجة ماشية صح.
