سلسلة حكايات يومية عادية.. حكاية 29: هو إحنا بنتعلم المشي كام مرة في حياتنا؟

من كام يوم كنت بسمع أغنية “تقع وتقوم” لمسار إجباري وأنا بدندن معاها افتكرت وأنا بتعلم المشي وأنا صغيرة.. كنت شقية وحركتي كتيرة واتعلمت المشي بسرعة.. بابا كان يمسكني من إيدي ويمشيني قدامه وهو حاطط رجلي على رجله ويغنيلي “تاتا خطي العتبة.. تاتا واحدة واحدة”.. ويقولي ماتخليش خطوتك سريعة امشي على مهلك واحدة واحدة.. ولما كنت أقع وأعيط كان يقولي لما تكبري مع الوقت مش هتقعي وهتعرفي تمشي حلو.. بس للأسف كبرت وعرفت إن بابا غلطان!

حصلي مشكلة صحية سببتلي صعوبة في المشي والحركة وكتير كنت بقع على الأرض.. ومع أول خطوة أخدتها بثبات لما خفيت كانت غريبة جدًا عليا.. وكأن رجلي بتعمل حاجة جديدة عليها لأول مرة مش كأني بمشي بقالي 22 سنة.. وقتها الدكتور كان بيقولي على مهلك واحدة واحدة خلي خطوتك لقدام بهداوة ماتستعجليش تمشي.. ساعتها أخدت بالي إني بجري في حياتي وبستعجل كل حاجة تحصل.. ولو حصلت مشكلة وقعتني بخاف وببقى فاكرة الدنيا هتنتهي.. بس اللي عرفته إن إحنا مش هنتعلم المشي في صغرنا بس وإن الحياة هتوقعنا كتير وهنحتاج بعدها نتعلم المشي من تانية.. وهنقع ونقوم ونقوم ونقع ما هي دي سنة الحياة 

وفي النهاية أحب أقولك اتحرك بهدوء ورزانة في الدنيا.. مش لازم تجري في حياتك انت مش في سباق مع حد ولا فيه حاجة هتفوتك.. ومش لازم خطواتك تبقى كتير بس المهم إنها تكون خطوات ثابتة