إزاي الرقم اللي بتحبه.. ممكن يعبر عن شخصيتك؟

الفيلسوف اليوناني وعالم الرياضيات فيثاغورث اللي ناس كتير عارفاه بسبب القوانين بتاعته اللي خدناها في المدرسة.. قال مقولة بتقول “Numbers Rule All Things” ومعناها إن الارقام بتتحكم في كل حاجة ومن منطلق المقولة دي حبينا نقولك دلالة حبك وتفضيلك لرقم معين في علم الأرقام وإزاي ده ممكن يبقى بيعبر عن شخصيتك

قبل ما نمسك رقم رقم، خلينا الأول في العموم لو بتحب الأرقام الفردية ده معناه إيه ولو بتحب الأرقام الزوجية ده معناه إيه

بالنسبة للأرقام الفردية فالشخص اللي بيفضلها بيكون شخص عقلاني وشخصيته قوية، بيهتم بالتفاصيل وبيحب كل حاجة تكون مثالية، ومابيعرفش يعبر عن مشاعره بسهولة ويعتبر متحفظ شوية في التعامل مع الناس لأنه مش بيقرب من حد بسهولة 

أما بقى اللي بيحبوا الأرقام الزوجية بيكونوا شخصيات عاطفية ومنطلقة، يحبوا يتعرفوا على ناس جديدة ودايماً عندهم فضول لأي تجربة، بس بيبقوا مترددين شوية في اتخاذ القرارات ومابيكونش عندهم ثقة كفاية في اختياراتهم

نيجي بقى لرقم رقم بالتفصيل وفقًا لدراسة منشورة في موقع Beliefnet

فالأشخاص اللي بيفضلوا رقم “1”
رقم واحد في معظم الثقافات بيرمز للأفضل والأحسن.. عشان كده محمد رمضان بيقول نامبر وان، المهم مش موضوعنا الناس الللي رقمها المفضل 1 بيتميزوا بالثقة بالنفس وبيكونوا شخصيات قيادية، ومايحبوش يتبعوا حد، ممكن يكونوا أنانيين ومتطلبين شوية بالذات في العلاقات العاطفية

رقم “2”

الناس اللي بتفضل رقم 2 بتكون خجولة وحساسة جدًا، وسهل يتأثروا بالطاقة السلبية، شخصيات خيالية وحالمة، وبيمشوا ورا حدسهم وإحساسهم في كل القرارات

رقم “3”

اللي بيفضلوا رقم 3 ومنهم اللي كاتبة الموضوع ده، بيكونوا شخصيات مليانة طاقة وكاريزماتيك زي الفنانة غادة إبراهيم، بيقدروا يكونوا صداقات بسهولة، وعندهم رؤية محددة لمستقبلهم

رقم “4”
اللي بيحبوا رقم 4 بيكونوا شخصيات شجاعة وصادقة، ومؤمنة جدًا بكل قراراتها وإختياراتها وده بيخليهم شخصيات عنيدة جدًا وصعب تغيرلهم رأيهم، بس في العموم هم شخصيات بتميل للاعتدال والاستقرار في كل حاجة

رقم “5”
حواس الإنسان خمسة، وعشان كده اللي بيفضلوا الرقم ده بيكونوا ناس حضورهم قوي بس بيزهقوا بسرعة وبيحبوا التغيير وبيدوروا طول الوقت على أنشطة يعملوها مابيحبوش يقعدوا هاديين، وساعات بيبقوا دراميين  في تصرفاتهم

رقم “6”
الناس اللي بتفضل رقم 6 بيكونوا طيبين وصبورين، بيخافوا أوي من الوحدة وعشان كده بيبقوا دايمًا لازقين قي الناس اللي بيحبوهم، أحيانًا بيكون عندهم مشاعر داخلية إنهم أحسن من اللي حواليهم وآرائهم دايمًا الأصح، وده ممكن يعملهم مشاكل

رقم “7”
رقم 7 مميز في ديانات وثقافات كتير ودايمًا بيرمز للحظ وللكمال وللشيء المثالي، واللبي بيفضلوا الرقم ده بيكونوا أشخاص ذكية وعندها قدر كبير من الحكمة ، أوفياء جدًا للناس اللي بيحبوهم، بس بيميلوا للانتقاد وماعندهمش صبر

رقم “8”
اللي بيحبوا رقم 8 بيكونوا ناس بتميل للتفاؤل في نظرتها للأمور، ومتوازنين عمومًا ماعندهمش تقلبات كتير في الموود، ولما بيكون عندهم هدف ممكن يعموا أي حاجة عشان يحققوه، ودايمًا بيكونوا محل ثقى للناس اللي حواليهم

رقم “9”
آخر رقم هو “9”  وبيتقال إنه واخد حتة من كل رقم في الأرقام اللي فاتت، صفات الأشخاص اللي بيفضلوا رقم 9 هي إنهم دايمًا بيسعوا لتقديم أفضل حاجة عندهم وطموحيين جدًا وبيعرفوا يستغلوا كل مهاراتهم وإمكانياتهم كويس، وبيحبوا التحديات والمغامرات

شوف بقى إنت بتفضل أي رقم من الأرقام ولو بتفضل أكتر من رقم.. ممكن تاخد الحلو من هنا عالحلو من هنا وتعملك تشكيلة على ذوقك