حكاية استقبال إشارة من مجرة على بٌعد 9 مليار سنة ضوئية

انتشرت أخبار كتير عن استقبال العلماء إشارة راديو/لاسلكية من مجرة على بٌعد 9 مليار سنة ضوئية عن الأرض، والدراسات قالت إن ده هيسمح لعلماء الفلك إنهم يعرفوا أكتر عن الكون القديم، لأن الإشارة وصلت من مجرة لما كان عمر الكون 4.9 مليار سنة بس.

وده يعتبر أول اكتشاف من نوعه لـ إشارة لاسلكية من مسافة كبيرة بالحجم ده.

القصة بدأت منين؟ باحثين في كندا والهند التقطوا إشارة من مجرة اسمها “SDSSJ0826 + 5630” -عارفين إنك كسلت تقرأ اسمها مش مشكلة- وده بمساعدة تلسكوب عملاق في الهند.

عالم الكونيات والمؤلف المشارك للدراسة “أرنب تشاكرابورتي” قال لجريدة The Metro البريطانية إن اكتشاف الموجات دي بيعادل “نظرة إلى الوراء قدرها 8.8 مليار سنة”. وإن الإشارة وصلت من مجرة انبعثت لما كان عمر الكون 4.9 مليار سنة بس، مع العلم إن عمر الكون دلوقتي يٌقال إنه 13.7 مليار سنة.

التلسكوب الكبير اللي في الهند التقط الإشارة بسبب عدسات الجاذبية، والظاهرة دي بتحصل بشكل طبيعي.

الباحثين استخدموا الاكتشاف ده علشان يقيسوا محتوى الكتلة الذرية للمجرة، واكتشفوا إن المجرة دي بالذات حجمها تقريبا ضعف كتلة النجوم اللي بنشوفها من الأرض.