إزاي تربى ابنك يطلع شاطر زي ياسين في تحت الوصاية؟

كتبت/ علياء شكري

في الواقع الشطارة هنا مش بمعنى إنه يبقى الأول على فصله ولا انبه واحد في العيلة.. الشطارة هنا إنه مسؤول وحنين على اخته وعارف وحافظ كل التفاصيل اللي تخصها علشان تكون بخير.

وعلشان كدة كنا عايزين نقول لكل أم على حبة حاجات متجربة من أمهات كتير علشان تخلي بنتك محظوظة بأخوها الكبير سواء وهم صغيرين أو كبار 

في الأول كده في كلمات لازم تحفظيها وبعدين هنطبقها في رحلة التربية والتنشئة

–          صحاب

–          أبوة

–          مسؤولية

–          حنية

–          حب

–          عطاء

–          اهتمام

–          استماع

ودي الحاجات اللي طبقتها حنان من غير ماتحس تقريبا في تربيتها لـ يس.. نشرحهم بترتيب أولوياتهم بقى:

1-مسؤولية:

ربي ابنك إنه يبقى مسؤول من البداية مسؤول يساعدك ويهتم بكل أفراد البيت وخليه راجل رأيه مهم وكلمته بيفكر فيها حتى لو طالعة من طفل صغير، الأطفال ساعات بيقولوا حكم وبيربونا وإحنا بنربيهم.. تاني حاجة عمليه إن وجود بنوتة في البيت إضافة لمسؤوليته وإن مساعدتك في رعايتها شئ جميل وله مكافات كتير أولها إنها تحبه وتحس تجاهه بالأمان. 

2- الحب:

الأطفال مرايا لينا فبيطبقوا تصرفاتنا من غير ما يحسوا لأنها بتتغرز فيهم، يعني لو علمتيه إنك بتحبيه من غير أسباب أو من غير مايعمل حاجة تلقائي هيعمل كده، ولو سامحتيه علشان بس بتحبيه هيتعلم يسامح ويكون عاقل في زعله وهكذا.. وده هيتطبق على إحساسه بالحب بدون شروط لأخته لإنها بكل بساطة حتة من قلبه زي ما هم الاتنين حتة منك. 

3- الأبوة:

فطرة الأبوة بتتولد عند الولد أو الراجل بمجرد إنه يمسك بايده طفلة ويبدأ يتعلق بيه مع الوقت، وعلشان تخلي الفطرة دي تتخلق عند ابنك علميه يحضن أخته الصغيرة من وهي بيبي وعلميه إنه الكبير ورأيه مهم جدا في تربيتها، وشاركيه في تربيتك ليها وعلميه إنها بتاعته هو كمان وشئ كبير جدا إنه يكون موجود في كل جزء من يومها علشان يبقى أحلى نسخة أب لما يكبر. 

4- عطاء:

علمي ابنك يشارك حاجته وألعابه وممكن كمان يشارك أكلته المفضلة بكل حب، وعلميه يحوش معاكي من فلوس أنتي بتديهاله علشان تجيبوا لعبة جديدة ليها مثلا، علميه إن ده هيقربهم لبعض وهيخلي علاقتهم ببعض أقوى. 

5- صحاب:

أنت وأختك صحاب هتحبوا بعض وتسمعوا بعض و تلعبوا مع بعض علشان أنتوا صحاب قبل أي حاجة.

6- حنيه واهتمام:

في الحقيقة الحنية والاهتمام وجهين لعملة واحدة زي ما أمهات كتير قالت لينا إن الاهتمام بتفاصيل الاخوات والرعاية بتخلي جزء الحنية يبان في كل تصرفاتهم، علمي ابنك يعبر لأخته عن حبه ليها و اعرفي طريقة تعبيره في الحب ووضحيها للاخت الصغيرة علشان تفهمها. 

7- استماع:

وعلشان إحنا ” صحاب حنينين” هنعرف نسمع بعض، بس الجزء ده بيكون في سن أكبر شوية لما البنت تبدأ تفهم وتعبر عن مشاعرها، وهنا دورك إنك تعلمي ابنك إزاي يسمعها وطبعا لما تكون هي في نفس سنه هنعلمها ده. 

في الاخر خالص علميهم إن علاقتهم ببعض مافيش حد يقدر يتدخل مابينهم فيها وإن حبهم لبعض هو اللي هيدوم، وعلمي ابنك يكون سند صح ليها وعلميها تكون مصدر سلام للبيت علشان لما يكبروا يكونوا مصدر تربوي مهم لأجيال شاطرة و “حنينة” كتير زي يس.