إزاي ماتكررش نفس الغلط تاني في 5 خطوات

كلنا بنيجي الدنيا من غير كتالوج .. وده بيخلي أفعالنا في موضع احتمالات كتير.. نعمل صح أو غلط.. وعشان الإنسان مننا بيميل دايمًا للصح وإنه يتجنب الغلط.. بتكون التجارب اللي بيمر بيها دليل له بيتعلم منها.. وعلى فكرة مش مشكلة خالص ان الواحد يغلط.. لكن المشكلة لو اتكرر الغلط ده.. وموقع psychologytoday  بيقدملك 5 خطوات تاخد بالك منها عشان ماتكررش نفس الغلط تاني:

1- اعترف بالغلط .. ده بيحطك على أول طريق تجنب الغلط .. لأن نص علاج أي مشكلة هو الاعتراف بيها.. لو غلط واجه نفسك عادي.

2- راجع تصرفاتك اللي وقعتك في الغلط لأن وارد جدًا تكون بتعمل حاجة صح لكن بطريقة غلط.. وخليك مرن وقابل للتغيير للأفضل بشكل مستمر.

3- حاوط نفسك بناس تشجعك إنك تتطور وتكون أفضل.. بدل الناس اللي بتفكرك بالغلط اللي عملته زمان.. ويحاصروك جوه دائرة الغلط وماتتحركش منها.. وده اللي  أكدته “Jennifer Butler” خبيرة العلاقات في مقال لها في نفس الموضوع.

4- ماتفكرش في الغلطات اللي عملتها بشكل مبالغ فيه.. لأن التفكير السلبي هيضيع وقتك وهيضيع فرصتك انك تفكر في حل للمشكلة.. وده أكدته دكتورة “Sheri Jacobson” في مقال لها وقالت “إن التفكير المفرط في أخطاء الماضي بيخلينا عُرضة لتكرار الغلط”.

5- وأخيراً.. تقبل فكرة الغلط.. وده مش معناه تبرير إنك تغلط .. لكن خليك عارف الغلط وارد جدًا.. انت مش لوحدك.. كلنا بنغلط وده شئ مهم جدًا عشان نتعلم منه.