إيه الفرق بين الرواية والقصة؟
الكاتب أحمد مراد في حوار مع عمرو أديب اتكلم عن الفرق بين الرواية والقصة، وقال إن الاشتقاق اللغوى هو الأصل، والرواية جاية من “مروية” يعنى شىء قابل للكذب.. لكن القصة جاية من “قصّ الأثر” يعني لازم تكون حقيقية.
وده طبعا اختلف معاه كتير من المثقفين والنقاد وحتى القراء، وعمل جدل كبير على السوشيال ميديا وهجوم على تصريح الكاتب.
وده يخلينا نسأل سؤال مهم.. إيه الفرق فعلا بين الرواية والقصة؟
أول حاجة، تعريف الرواية والقصة في معجم المعاني الجامع:
- الرواية : القصة الطويلة
- رواية قصيرة: سرد نثري قصير ذو مغزى أخلاقي، وغالبًا ما يكون ساخرًا
- رواية السيرة: رواية طويلة بأجزاء تتّبع بشكل متسلسل تاريخ أجيال عدّة أو مجتمع أو مجموعة
- القصة :حكاية مكتوبة طويلة تستمد من الخيال أو الواقع أو منهما معاً، وتبنى على قواعد معينة من الفن الأدبي
- قصة قصيرة: قطعة نثرية روائية فيها عدد قليل من الشخصيات وتهدف إلى وحدة التأثير
تاني حاجة، الفرق بين الرواية والقصة:
- من حيث الطول:
القصة: عادة بتكون قصيرة، وعادة مابتكونش أكتر من 10 صفحات.
الرواية: بتكون طويلة، وممكن تبقى أكتر من 1000 صفحة.
- من حيث الشخصيات:
القصة: عدد قليل من الشخصيات، وغالبا مفيهاش شخصيات ثانوية، وممكن تبقى يتدور عن شخصية واحدة.
الرواية: فيها عدد كبير من الشخصيات، مع مساحة لوجود شخصيات ثانوية.
- من حيث الأحداث:
القصة: أحداث القصة غالبا بتدور عن حدث واحد.
الرواية: سلسلة من الأحداث المعقدة.
- من حيث الوحدة:
القصة: بتتميز عادة بوحدة الزمان والمكان والحدث.
الرواية: بتتعدد في الأحداث والأزمنة والأماكن.
- من حيث تركيبة العناصر الأساسية:
القصة عادة بيكون فيها العناصر دي: (الفكرة أو الهدف من القصة – حدث – عقدة – حل – شخصيات محدودة أو شخصية واحدة – زمان ومكان)
الرواية عادة بيكون فيها العناصر دي: (الشخصيات الرئيسية والثانوية – العقدة – الأحداث – الموضوع أو القضية اللي بتعالجها الرواية – البعد الزماني والمكاني – الحوار سواء مونولوج أو حوار خارجي)
