إيه هي فوائد المشي في رمضان؟

بما إن أغلبنا بيكون عنده حبة وقت فاضيين قبل الفطار أو حتى بعده.. جمعنالكم شوية فوايد للتمشية في رمضان حسب موقع الطبي:

1- لو قبل الفطار.. كلنا بنبقى مريحين خالص ومحتاجين نجدد نشاطنا عشان لو حبينا ننزل مع صحابنا بعد ما نفطر.. المشي بيجبر الجسم يستخدم مصدر الطاقة زي الدهون والجليكوجين بدل الجلوكوز ودي حاجة بتظبط “التمثيل الغذائي” وده أي تفاعل في الجسم عشان يطلع طاقة ويحرقها

2- وكمان بيحسن مزاجك شوية عشان الجسم بيفرز مادة “الإندورفين” اللي مسؤولة عن تحسين المزاج وبتقلل تشتيت الدماغ.. يعني من الآخر هتروق بالك

3- قلل توتر.. زود انبساط

المشي قبل الفطار بيقلل من هرمون الكورتيزول عشان الجسم بيفرز هرمونات تانية بتقلل التوتر وهي “نورادرينالين وبيتا إندورفين” ودول بيزودوا مشاعر السعادة والرضا

4- نيجي للفايدة الأهم بقى وهي تحسين صحة القلب والأوعية الدموية ويقلل من مخاطر الإصابة بالأمراض اللي ليها علاقة بالقلب

5- قلل كرش.. زود فورمة

طبعًا إحنا داخلين على الصيف والهدوم هتبين كل حاجة فا المشي قبل الفطار بيحسن حرق الدهون في الجسم وتقليل الوزن بشكل أسرع.. أما لو عايز أكتر من كده ونتيجة كبيرة تخس فا إنت محتاج تعمل نظام أكل ورياضة 

6- طبعًا كلنا نومنا مضروب بالنار سواء في رمضان أو غير رمضان.. بس المشي قبل الفطار بيحسن النوم عشان بيساعدك تسترخي وتنام أسرع وكمان بيظبط الساعة البيولوجية

7- أخيرًا فايدة المشي بعد الفطار

بيكون في حالة لو حابب تحسن عملية الهضم أو لو عندك عسر هضم وكمان بيحسن امتصاص العناصر الغذائية في الجسم بالإضافة كمان إنه بيسيطر على مستويات السكر في الدم اللي إحنا بندمرها بالحلويات والعصائر الكتيييييييييير أوي وكمان بيزود نشاطك