اعرف أكتر عن ظاهرة “القمر الأزرق العملاق” اللي هيظهر يوم 30 أغسطس

أخبار كتير بتتكلم عن ظاهرة “القمر الأزرق العملاق” اللي هيظهر في السماء ليلة يوم 30 أغسطس، تعالوا نعرف تفاصيل أكتر عن الظاهرة دي.

من المعروف إن فيه بدر واحد بس كل شهر ميلادي تقريبا، بس لما القمر يجي بدر مرتين في الشهر الميلادي، البدر التاني ده بيبقى اسمه “القمر الأزرق”، وده نفس اللي بيحصل دلوقتي في شهر أغسطس 2023، لأن القمر كان بدر في 1 أغسطس، وبعد كده هيبقى بدر تاني في 31 أغسطس.

يعني ببساطة وبشكل مختصر، القمر الأزرق العملاق هو البدر التاني خلال شهر واحد.

وفيه نوعين من القمر الأزرق، بس الاتنين مالهمش علاقة باللون الأزرق، وبيكونوا بلون القمر الطبيعي، النوع الأول هو القمر الأزرق التقويمي، والنوع التاني هو القمر الأزرق الموسمي، وده اللي بيكون البدر التالت في موسم فلكي واحد فيه أربع أقمار كاملة، فـ ده معناه إن السنة بيكون فيها 13 قمر بدل 12 قمر.

وبشكل عام، القمر العملاق بيظهر لما بيتزامن اكتمال القمر مع أقرب نقطة بيكون فيها من الأرض.

القمر الأزرق برغم اسمه، إلا إنه غالبا بيظهر بلونه الرمادي المعتاد، لكن بيظهر أكبر بنسبة ممكن توصل لـ 14% ومنوّر أكتر بنسبة 30% أكتر من العادي.

ظاهرة القمر الأرزق ممكن تحصل كل سنتين أو 3 سنين، وفي بعض الحالات النادرة ممكن الظاهرة دي تحصل مرتين في السنة الواحدة.