إزاي الأجازات بتأثر على حالتنا وصحتنا النفسية؟
أغلب خبراء الصحة بيتكلموا عن أهمية إن الشخص ياخد أجازات طويلة من الشغل من وقت للتاني، وبيتكلموا عن قد إيه الأجازات ليها فوايد عقلية ونفسية كبيرة.
حسب CNN، فيه عدد كبير من الدراسات العلمية، اللي اتكلمت عن الفوايد المباشرة للأجازات على الدماغ. وكان من أشهر الدراسات اللي اتعملت، دراسة اتعملت سنة 2016، وشارك فيها 46 عامل من شركة هولندية، واتطلب من العمال إنهم يعملوا اختبار عبارة عن إن اتوزع عليهم شوية حاجات واتطلب منهم يفكروا في أكبر عدد من الاستخدامات للحاجات دي في أقصر وقت. ولاحظ الباحثين إن بعد أسبوعين أجازة، العمال بقى عندهم مرونة إدراكية أكبر وبقوا قادرين يفكروا في عدد استخدامات أكتر للحاجات اللي اتعرضت عليهم، مقارنة بالنتايج اللي حصلت قبل إسبوعين الأجازة.
معظم الدراسات متفقة على إنه من وجهة نظر بيولوجية، واحدة من الأسباب الرئيسية للزيادة في المرونة المعرفية اللي بتحصل بعد الأجازات هو التقليل من التوتر اللي بتساعد فيه الأجازات.
مشكلة الشغل بتكون في “التوتر المزمن”، واللي بيتطور مع الوقت وبيسبب تعب، وزيادة مستويات القلق والغضب والعصبية. وكل ده بيحتاج إن الواحد يريحله حبتين وياخد أجازة عشان يخلص من كل التوتر ده ويصفي ذهنه ويفصل شوية.
كتير من الخبراء بيقولوا إن مجرد انتظار الأجازة ده بيخلي الشخص سعيد، وطبعا ده بيبان طول الأسبوع لما بنبقى مستنيين الويك إند، أو لما بنبقى مستنيين أجازة عيد أو أجازة مصيف أو أجازة سنوية، انتظار الأجازة في حد ذاته بيزود من إنتاج الدوبامين في الخلايا العصبية للدماغ، وده بيزود مشاعر المتعة والسعادة، عشان كده أول ما بنعرف إن فيه أجازة جاية قريب ده بيزود الدوبامين في دماغنا وبنحس بسعادة تلقائيا.
حسب BBC، دراسات كتير كمان اتكلمت إن الأجازات بتساعد على التقليل من خطر الإصابة بالسكتة القلبية وتقليل خطر الإصابة بالاكتئاب.
وفيه دراسة اتعملت قالت إن جزء من المتعة اللي بتحصلنا في الأجازات بتكون بسبب تجربة حاجات جديدة وزيارة أماكن جديدة أو أنشطة جديدة مختلفة عن اللي بنعمله في حياتنا اليومية. ولو طولت الأجازة ممكن الشخص يبدأ يزهق خصوصا لو الأجازة كلها في مكان واحد أو مقتصرة على نشاط واحد طول فترة الأجازة.
مجلة “دراسات السعادة” نشرت بحث بيقول إن الاستمتاع بأوقات الفراغ بيعتمد على قدرة الشخص على اختيار أنشطته، والبحث اتكلم عن إن الشخص ممكن يحس بالمتعة من خلال طرق كتير ومن بينها إن الشخص يعمل أنشطة يتعلم منها حاجات جديدة.
وعامة بما إن كل شخص بيحس بالسعادة وهو بيعمل نشاط مختلف عن الشخص التاني، فشعور الشبع من الأجازة مدته بتختلف من شخص للتاني برضه، وفيه اختلاف بين كل الناس في طريقة انبساطهم بالأجازات، فبعض الناس ممكن تتبسط بالأجازات اللي مليانة حركة ونشاط ويزهقوا من القعدة في مكان واحد، وناس تانية بتتبسط بالسترخاء والقعدة في مكان واحد، فمهم إن كل شخص يختار يقضى أجازته بالشكل اللي يبسطه ويريحه.
وأغلب الخبراء بينصحوا إنك لما تاخد أجازة ماتفكرش في الشغل خاااالص، وماتردش على أي رسايل ليها علاقة بالشغل، وتحاول تريح وماتشغلش دماغك بأي حاجة ممكن تضايقك.
وفي النهاية، ابعت الموضوع ده لمديرك وربنا يستر.
