اعرف محتاج تستحمى كام مرة في الأسبوع

في الصيف كل ما بتعرق أو لما بتعمل شوية مجهود بتدخل تستحمى، وفي أي فصل في السنة أول ما بتزهق بتلاقي نفسك بتدخل على الحمام تستحمى برضه، وفيه شوية أيام كده الحمام بيبقى بالنسبة لك فيها عبارة عن منتجع صحي، بس أوقات بيكون مفيد وأوقات بيسبب جفاف للبشرة، وأكيد عادات الحمى بالنسبة لك بتبقى معتمدة على نمط حياتك وجدولك الزمني، بس فيه شوية عوامل لازم تعرفها وعلى أساسها هتعرف المفروض تستحمى كام مرة حسب ما قال موقع “Bright side” في واحد من موضوعاته:

1- حدد نوع بشرتك:

لو كانت بشرتك دهنية فغالبا هتبقى فاكر إن الصابون هيخليها مابتلمعش بس في الحقيقة اللي بيحصل العكس وده بسبب المواد الكيميائية الضارة اللي في الصابون واللي بتسبب جفاف البشرة، وبتخلي الغدد الدهنية تنتج بشكل أكبر وبالتالي هتبقى بشرتك دهنية أكتر.

أما لو كانت بشرتك حساسة أو جافة أو لو بتعاني من أي أمراض جلدية زي الصدفية فممكن لو استحميت أكتر من مرة في اليوم يحصلك التهاب أو تهيج للجلد، عشان كده أغلب دكاترة الجلدية بينصحوا إنك تستحمى من مرتين لـ 3 مرات في الأسبوع.

2- حدد نوع شعرك:

لو أول ما بتصحى من النوم بتقوم تغسل شعرك بالشامبو عشان تفوق وتحس بالنضافة فخليك عارف إن غسيل الشعر بالشامبو كل يوم بيمنع شعرك إنه يبقى في أحسن حالاته، خصوصا لو كان شعرك كيرلي، ولو كنتي بينت وشعرك ناشف أو كيرلي فغسيل شعرك مرة في الأسبوع كفاية وده لإن مسام الشعر بتحتاج لدهون عشان تحافظ على الرطوبة فيها.

أما الأشخاص اللي شعرهم ناعم بس اللي ممكن يبقوا بيحتاجوا يغسلوه كل يوم وده لإن الشعر الناعم بيظهر بشكل زيتي أسرع بكتير.

3- فكر في جدول التمرين بتاعك:

لو كنت بنتروج الجيم كتير فأكيد أنت محتاج تستحمى بشكل متكرر، خصوصا إن الدش بعد الجيم بيساعد العضلات إنها تتعافى بسهولة وبيمنع ظهور حبوب الشباب في الجسم وبيعزز نظام المناعة، ونفس الكلام برضه بينطبق على الأشخاص اللي شغلهم فيه تعرض لمواد كميائية قوية، فلازم برضه يستحموا كل يوم.

4- على حسب الجو:

في الصيف من الطبيعي تحس إنك عايز تستحمى كل ما تعرق أو غالبا ممكن تستحمى مرتين في اليوم، وفي الشتا بسبب إن العرق أقل طبعا فانت بتحتاج تستحمى بنسبة أقل خصوصا إن في الشتاء ممكن تحس بجفاف وحساسية أكتر في بشرتك والحمى يوميا ممكن يسبب التهاب وتهيج وجفاف أكتر.

وبغض النظر عن عدد المرات اللي بتستحمى فيها في اليوم فيه شوية نصايح لازم تعملها وأنت بتستحمى عشان تحافظ على جلدك وعلى بشرتك زي:

1- قلل حرارة المياه، لإن المياه السخنة بتجرد البشرة من الزيوت الأساسية اللي الجسم بيفرزها وبيكون محتاجها.

2- اختار منتجات نضافة خالية من العطور، لإن الروايح اللي في الصابون بالرغم من كونها لطيفة بس ضارة للبشرة بسبب المواد الكيميائية اللي فيها.

3- الدكاترة بينصحوا إن مدة الدش ماتزدش على 10 دقايق بالكتير ومش لازم في كل مرة تستحمى يبقى فيه صابون، ولكن فيه بعض الأماكن في الجسم بتحتاج لصابون باستمرار ومش كل الجسم.