التفسير العلمي ورا إنك تصحى من النوم متضايق من غير سبب

فيه أوقات في اليوم بتلاقي نفسك فيها متضايق من غير سبب وممكن توصل لدرجة إنك بتصحى من النوم زهقان أو متضايق وده بيبقى مش طبيعي طبعا لإن أكيد ماحدش ضايقك ولا اتخانق معاك في الحلم.. فلو حصلك أو بيحصلك كده بتتعب أكتر عقبال ما تشرح للناس إنك فعلا مش عارف إنت متضايق ليه ومابتكدبش ولا بتخبي عليهم.

بس فيه أنواع كتير للاكتئاب وفيه منهم اللي بيزيد في أوقات محددة في اليوم، لو لاحظت مثلا إنك بتصحي متضايق أو زعلان أو حاسس باليأس أو محبط لفترة طويلة فده معناه إن احتمال تعاني كل يوم من نفس الإحساس في نفس الميعاد ده.

جمعية علم النفس الأمريكية (APA) قالت إنه مش من المعتاد إن الشخص يصحي مزاجه مش رايق، والأشخاص اللي بيعانوا من الاكتئاب الصباحي ممكن أعراض اكتئابهم تقل مع مرور الوقت في اليوم.. وممكن الاكتئاب الصباحي يبقى جزء من تغيير المزاج اليومي لكن بيكون في أسوأ فترة له الصبح بدري.

أعراض الاكتئاب الصباحي اللي هي شبه الاكتئاب الكلاسيكي اللي بيكون فيها حزن وقلق وعدم اهتمام بأي حاجة.. موقع “webmd” قال في أحد مقالاته إن أعراضه هي عبارة عن:

1- بتحس إنك قلقان ومش مستريح 

2- بتنام كتير وبتلاقي صعوبة في إنك تقوم من السرير 

3- صعوبة في مواجهة المهام البسيطة زي إنك تعمل قهوة الصبح أو تستحمى 

4- ماعندكش طاقة تبدأ اليوم أصلا 

5- قلة الانتباه أو قلة التركيز

6- الانفعالات الشديدة أو الإحباط 

7- تغيرات في الشهية

موقع “healthline” بيقول إن فيه دراسة اتعملت في 2013 لقيت إن الأشخاص المصابين بالاكتئاب الصباحي بيعانوا من اضطرابات في الساعة البيولوجية، وده واحد من أهم الأسباب الرئيسية، وقالت كمان الدراسة إن الجسم بيبقى متظبط إنه ينام طول الليل ويبقى صاحي بالنهار على أساس الساعة البيولوجية وإن هي المسئولة عن معدل ضربات القلب ودرجة حرارة الجسم، وبتأثر على الطاقة والتفكير والمزاج، وبتساعد على استقرار المزاج وإن الشخص تبقى صحته كويسة. 

ده غير إن إيقاع بعض الهرمونات زي الكورتيزول والميلاتونين بتساعد الجسم إنه يستعد لأحداث معينة، يعني الصبح الجسم بيفرز هرمون “الكورتيزول” في الشروق وده اللي بيدي الجسم الطاقة عشان يبقى نشيط ويقظ أثناء النهار، ومع غروب الشمس الجسم بيفرز هرمون “الميلاتونين” وده اللي بيخلي الجسم عايز ينام.

ولما الإيقاعات دي بتتعطل بيبدأ الجسم في إنتاج الهرمونات في الوقت الغلط من اليوم وده ممكن يبقى له تأثير سلبي على الصحة الجسدية والنفسية زي مثلا لو جسمك إنتاج “الميلاتونين” في النهار فهتحس بالتعب وسرعة الانفعال.

موقع “medicalnewstoday” قال شوية نصايح عشان الشخص يتجنب بيهم الاكتئاب الصباحي زي:

1- اصحي من بدري 

2- قوم من السرير

3- بلاش تنام وقت طويل 

4- فكر تفكير منطقي في يومك من غير ما تخلي خيالك يشتغل 

ولإن الاكتئاب الصباحي مالوش تشخيص منفصل عن الاكتئاب، ومالوش معايير تشخيصية خاصة فده معناه إن مالوش أي أعراض مؤكدة، لكن لو حسيت الموضوع بدأ يبقى أسوأ محتاج تروح لدكتور وهو هيسألك كذا سؤال عن أنماط نومك وتغيرات مزاجك وأسئلة تانية زي:

1- هل الأعراض بتسوء بشكل عام الصبح ولا بليل؟

2- بتلاقي صعوبة إنك تقوم من على السرير؟

3- هل تغيير حالتك المزاجية بتحصل بشكل كبير في فترة الصبح؟

4- بتلاقي صعوبة في التركيز أكتر من المعتاد؟

5- إيه اللي بيحسن مزاجك لو فيه ؟

6- هل روتينك اليومي متغير في الفترة الأخيرة؟

– لكن خليك فاكر إنك لو بتعاني من أي أفكار انتحارية أو أفكار إيذاء النفس فأنت محتاج تستشير دكتور 

يمكن للطبيب أن يساعد في تقديم رعاية فورية ومستمرة.