موضوع يجوعك: شوف هتاكل إيه النهاردة؟

صباح الخير، شربتوا قهوتكم أو نسكافيهكم أو شايكم وفوقتوا خلاص؟! يبقى بدأنا نجوع وبنفكر هنفطر إيه؟! أنتوا جيتوا للمكان المناسب عشان النهاردة هنقترح عليكم 3 وجبات للفطار والغدا والعشا عشان ماتحتاروش كتير..

ندخل في الموضوع عالطول ونبدأ بالفطار… 

هنفطر إيه؟!

“ساندوتش فراخ بالمايونيز”

جربتوا قبل كدة ساندوتش الفراخ بالمايونيز؟! لو مجربتهوش فدي وصفة النهاردة لساندوتش فطار مختلف أو ممكن تاكلوه كتصبيرة على الضهر كدة وكل اللي محتاجينه عشان تعملوه هو الآتي:

(صدر فرخة تقطعوه وتشوحه ع النار وعليه بهارات وأي حركات بتحبهوها وبعدين عقبال ما الفراخ تستوي تعملوا خلطة المايونيز في طبق غويط وهي مايونيز وحبة بصل متقطعين وبقدونس وفلفل أسود، حطوا الفراخ عليهم وقلبوا كله مع بعضه وحطوهم في توست محمص وبالهنا والشفا)

عارفين إننا كروتنا الوصفة بسرعة بس أنتوا شطار وفهمتوا من الصور يعني الخلاصة!

الساندوتش شكله يجوع فعلاً، هنقوم نعمل واحد زيه ونكمل باقي الوصفات..

هنتغدا إيه؟!

طبق الرز بالسجق المشطشط

فطرنا فراخ وده طبعًا شيء غريب مش كله متعود عليه أكيد مش هنتغدا فراخ بقى؟! بالظبط هنتغدا سجق،

والوصفة دي برضه سهلة ولطيفة ومفيهاش اختراعات كتير، الوصفة هتحتاج (سجق إيطالي سبايسي ورز وبصلة حمرا كبيرة وفلفل ألوان أحمر وبصل أخضر وبقدونس وطماطماية وبهارات بابريكا وفصين توم)

الوصفة من شيف رامزي العالمي بس طبعًا مش شرط نمشي على كل الخطوات بالظبط أنتوا وتقديركوا برضه..

في التحضير: لو معندناش سجق سبايسي نبقى نستخدم العادي ونشطشط الأكلة بأي نوع فلفل نحبه..

معانا طاسة كبيرة والأول بنقطع ونشوح البصلة الحمرا مع الفلفل الألوان الأحمر ومعاهم فصين التوم المتقطعين طبعًا وبعد ما يمتزجوا ببعض شوية بنحط عليهم السجق بعد ما بنقطع الغلاف الخارجي له ونحطه يتشوح معاهم وعليهم بهارات البابريكا ورامزي في الوصفة بيستخدم نبيذ أبيض بس  أكيد مش هنعمل زيه يعني..

بعد كدة بنحط عليهم في الطاسة نص كوباية رز وعليها المرقة (الشوربة) ونقلبهم براحة ونتباعهم على نار هادية لمدة من 12 لـ 15 دقيقة وبنقطع على جنب الطماطماية وعيدان البصل الأخضر مش راس البصلة وبقدونس ونضيفهم عليهم في الأخر بعد الـ 15 دقيقة ونقلبهم براحة… وبس بالهنا والشفا.. وطبعا الكمية تزيد أو تقل على حسب ناويين تعملوا الأكلة دي لكام فرد..

هنتعشى إيه؟!

بان كيكس البطاطس!

الفطار والغدا النهاردة كانوا حاجات تقيلة شوية فنتعشى حاجة خفيفة… هنعمل بان كيك بس بالبطاطس وهنحتاج فيها 3 بطاطاسات متوسطي الحجم.. هنبشرهم كويس وننقعهم في مايه لمدة 30 دقيقة وبعدين نشطفهم كويس في صفاية ونبدأ نحط عليهم بقى باقي التوابل والمقادير واللي هم هيبقوا كالآتي:

هنقطع بصلة حمرا متوسطة  ونحطها عليها.. وفوقها قرنين فلفل أخضر صغيرين مشطشطين وعليهم شوية نعناع متقطعين مش كتير ونص معلقة أكل فلفل أسود ونص معلقة جنزبيل ونص معلقة توم مطحون ونص معلقة ملح ونص معلقة كمون وربع كوباية دقيق مطحون أبيض وعليهم كلهم بيضا واحدة ونقلب كل الخلطبيطة دي كويس مع بعضها ودلوقتي هاتوا طاسة مفلطحة وعليها شوية زيت عشان هنعمل البان كيكس..

نبدأ نحطهم في شكل أقراص زي البرجر كدة ونحمرهم ع الهادي لحد ما يستوا كويس من الوشين وبعدين خرجوهم وممكن يتاكلوا مع أي صوص تحبوه كاتشب أو ماسترد أو مايونيز.. وبالهنا والشفا..

كدة خلصنا وصفات واقتراحات لأكلات النهاردة.. بون أبيتي

Related Articles

Back to top button