“امتى نرجع وامتى لأ؟ دليلك لمعرفة هل العلاقة تستحق فرصة تانية ولا اللي راح.. يلا مع السلامة!”
أوقات كتير العلاقات بيكون فيها محطات نقف عندها.. ممكن تكون محطة نهاية وممكن تكون محطة تشحن فيها طاقتك وتكمل الطريق تاني زي ماكنت.. أحيانا بتحصل غلطات وبسببها بتنتهي علاقة استمرت لوقت ما وكانت كويسة فا هل كل غلطة تستاهل فرصة تانية؟ وهل كل شخص يستاهل ياخد فرصة تانية؟
أكيد لأ.. في شوية حاجات لازم تاخد بالك منها وتحطها في الاعتبار عشان تعرف هل العلاقة والشخص يستاهلوا إنك تديهم فرصة تانية وتعمل مجهود وتستحمل حاجات تانية عشانهم.. وموقع “marriage” قال شوية حاجات تاخد بالك منها وهي زي:
أول سؤال بتسأله لنفسك “هتقدر تسامح؟”
المسامحة شيء صحي وخطوة مهمة وكبيرة ليك شخصيا قبل ما نروح للطرف التاني.. إنك تكون قدرت تسامح الشخص ده معناه إنك كده تقدر تعدي المشكلة اللي حصلت وتبقى كويس وساعتها هتشوف انت تقدر تدي مساحة وفرصة تانية للشخص ولا لأ
وهنا بييجي السؤال التاني “هل اعترف بغلطه؟”
بتبدأ تسأل نفسك هو الشخص اللي غلط ده معترف بالمشكلة اللي اتسبب فيها والغلط اللي عمله؟ ولا بيجيب العيب عندك ويبدأ كمان يحملك سبب الغلط ده؟ هل بيلومك إنك شخص حساس؟ هل بيتلاعب بالكلام عشان يعدي الموضوع؟
ولا هو معترف فعلا بغلطه وبيعتذر عن إقتناع وساعتها انت بتقيس ده من طريقة تعامله وكلامه وقتها.
السؤال التالت بتسأله لنفسك وبتقيم فيه نفسك مش الطرف التاني وهو “هل هو ده اللي انت عايزه؟”
هنا الإجابة بتكون مهمة لأن انت ممكن بكل سهولة تكون الذكريات مأثرة عليك والفترات الجميلة اللي قضيتوها مع بعض على الرغم إن الشخص توكسيك أو مش معترف بغلطه أو كمان محملك المسؤولية وانت فعليا ماعملتش أي حاجة..
ماتحطش الأخلاقيات والمعايير قدامك اللي تخليك تتغاضى الغلط اللي قام بيه الطرف التاني أو تتأثر بحكم الناس عشان عارفين إنكم كنتوا مع بعض لفترة معينة فا خايف يبدأوا يتكلموا إنكم سيبتوا بعض لأن كلها حاجات هتخليك تكرر الغلطة الأولى.
أهم نقطة محتاج تاخد بالك منها هي “تصرفات الشخص اللي معاك”
ساعات الناس بتجمل الكلام وتذوقه عشان توصل للحاجة اللي هي عايزاها بس.. مابيكونش الكلام مقصود وطلع من قلب الشخص ونيته سليمة بالعكس..
فا انت محتاج تركز وتشوف الشخص تصرفاته بتقول حاجة إيجابية ونية سليمة ولا هو نن الآخر بيحور عليك وبيستغل إنك هتصدقه؟
السؤال الرابع “هل هنلتزم؟”
بتسأل نفسك وبتسأل الشخص اللي معاك هل انتوا الاتنين هتلتزموا تخلوا الموضوع ينجح مع بعض؟ هل هيكون في تواصل كويس وامتنان واحترام وتسيبوا مساحة للمشاعر الحقيقية تظهر والتساؤلات بتاع الخطوة الجاية هتكون فين وهنوصل لإيه بعدها وهكذا.. كل ده بتحطه في اعتبارك عشان ترجع العلاقة بشكل صحي ومناسب ومش مرهق نفسيا
في النهاية إنك ترجع علاقة انتهت مرة تانية مش حاجة سهلة إطلاقا فا انت لازم تحط في اعتبارك إن في مجهود هيتعمل عشان الثقة تتبني وترجع تاني وإنك هتحتاج تصبر شوية على النتيجة وتشوف في كل خطوة محتاجين تتصرفوا إزاي وتعدوها إزاي عشان ترجعوا تاني!
