بمناسبة يومهم العالمي.. حاجات مينفعش تعملها أو تقولها لذوي الهمم

3 ديسمبر من كل سنة، بيكون يوم مخصص للاحتفال باليوم الدولي للأشخاص ذوي الإعاقة واللي تم اعتماده من الجمعية العامة للأمم المتحدة، بيكون الهدف من يوم زي ده هو فهم الإعاقة باعتبارها جزء من الإنسان سواء كانت مؤقتة أو دائمة.. ليه اليوم ده مهم جدا كده؟

تقديرات منظمة الصحة العالمية بتقول إن في أكتر من مليار شخص يعني 15% تقريبا من سكان العالم بيعانوا بشكل أو بآخر من أشكال الإعاقة.. ولذلك في حاجات محتاج تعرفها عن إزاي تتعامل مع شخص من ذوي الهمم أو حاجات ماينفعش تقولها ممكن تبان لك بسيطة وعادية ولكن هي العكس بالنسبة له.. فا في كذا موقع زي “cosmopolitan” وموقع “theabilitypeople” وموقع “wecapable” وموقع “aruma” بيقولولنا نتعامل ونقول إيه في المواقف اللي زي دي:

– ماتسألش عن سبب الإعاقة، ممكن تكون مهتم إنك تتعرف على الشخص ده ولكن ماينفعش في أول مقابلة، لإن هو هيحس إنك أول حاجة لاحظتها فيه هي الإعاقة، وحتى بعد ما تعرف الشخص بفترة طويلة ممكن يكون مش حابب يتكلم عنها، وممكن ناس تانية تكون متقبلة الكلام عن الإعاقة، اللي هيحدد ده كلام الشخص معاك لو هو فتح مجال للكلام أو إداك تلميح.

– فكرة إنك تقوله أنا أعرف دكتور كويس هيساعدك أو يحل لك مشكلتك ده مش هيكون شيء ظريف، لإن هو ممكن يكون عارف دكاترة كتير متخصصين ، وكمان أنت كده بتقوله بشكل غير مباشر إنه عنده مشكلة ومحتاجة تتصلح، جزء كبير جدا من ذوي الإعاقة متعايشين معاها ومش شايفينها حاجة سلبية، ممكن تكون نيتك كويسة أو بتحاول تساعد أو تشوف ده كلام عادي، بس هو بالنسبة للطرف التاني مش ألطف حاجة.

– في الوطن العربي عندنا جملة بنستخدمها دايما زي “هو كذا بس طيب أو هي كذا بس جميلة”، البشر كلهم جُمال وحلوين على فكرة، مافيش حاجة اسمها هو كذا بس حلو، وكذلك أي شخص من ذوي الإعاقة هو جميل وإعاقته مش هتنقص منه حاجة، فماينفعش بأي حال من الأحوال تشوف شخص من ذوي الهمم وتقوله أنت كذا بس جميل ولا حلو.. لإن إعاقته مش بتغير فيه حاجة.

– جميل إنك تكون بتحب تساعد كل الناس، بس مع الأشخاص ذوي القدرات الخاصة، حاول ماتساعدش إلا لو الشخص طلب، ولو حابب تعرض اعرض وتقبل الرفض عادي ماتحسش إنها إهانة يعني، لإن الشخص ده ممكن يكون متعايش مع إعاقته بقاله فترة فبيقدر يتعامل في أي موقف أو أي حاجة.

– لو شخص أصم، ماتتكلمش معاه كأنك بتكلم طفل عنده شهرين وتقعد تدلع الكلمات والجمل، اتكلم بشكل عادي جدا ولكن خليك محافظ على إن حركة شفايفك تكون ظاهرة لإن ممكن يكون بيعتمد على قراءة حركة الشفايف، ولو ماقدرتش توصل معلوماتك حاول تشوف طريقة تانية توصلها بيها.

– مافيش شخصين معاقين شبه بعض، ومش كل المعاقين على سبيل المثال بيستخدموا كراسي متحركة ولذلك ماينفعش تقول لشخص “شكلك مش معاق”.

– الأفورة مش مطلوبة في الوقت ده، يعني شخص من ذوي الإعاقة فتح باب الأسانسير وخرج منه مش إنجاز عليه عشان تقوله برافو عاش، بالعكس خلي الكلام ده لو هو عمل إنجاز قوي أو حقق حاجة كان نفسه يعملها، تخيل أنت عشان عملت كوباية شاي تلاقي باقي العائلة بتسقفلك على حاجة مملة يعني.

– لو شخص ولد بإعاقة، فهو متعايش معاها من سنين كتير، فماتفترضش عليه وتقوله “أكيد حياتك صعبة أو موضوع صعب عليك” بالعكس.. ذوي الإعاقة بيكونوا شاطرين في حل المشاكل على فكرة، حتى لو بيعملوا أي حاجة بطريقة مختلفة ده مش معناه إن الحياة صعبة، فمش هتكون أظرف حاجة تقولها لشخص “أكيد الحياة صعبة بالنسبالك”.. صح؟

– ذوي الاحتياجات الخاصة مش عاملين نادي سري زي فيلم Fight Club، فمش ضروري تقوله أنا عندي قريبي أو فلان من ذوي الاحتياجات الخاصة زيك وتعرفه عليه.. مش لازم تماما يعني.

– لو بتتعامل مع شخص مصاب بالتوحد، ماتسألوش هل عندك قدرات خاصة؟ لإن كده غالبا أنت معلوماتك عن التوحد تتلخص في المسلسلات والأفلام، مش أي شخص مصاب بالتوحد ممكن يكون عنده قدرات خاصة في حاجة ما.

– أي شخص من ذوي الاحتياجات الخاصة هو إنسان عادي، فماينفعش تقول أنا بشوفك إنسان طبيعي وعمري ما شوفتك من ذوي الإعاقة.. أيوة أكيد لإنه في النهاية إنسان برضه، قد تكون نواياك كويسة بس الجملة نفسها مش كده، لإنك بالشكل ده بتقوله إن أي شخص من ذوي الاحتياجات الخاصة هو مش طبيعي أو مش إنسان.