١٥ معلومة غريبة ماكنتش تعرفهم عن الأكل: الجبنة أكتر أكل بيتسرق في العالم

اختلفت أراء الناس في الحاجات اللي شايفين إنهم استحالة يقدروا يعيشوا من غيرها، فيه منهم العاطفي اللي شايف إنه مايقدرش يعيش من غير حب، والعملي اللي شايف إنه مايقدرش يعيش من غير أكسجين، واللي همه على بطنه وشايف إن الحياة ماتنفعش من غير أكل، لإن هو الوقود البشري الحقيقي.

ويمكن بالنسبة لهم الأعياد اللي فيها احتفال بالأكل هي الأعياد الحقيقية، ويوم 16 أكتوبر كل سنة هو يوم الأكل العالمي، وبالمناسبة دي حابين نقولكوا أغرب 15 معلومة ممكن تعرفهم عن الأكل في اليوم العالمي للأكل حسب ما قال موقع “BoredPanda”:

1- أكتر أكل بيتسرق على مستوى العالم هي الجبنة:

يمكن دي أغرب معلومة عن الأكل في العالم، بس الجبن هى أكتر الأكلات اللي بتتسرق في العالم، وبيتسرق حوالي 4% من الجبن المصنوعة في العالم، لدرجة إن فيه سودا للجبن المسروقة.

2- الموز من ضمن فصيلة التوت، والفراولة لا:

علماء النباتات قالوا إن الموز والخيار والكيوي على إنها توت، ولكن الفراولة والتوت البري والتوت الأزرق والتوت البري مش من ضمن فصيلة التوت، ودي حاجة تلخبط وتخليك تسأل وتتأكد من معلوماتك من جديد.

3- السلطعون والمحار كان أكل الطبقة العاملة:

الأكلات اللي الناس بتدفع فيها فلوس كتير دلوقتي وممكن تأكلها أول ما تقبض بس كانت بتعتبر في الأول غير جديرة بالاستهلاك البشري، وكانوا بيعتبروا السلطعون حشرات بحرية فكان صعب تتباع أصلا، وكانوا بيرموهم في البحر تاني أو بيدوها للخدم، ولكن كل حاجة اتغيرت مع الوقت.

4- وسيا اعتبرت البيرة من ضمن الكحوليات من سنة 2011 بس:

في روسيا قبل سنة 2011 ماكنش بيتم تصنيف أي مشروب فيه كحول أقل من 10% أو البيرة من ضمن الكحوليات وكان بيتم تصنفها إنها مشروب غازي، ولكن تم تصنيفهم من ضمن الكحوليات للحد من بيعهم والتحكم في القصر وقضايا الشرب.

5- لو حطيت مجموعة كبيرة من الفستق مع بعض ممكن يتحرق لوحده:

المواد الليفية الزيتية اللي بتبقى موجودة في الفستق ممكن تتسب في اشتعال النار، عشان كده خد بالك لو سايب كمية كبيرة من الفستق على بعضه.

6- الملصقات اللي على الفاكهة صالحة للأكل:

لما بتاكل الفاكهة من غير ما تاخد بالك إن عليها “ستيكر” وبتقطم حته منه بتتخض وتقرف، لكن بعد كده خلاص ماتتخضش، لإن الملصقات دي غير سامة وصالحة للأكل، لكن مش معنى كده إنك لازم تاكلها.

7- الأكل الصحي مكلف 10 أضعاف الأكل السريع:

ودي واحدة من الحقايق السلبية الموجودة بالفعل، بريطانيا بتواجه أزمة سمنة وعشان السبب ده حصل مناقشات وندوات أسفرت عن إن فعلا الأكل الصحي أغلى من الأكل الجاهز السريع، فلو كنت بتسأل ليه فيه أزمة سمنة فدي أسباب الأزمة الحقيقية.

8- اختراع السندوتشات جيه بالصدفة:

السندوتشات كاختراع أظهرت قد إيه البشر كائنات ذكية وإن الحاجة أم الاختراع، والحكاية ورا الساندوتشات هي إن كان فيه شخص اسمه “جون مونتاجو” كان بيلعب قمار لمدة 24 ساعة وكان جعان وماكنش عايز يسيب كروت الكوتشينة على جنب، فطلعت الفكرة بتاعت الساندويتش، لكن لحد دلوقتي مانعرفش هو صاحب الفكرة وهو اللي نفذها ولا حد من موظفينه.

9- ماينفعش تسوي المشروم أوي:

بعد ما تعرف المعلومة دي مالكش عذر لو بوظت أي أكله، فبلاش تسوي المشروم أوي لإن المشروم فيه مواد كيميائية في خلاياه بيبوظ لو استوى زيادة، فلو زاد منك في السوى بعد كده خليك عارف إن العيب مش في المشروم والعيب في طبيخك.

10- الفلفل الأسود كان رفاهية في العصور الوسطى:

الفلفل الأسود في العصور الوسطى كان غالي جدا وكان فيه رجل برتغالي اسمه ” فاسكو دي جاما” أول واحد بيبحر حوالين افريقيا عشان يوصل للهند وكانت مهمته البحث عن التوابل.

11- ربع حبات البندق في العالم بيُستخدم في صنع النوتيلا:

النوتيلا بقيت علامة تجارية مشهورة لدرجة إن 1 من كل 4 حبات بندق في العالم بتشق طريقها عشان تدخل في تكوين النوتيلا، وبيتم استهلاك البندق كتير لدرجة إن الجامعات حاليا بتحاول زراعته في المعامل لمحاربة النقص العالمي.

12- المزيكا العالية بتخليك تشرب أكتر:

ده كان استنتاج من دراسة اتعملت في فرنسا وكان هدف الدراسة إزاي البيئة المحيطة بتأثر على عاداتنا في الشرب وبتشجع أصحاب البارات إنهم يفكروا إن الأجواء العامة هي اللي بتساعد الناس على الإفراط في الشرب.

13- من غير الدبان مش هيبقى فيه شوكولاتة:

فكر تاني بعد كده لما تيجي تضرب وتقتل دبانة، لإن فيه نوع من الدبان اسمه الدبانة المجهرية اللي بتلقح نبات الكاكاو وده اللي بيصنع الشوكولاتة.

14- الكميات اللي بتتاكل من الـ”هوت دوج” في يوم 4 يوليو ممكن تمتد من واشنطن لـ”لوس أنجلوس” 5 مرات:

يوم 4 يوليو هو يوم الاستقلال في أمريكا، وبالنسبة لأي حد مايعرفش مساحة أمريكا فالمسافة دي تعتبر حوالي 36 يوم مشي من غير توقف، وعشان تعمل كده 5 مرات ده هياخد نص سنة تقريبا.

15- فيه ساندويتش لحم بقري راح في رحلة للفضاء سنة 1965:

رائد الفضاء “جون يونغ” هرب ساندويتش لحم بقري على سفينة الفضاء اللي كان طالع فيها لمهمة خدت وقت 6 ساعات، ولكن أداء الساندويتش ماكنش كويس في انعدام الجاذبية، وعشان كده رجعه تاني رائد الفضاء في جيبه على طول، وكان ممكن ده يتسبب في عواقب كبيرة لإن الفتافيت كانت ممكن تسبب في عطل المكوك، لكن لحسن الحظ رجعوا بالسلامة، وبعد كده ناسا بقيت تتأكد إن محدش هيطلع الفضاء بساندويتشات تاني.

Related Articles

Back to top button