بمناسبة يوم افتتاحه.. شوية معلومات عن شارع المعز “المحور الرئيسي للقاهرة التاريخية”

شارع المعز من أشهر الشوارع في القاهرة وفي مصر كلها وكمان من الأماكن الأثرية المشهورة.. موجود في منطقة الأزهر بحي وسط القاهرة وكونه مكان أثري خلاه كمان مكان سياحي للناس تزوره ومش بس كده ده كمان يعتبر سوق تجاري بيجيله آلاف الناس يوميًا.. فتعالوا نشوف سوا ايه هو تاريخ شارع المعز وشوية معلومات عنه..

حسب egyptiangeographic بيرجع تاريخ عمله لسنة 969م يعني من وقت إنشاء مدينة القاهرة اللي بناها المعز لدين الله الفاطمي.. في شماله موجود باب النصر وباب الفتوح أما في الشرق شارع الدراسة والجنوب شارع باب الوزير ومن الغرب شارع بورسعيد.. اتسمى نسبة للخليفة الفاطمي المعز لدين الله أول الخلفاء الفاطميين في مصر وهو اللي أرسل جوهر الصقلي لفتح مصر سنة 969م

وموجود فيه مناطق كتير.. دول شوية منهم:

1- باب الفتوح وباب النصر

دول يعتبروا بداية الشارع والمسافة بينهم مش كبيرة.. باب الفتوح يعتبر أحد بوابات أسوار القاهرة التاريخية 

2-باب النصر

واحد من أشهر 3 أبواب للقاهرة واسمه كده عشان ده الباب اللي كان بيدخل منه الجيوش لما ترجع من معركة وهي منتصرة واتقال عليه “باب العز” بس الناس لحد دلوقتي بتقوله بإسمه الأصلي “النصر”

3- باب زويلة

نهاية شارع المعز من ناحية الجنوب وبناه “بدر الدين الجمالي” وزير القائد الفاطمي وأشهر حاجة عنه تعليق رؤوس الرسل اللي بعتهم هولاكو قائد التتار عليه.. الاسم نسبة لقبيلة زويلة ودي واحدة من قبائل البربر اللي جت من شمال أفريقيا

4- بيت السحيمي

موجود في الجمالية بحارة الدرب الأصفر.. وأشهر حاجة عنه إنه بيمثل عمارة القاهرة في العصر العثماني وبيعبر عن الهوية المصرية وفنها

5- المدرسة الأشرفية

من أعظم المدارس المملوكية وبتعبر عن عصر من أزهى عصور الإسلام 

6- جامع الأقمر

حجارته باللون الأبيض وأمر ببناءه أبو علي المنصور وده من أصغر مساجد القاهرة ومستواه منخفض عن الأرض وميزته إن واجهته معموله بشكل هندسي مختلف 

7- جامع المؤيد

أشهر حاجة فيه إنه معمول بالرخام من جميع الألوان وجاي من أماكن مختلفة وموجود فيه منارتين توأمتين فوق باب زويلة 

8- مجموعة قلاوون

تعتبر من أقدم المجموعات المعمارية الإسلامية اللي لسه موجودة في القاهرة.. وأكبر ميزة فيها إنها ليها قيمة أثرية وفنية وفيها تنوع كبير في التخطيط والتصميم والفنون الزخرفية

حسب البوابة الالكترونية لمحافظة القاهرة شارع المعز بيتقال عليه “الشارع الأعظم” أو “القصبة الكبرى” وده عشان فيه مناطق كتير مهمة زي النحاسين وخان الخليلي والصاغة وشارع جوهر “الموسكي” وشارع الأزهر وبيمتد لمنطقة الغورية والفحامين وبعدين زقاق المدق والسكرية وينتهي عند باب زويلة.. كمان في شخصيات تاريخية عاشت فيه زي صلاح الدين الأيوبي واتولد فيه نجيب محفوظ ده غير الآثار اللي موجوده وبترجع لعصور تاريخية مختلفة من أول العصر الأيوبي والعصر المملوكي البحري والشركسي وبعدهم العثماني وعصر محمد علي 

في النهاية أهمية الشارع بتظهر في حاجات كتير زي الأماكن والآثار والمزارات السياحية وفيه كتير وكتير من المنشآت اللي بتعبر عن طابع الزمن اللي اتعملت فيه وكمان عن الثقافات وقتها وبتنقل الرسايل اللي كانت موجوده وده يبين قد إيه هو مكان مهم..