في ذكرى ميلادها.. أشهر الأفلام اللي اتعملت عن روايات أجاثا كريستي
النهاردة ذكرى ميلاد الكاتبة والروائية الإنجليزية أجاثا كريستي، واحدة من أعظم مؤلفي الروايات البوليسية في القرن العشرين، واللي تم تصنيفها إنها “ملكة الكتابة في الجريمة”، واترجمت أعمالها ورواياتها لأكتر من 100 لغة حول العالم، وباعت أكتر من مليار نسخة، ونجوميتها وشهرتها موقفتش عند الكتابة والروايات بس لكن كملت كمان لعالم السينما بعد ما تحولت أعمال كتير من رواياتها لأفلام سينمائية حققت شهرة عالمية كبيرة.
ومن ضمن الأفلام دي:
فيلم Murder on the Orient Express
الفيلم صدر في 2017 عن روايتها المشهورة “جريمة في قطار الشرق السريع”، اللي كتبتها سنة 1935، وقصة الرواية-الفيلم بتدور عن جريمة قتل حصلت لرجل غني أمريكي بسبب طعنات كتير في الصدر، وقت سفره في قطار الشرق السريع، واحد من أشهر القطارات في العالم، وبنشوف قصة التحقيق مع ركاب القطر من المحقق البلجيكي المعروف “هركيول بورو”، علشان يوصل المحقق إن كل ركاب القطر لهم مصلحة في قتل الضحية.
فيلم Death on the Nile
فيلم “جريمة على نهر النيل”.. فيلم تم انتاجه سنة 1978، ومبني على رواية أجاثا كريستي بنفس الاسم وبتدور أحداثه على باخرة رايحة من الأقصر لأسوان، وكان في الرحلة دي المحقق “هركيول بورو” ولقى نفسه قدام جريمة قتل ضحيتها بنت كانت في الرحلة مع جوزها في شهر العسل، وفي الوقت اللي افتكر فيه المحقق إنه سهل يلاقي القاتل، اكتشف برضه إن كل ركاب الباخرة عندهم دوافع كافية علشان يقتلوا الضحية.. والفيلم اتعمل منه إصدار جديد سنة 2022.
فيلم Murder She Said
فيلم تم انتاجه سنة 1961، عن رواية “قطار 4.50 من بادنجتون” واللي بتدور قصته عن رحلة الآنسة “ماربل” بالقطار، وبتشوف من شباك القطر رجال بيخنق ست، فتتصل بالشرطة بس ميكونش معاها أي دليل يدعم قصتها، فالشرطة بتتجاهل البلاغ، فبتقرر ماربل مع صاحبها إنهم يوصلوا للقاتل ويعرفوا خبى الجثة فين.
فيلم Crook’d House
وده عن الرواية الأقرب لقلب أجاثا كريستي، والفيلم اتعرض في 2017.. بيحكي قصة “صوفيا” اللي راحت للمحقق “تشارلز هايوارد”، الإكس بتاعها، علشان تطالبه بالتحقيق في وفاة جدها علشان هي معتقدة إنه اتقتل من فرد من أفراد عيلتها.. وبنعيش معاهم قصة التحقيق في القضية.
فيلم The Mirror Cracked
فيلم سنة 1980.. بتدور أحداث القصة في قرية صغيرة، لما شركة إنتاج سينمائي قررت تعمل فيلم من بطولة “مارينا رود” لكن بتتفاجي مارينا إن البطلة اللي معاها في الفيلم هي منافستها “لولا برويستر”، فبتضايق جدا وبتقرر متكملش تصوير الفيلم، بس بيجيلها تهديد بالقتل ، ومدبرة المنزل بتاعها بتتقتل، بعد ما شربت مشروب كان معمول لمارينا.. ومنعا للحرق.. مش هنقدر نحكي أكتر من كده.
