في يومه العالمي.. أشهر الأفلام اللي ناقشت مرض ألزهايمر
يوم 21 سبتمبر كل سنة بيكون اليوم العالمي لمرض ألزهايمر، والقصة بدأت من سنة 1984 في واشنطن لما مجموعة من الخبراء في مرض ألزهايمر قدموا رؤية هدفها: “حياة أفضل للأشخاص اللي بيعانوا من الخرف وذويهم”.
الألزهايمر بيعاني منه حوالي 35 مليون شخص في العالم ومتوقع إن العدد ده يرتفع لـ 115 مليون شخص في سنة 2050 حسب تقديرات الجمعية الألمانية للزهايمر.
وبمناسبة اليوم ده قررنا نشارك معاكم مجموعة من الأفلام العالمية والمصرية اللي ناقشت مرض ألزهايمر بزوايا مختلفة وعجبت الجمهور والنقاد ونقلت جزء ولو بسيط من معاناة مرضى ألزهايمر وعائلاتهم.
فيلم The Father:
الفيلم صدر في 2020.. وهو بيحكي رحلة مريض ألزهايمر “انتوني” اللي بيقوم بدوره الفنان العالمي “أنتوني هوبكينز”، وببنعيش معاه رحلته وبنشوف كل حاجة من وجهة نظره، وهو بيحس وبيشوف إيه.
“أنتوني” عنده 80 سنة، بيعيش لوحده، وبنته “آن” بتزوره يوميًا، وبيرفض وبيتحدى أي مقدمي رعاية بنته بتجيبهم البيت عشان يساعدوه، وهي بتعاني معاه وبتكون محتاجة حد يساعدها لأنها مبقيتش قادرة على الزيارات اليومية وخصوصا مع مرض أبوها وعدم إدراكه أو معرفته حتى إنه مريض.
بنعيش من خلال الفيلم رحلة ذكريات “أنتوني” اللي محدش عارف إيه الصح فيها وإيه الغلط، وبنشوف الدنيا من خلال نظرته للأمور وكل اللي بيحس بيه وبيشوفه، وبنعيش معاه التخبط واللخبطة وعدم الفهم.
أنتوني هوبكينز فاز بأوسكار أفضل ممثل في 2021 عن دوره في الفيلم، والفيلم فاز بأوسكار أفضل سيناريو مقتبس.
فيلم Still Alice:
الفيلم صدر في 2014.. “أليس هاولاند” اللي بتقوم بدورها “جوليان مور” بتعيش حياة هادية وسعيدة وعندها 3 أطفال، وهي أستاذة لغويات معروفة وشخصيتها قوية ومستقلة، بس فجأة بتبدأ تنسى الكلمات والحروف وبتبدأ تعاني من نسيان بعض الأحداث في حياتها، وبيتم تشخيص حالتها بمرض ألزهايمر، وبنشوف رحلتها في تغيير نظام حياتها وإنها بتحاول تتمسك بكل لحظة صغيرة من حياتها وتعيشها.
و”جوليان مور” فازت بأوسكار أفضل ممثلة سنة 2015 عن دورها في الفيلم.
فيلم Iris:
الفيلم صدر في 2001.. وهو عبارة عن سيرة ذاتية للكاتبة الأيرلندية البريطانية “إيريس مردوخ”، واللي بتقوم بدوها “كيت وينسليت” وهي صغيرة و”جودي دينش” وهي كبيرة، وعلاقتها بجوزها اللي بيحبها وبتحبه، وزميلها الكاتب “جون بايلي” اللي قابلته في أكسفورد، والفيلم بيسلط الضوء على معركتها مع مرض الزهايمر في نهاية حياتها
الرومانسية مع جوزها اللي استمرت من أيام دراستهم ولحد معركتها مع مرض الزهايمر.
أما بالنسبة للسينما المصرية فكان أشهر فيلم اتكلم عن المرض هو
فيلم زهايمر:
فيلم زهايمر من بطولة عادل إمام وصدر في 2010.. الفيلم بيبدأ بمحاولة ولاد محمود شعيب اللي هو “عادل إمام”، إنهم يوهموه إنه مريض بألزهايمر، عشان يكسبوا قضيتهم في المحكمة ويتصرفوا في ممتلكاته، بس هو بيكتشف مؤامرتهم، وبيبدأ يخدعهم بأنه مريض فعلًا بألزهايمر، ويعمل فيهم مقالب.
لكن أكتر حاجة علّمت مع المشاهدين واتأثروا بيها إن صاحب عمر محمود اللي بيقوم بدوره “سعيد صالح” كان عنده ألزهايمر فعلا وعادل إمام راح يزوره وعملوا مشهد قوي ومؤثر جدا، يكاد يكون المشهد الوحيد في الفيلم اللي سلط الضوء على الزهايمر بجد.
فيلم بتوقيت القاهرة:
الفيلم صدر في 2015.. من بطولة نور الشريف وميرفت أمين وسمير صبري ودرة. وده كان آخر الأعمال اللي شارك فيها نور الشريف قبل وفاته.
الفيلم بيحكي مجموعة من القصص كانت أشهرهم قصة يحيى شكري اللي هو “نور الشريف” وهو راجل مسن عايش في إسكندرية مع ابنه وبنته.. ويحيى بيتشخص بمرض ألزهايمر وده بيسبب له احراج ومشاكل لأنه بيبدأ ينسى عنوان بيته وينسى ولاده، وكان محتفظ بصورة لـ ست بس مش قادر يفتكر هي مين، بس بيحس إنه بيحبها وبيقرر يسافر للقاهرة يدور عليها رغم اعتراض ولاده على اللي هو بيعمله.
