ليه الخريف أحلى فصول السنة؟

فصل الخريف بيبدأ من 21 سبتمبر وبينتهي 21 ديسمبر وبغض النظر عن إن بدايته في شهر سبتمبر بتبقى ريحتها مدارس وسندوتشات جبنة شوية إلا إنه الروايح دي بتبدأ تختفي مع أول أكتوبر وبيبان الجانب المشرق منه.

قليل أوي لو لقيت شخص مابيحبش فصل الخريف.. فلو أنت بتحبه أو مابتحبهوش هنقولك ليه يتحب وليه هو أحلى فصول السنة على الإطلاق:

1- هتشوف ألوان حلوة طول الوقت:

ألوان الشجر بتتحول للون برتقاني وأحمر وأصفر وصوت وقوع أوراق الشجر اللي بيدبل بيبقى ولا المزيكا الحلوة وخصوصا بقى لو دوست عليه وأنت ماشي في جنينة.

2- بيرحمنا من خناقات كتير:

خناقة الصيف أحلى ولا الشتا أحلى اللي كلنا عارفينها دي بتختفي في الوقت ده من السنة، الجو أغلب الوقت مظبوط، لو الجو حر شوية صغيرين بس الصبح بليل هيبقى هوا ومنعش وجميل واحتمال تحتاج جاكيت خفيف كمان.

3- أحسن وقت تفكر فيه:

لوعندك أي مشاكل أو حاجات مأجلها بقالك فترة هتلاقي نفسك بتتسحل فيها في الخريف، ويمكن السبب لإن الصيف الدوشة والزحمة بيبقى خلص خلاص، ولسه برضه الشتا اللي بيسحبك تتدفى وتقعد تحت الغطا وتروح في النوم طول الوقت بيبقى مابدأش.

4- ممكن تلبس أحلى هدوم فيه:

تقدر تلبس اللبس الصيفي اللي بتحبه وبرضه لو عندك لبس شتوي ممكن تبدأ تلبسه بداية من نص أكتوبر كده وهيبقى من غير ما تحط تحته طبقات من الهدوم أو تلبس فوقه جاكيت أو “كوت”.

5- أحلى وقت للسفر:

أيا كانت المدينة اللي هتسافرلها سواء كانت مصيف أو مشتى هتتبسط فيها، هتقدر تنزل البحر الصبح وتتبسط بكل الأنشطة من غير لا رطوبة ولا مطرة تبوظ عليك اليوم.

6- فاكهة الخريف:

عند الأجانب بيتبسطوا أوي بقرع العسل في الوقت ده، بس في مصر ده موسم الجوافة والبلح الأسود والتين والتفاح والرمان كمان لعشاق الرمان.

7- هتعرف تظبط جسمك فيه:

إحنا عارفين إن دخلة الشتا بتبقى غير مشجعة لظبطة الجسم بس هتلاقي نفسك قادر تمارس رياضة لو عايز، لإنك ولا حران ومفرهد ولا سقعان وكسلان، ده غير إنك مش هتبقى جعان أوي زي الشتا ولا عايز تاكل آيس كريم وتشرب حاجات ساقعة بس زي الصيف.

8- بتسمتع بالشباك والبلكونه:

بنعرف قيمة الشباك والبلكونه في الفصل ده، لو فتحت الشباك الصبح الشمس بتبقى داخلة الشقة وبتحسسك بالحيوية والإشراق والدفى، وبليل بتجيلك منه نسمة هوا رايقة وأنت قاعد بكوباية شاي أو أي حاجة سخنة وتسمع أم كلثوم أو أي أغاني رايقة.

9- أنسب وقت لدخول العلاقات:

في الخريف خصوصا بليل بتحس إن عندك مشاعر وبتحس، ومش زي الشتا برضه اللي بيخليك ماشي تحب على روحك، فلو دخلت علاقة في الخريف اعرف إن ده عشان بالك رايق وقادر تفكر حلو وعندك مشاعر برضه فواخد “ميكس” العقل والقلب.