١٠ أسباب بتخلي الست تتشد للرجالة الأكبر في السن

فيه مقولة شهيرة بنقولها دايما عن البنات إنهم بينضجوا فكرياً قبل الرجالة، ودي اللي دايما بتخلي البنات ترتبط برجالة أكبر منها في السن، بس فرق السنتين أو الـ 3 أو الـ 5 بيعتبر فرق مناسب أو عادي، لكن فيه بنات كتير الرجالة اللي أكبر منها بفرق كبير في السن بيشدوهم، وعشان كده هنقولك الأسباب اللي بتخلي البنات تتشد للرجالة اللي شعرهم أبيض او في أقوال آخرى الـ “شوجر دادي”:

1- ناضجين أكتر:

وده عشان زي ما قولنا إن البنات بتنضج فكرياً قبل الرجالة، والسبب في ده إن الرجالة وهما صغيرين بيبقوا لسه عايزين يجربوا حاجات مختلفة ومش قادرين يدخلوا علاقة بجد، لكن الرجالة الأكبر في السن الستات بتكون واثقة فيهم أكتر لإنهم بيبقوا مستعدين للالتزامات والمسؤوليات، وبيبقى محتمل خلاص إنهم عايزين يستقروا.

2- عندهم معرفة بالأمور أحسن:

كلنا عارفين إن كل ما الواحد يكبر كل ما بيبقى أعقل وحكيم أكتر، ده غير إن الرجالة الأكبر في السن بيبقوا أكتر ذكاء والسبب هو تجارب حياتهم الأوسع، وأكدت ستات كتير على النتيجة دي وقالوا إن الرجالة الأكبر في السن عدوا بتجارب كتير في الحياة وعلمتهم دروس وأي حد يقدر يشوف ده من خلال مناقشتهم.

3- عارفين هما عايزين إيه:

وفيه صفة تانية بيقولها الستات عن الرجالة الأكبر في السن إن حياتهم بتبقى أقل في الفوضى وده اللي بيخلي حياتهم مستقرة أكتر، لإنهم بيبقوا عارفين بالظبط هما عايزين إيه وإزاي يوصلوا للي عايزينه.

4- مستقرين مادياً:

أغلب الستات بيبقوا عايزين الأمان المادي، وعايزين يتأكدوا إن الراجل اللي معاهم قادر يقدم الدعم المادي الكفاية اللي بتحتاجه هي وأطفالها وبيتها، وطبعا بحكم كل حاجة فالشباب الأصغر في السن بيبقوا محتاجين يطوروا نفسهم في الشغل عشان مرتباتهم تزيد وعشان يظبطوا حياتهم في البداية بالإضافة كمان إن العيلة مش في المقام الأول عندهم، الفلوس والشغل هما الأول.

5- بيبقوا شركاء:

الحب الناضج بيبقى عبارة عن صبر وثقة ورعاية وأوقات استقلال أكتر من أي حاجة تانية، والشباب عموما معروف إن عقليته بتتمثل في جملة “كل حاجة أو ولا حاجة” وبيبقى عندهم عواطف ومشاعر كبيرة بتخليهم يمارسوا أدوار ذكورية على الستات ولكن الستات بيحترموا الراجل اللي بيحسسهم إنه شريكهم مش محور مدار الكون وكمان مابيحبوش حد يقولهم يعملوا إيه أو مايعملوش إيه، وعشان كده بيقدروا المساواة أكتر من التحكم.

6- ماعندهمش مشكلة يساعدوا شريكتهم في كل حاجة في البيت:

الستات دايما بيحتاجوا اللي يساعدهم في شغل البيت وغالبا الرجالة الأكبر في السن ماعندهمش مشاكل في مساعدة شريكتهم أكتر من الصغيرين في السن، زي إنهم ممكن يشيلوا الأطباق بعد الأكل أو إنهم يغسلوا هدومهم لنفسهم، هو اه ده مايعتبرش كل حاجة بس اهو بيساعد يعني.

7- بيعرفوا إزاي يتعاملوا مع الستات:

أغلب الرجالة الكبيرة في السن بيبقوا عارفين إيه اللي ممكن يخلي الحب ينجح أو يفشل وده بيميزهم  أكتر ده غير إنهم بيقوا عارفين الست اللي معاهم محتاجة إيه وده اللي بيخلي الست سعيدة، وكمان بيتجنبوا المشاكل اللي عدوا بيها قبل كده.

8- شخصيتهم جذابة:

الرجالة الكبار في السن عندهم جاذبية مختلفة من نوعها زي مثلا التجاعيد اللي بتبقى جنب عنيهم أو شعرهم الأبيض في أسود زي مابيقولوا عليه (ملح وفلفل)، ده غير إن ليهم طريقة معينة في تقديم نفسهم وأغلب الستات بيعجبهم الطريقة اللي بيتكلموا ويضحكوا وبيتصرفوا بيها، ده غير كمان إن بيبقى ليهم طريقة فريدة في لبسهم لإن الموضة الجديدة مابتشغلهمش.

9- مابيدوروش على الدراما:

واقعياً الستات كائنات عاطفية جدا، أوقات كتير بيبالغوا وبيتصرفوا من غير تفكير، عشان كده مهم بالنسبة للست إن يبقى جنبها راجل يتصرف هو بدالها لما ماتقدرش، وغالبا الرجالة الأكبر في السن عندهم المهارة دي، وبنعتقد كده إن الرجالة الكبيرة في السن مابيدوروش على الدراما والصراعات والجدال على المشاكل العادية، ولو فعلا فيه مشكلة هيقعدوا ويتكلموا فيها مع الطرف التاني لحد ما يوصلوا لحل.

10- بيوفروا الشعور بالأمان:

الأمان هو واحد من الاحتياجات الأساسية زي ما ذكر هرم “ماسلو” للاحتياجات، وأغلب الحاجات اللي قولناها فوق هي اللي بتخلي الست سعيدة وفي أمان، محتاجة فلوس ومحتاجة شريك تبقى واثقة فيه يكمل معاها حياتها، ومحتاجة تبقى عارفة حياة الشخص اللي معاها هتمشي إزاي.

وغالبا واضح كده إن الرجالة الأكبر في السن هما اللي هيقدروا يوفروا للست كل الحاجات دي، وهيخلوها تحس بالأمان كمان.

Related Articles

Back to top button