ليه الطبخ بيحسسنا بالسعادة والرضا؟

ناس كتير لما بتعمل أكل أو بيطبخوا بيحسوا بنوع من أنواع الراحة أو السعادة أو الرضا أو كل ده مع بعض.. يا ترى ده بيكون سببه إيه؟ 

في موقع Mind Food، اتكلمت دراسة في المجلة الدولية للعلوم الإنسانية والاجتماعية في الصفات العلاجية للطبخ كهواية، الباحثين لقوا إن عملية الطبخ بتشتغل على تحسين رفاهية الشخص وبترتبط بالرضا عن الحياة.وكمان اكتشفوا إن الطبخ كان أفضل مؤشر على السعادة الذاتية. وكان بالنسبة لبعض الناس، الوقت اللي بيقضوه في المطبخ عشان يطبخوا أو يخبزوا هو بالظبط الوقت اللي محتاجينه عشان يحسوا بالسعادة والفرحة.

المطبخ كمان بيوفر للشخص فرصة عشان يبدع ويتألق في الوصفات والنكهات المختلفة في الأكل، زي مثلا إن شخصين يبقوا بيعملوا نفس الطبخة، بس كل واحد منهم يعملها بطريقة مختلفة عن التاني، وبنكهة وطعم وشكل مختلف عن التاني. 

والدراسة كمان قالت إن الطبخ ممكن يساعد الناس اللي عندهم قلق أو توتر، وإن الطبخ ممكن يخفف من التوتر والقلق اللي عندهم، يزود يقظتهم الذهنية.

الطبخ وتحضير الأكل مش بس بيحسن الحالة المزاجية أو المود العام، أنت كمان لما بتخلص وبتشوف المنتج النهائي من تعبك ووقفتك في المطبخ، ده بيخليك تحس بالرضا وبيعزز شعورك بالسعادة. أنت حرفيا بتبقى صنعت حاجة ملموسة تستمع بيها وممكن تشاركها مع غيرك، فبتحس إنك عملت إنجاز تستاهله. المعالجة النفسية “آني جورتون” بتقول إن “الطبخ مهمة تتطلب مجموعة من المهارات المتعددة – الفهم والتخطيط والاهتمام بالتفاصيل واستخدام ذاكرتنا وخيالنا والبراعة اليدوية والإبداع والأسلوب”.

في تقرير لـ Wall Street Journal، بعض المعالجين النفسيين كانوا بينصحوا بدروس الطبخ كطريقة لعلاج الاكتئاب والقلق، وكمان لعلاج اضطرابات الأكل واضطراب فرط الحركة ونقص الانتباه. وقالوا إن الطبخ ممكن يساعد في “تهدئة التوتر وبناء احترام الذات وتقليل التفكير السلبي من خلال تركيز العقل على اتباع وصفة الأكلة”.

وحسب الجريدة، علماء النفس بيشوفوا إن الطبخ والخبز بيعتبروا علاج اسمه “التنشيط السلوكي”، وبيخففوا الاكتئاب عن طريق “زيادة السلوك الموجه نحو الهدف والتقليل من التسويف”، لأن الطبخ بيساعد الشخص إنه يركز على مهمة واحدة بس، وده بيديهم إحساس بالقوة والتحكم اللي ممكن يكونوا مابيحسوش بيهم في حياتهم اليومية بره المطبخ.

أنت لما بتطبخ، لازم تبقى مركز، وتحضر المكونات، وتقلب اللي بتطبخه، وتعدل التوابل وتظبطها، وتراقب الطبخة، وكل دي ممكن تكون طرق مفيدة عشان تبعد عقلك عن الحاجات السلبية اللي بتفكر فيها. صحيفة Guardian ذكرت إن الطبخ عامل زي التأمل، لكن مع إنتاج كمان، وممكن يكون مفيد جدا في علاج بعض أشكال الأمراض العقلية، وباختصار عملية الطبخ “مهدئة، واعية، إبداعية” وبتمنعك إنك تسحل دماغك وطاقتك في حاجات سلبية، وكل ده نتاجه وجبة لذيذة هتستمع وتتبسط بيها بعد ما تخلصها.

أنت لسه قاعد؟ قوم اطبخ حاجة بتحبها بسرعة مفيش وقت للتفسير!