ليه بنحس إننا بنقع وإحنا نايمين؟
كتبت/ ندى خالد
أوقات كتير وإحنا بنحاول ننام بنلاقي نفسنا فجأة جسمنا بيتهز كأننا وقعنا من على حاجة عالية وإحنا نايمين وبنصحى مخضوضين ومش فاهمين ده حصلنا ليه!
وبعد ما دورنا عرفنالكوا السبب وراء ظاهرة السقوط دي أو اللي بتتسمي بالـ Hypnagogic Jerk طبقا لموقع elconsolto.
الظاهرة اتسمت Hypnagogic لأنها بتعبر عن الفترة اللي بين مرحلة الصحيان والنوم واللي بيحصلنا فيها تشنجات فى العضلات بتخلينا نحس كأننا وقعنا من مكان عالي والحقيقة إن الظاهرة ليها تفسيرات كتيرة في دراسات بتقول إن الشعور ده طبيعي جدا وجزء من مرحلة النوم وبيحصل بسبب خلل فى الأعصاب ودراسات تانية بتقول إن التشنجات دي بتبقى عبارة عن حركات انعكاسية نتيجة لاسترخاء عضلاتنا وقت النوم والمخ بيفسر الاسترخاء ده علامة على إن الشخص النايم بيقع من مكان عالي وهنا المخ بيتدخل وبيعمل رد فعل بيخلي الجسم يتهز.
وفى دراسات بتشوف إن التشنجات دي ليها أسباب تانية ومنها:-
1- بتكون أوقات تلقائية و أوقات تانية بسبب عوامل خارجية زى الأصوات اللي حوالينا في المكان أو أي إزعاج خارجي فى البيت.
2- و بتحصل ساعات تانية بسبب التوتر والقلق أو إن الإنسان يكون بيمر بضغط عصبي أو نفسي.
3-أو أننا نكون بنشرب كافيين كتير ومابنامش كويس وكل ده بيزود من احتمالية إننا نحس بظاهرة السقوط.
4- المجهود الشديد اللي بنعمله طول اليوم أو لعب الرياضة قبل النوم ممكن يكون سبب فى الظاهرة دي.
واللي محتاج تعرفه إن فيه نسبة كبيرة من الناس بيحصلهم ظاهرة السقوط بس مش كلهم بيحسوا بيه وبيصحوا من النوم ومش كلهم بيقولوا.
فمن الاّخر كده ناموا وارتاحوا وماتقلقوش لأن الظاهرة دي طبيعية وبتحصل لناس كتير.
