7 أسباب هتخلينا نحضن بعض كتير

كتبت: ندى خالد

 

احنا بنحضن بعض فى المناسبات والأفراح والأعياد الرسمية أو لما بنقابل حد بقالنا كتير مشوفناهوش أو لما حد بيكون بيعيط وحزين بنحاول نحضنه وعلى رغم شعور الدفئ اللي بنحس بيه إلا أننا مش معتبرينه حاجة مهمة فى حياتنا وكمان فى ناس بتتريق على الناس اللي بتحضن بعض باستمرار وبتشوف إن دي حاجة غريبة وإن الحضن من غير سبب قلة أدب! مع إن الدراسات بتقول إن الأحضان بيتعدى شعورها مجرد الشعور بالحب والدفئ لا دي كمان بتحافظ على صحتنا النفسية وبتخلينا مبسوطين أكتر .

علشان كده جمعنالكوا فى المقالة دى فوائد الأحضان طبقا لموقع Healthline

الأحضان بتساعدنا نتواصل مع اللي حوالينا:

غالبا بنتواصل مع بعض يا بالكلام يا بتعبيرات وشنا لكن اللمس من الطرق المهمة جدا إننا نفهم بعض ونحس ببعض والعلماء لقوا إن ممكن شخص غريب يقدر يحس بمشاعر شخص تاني ميعرفوش من خلال لمسه .

الأحضان بتقلل التوتر :

لما  بنحضن حد بيمر بأزمة نفسية أو شيء مؤلم فى حياته العلماء بيقولوا إنه الحضن ده بيقلل من حدة التوتر وكمان بيقلل توتر الشخص اللي بيحضنه.

الأحضان بتحمينا من الأمراض:

الأحضان مش بس بتحمينا من التوتر لا كمان بتحمينا من الأمراض وبتحافظ على صحتنا

الباحثين لقوا إن الناس اللي عندها Support system كبير حواليها أقل عرضة للأمراض من اللي عندهم Support system قليل أو ماعندهمش خالص.

الأحضان بتساعدنا نقلل من مخاوفنا:

العلماء لقوا إن الأحضان بتقلل القلق خاصة عند الناس اللي عندها low self-esteem وبتخليهم يكتسبوا ثقة فى نفسهم ومايعزلوش نفسهم عن الناس وكمان لقوا إن مجرد لمس جماد زي الدبدوب اللي كنا متعلقين بيه واحنا صغيرين بيقلل من مخاوفنا وده بيفسر ليه الأطفال الصغيرة بتتعلق بلعبها وبتحضنها وهي نايمة.

الأحضان مهمة لصحة القلب:

الأحضان مفيدة لصحة القلب وفي إحدى الدراسات أتعملت على 200 شخص العلماء قسموهم لمجموعتين المجموعة الأولى لحسن حظها كان شركائهم رومانسيين وكانوا بيمسكوا أيديهم لمدة 10 دقايق و يحضنوهم بعدها لمدة 20 ثانية والمجموعة التانية كان معاهم شركائهم برضه بس فضلوا ساكتين الوقت كله والدراسات أثبتت إن المجموعة الأولى كان عندهم إنخفاض فى ضغط الدم وضربات القلب على عكس المجموعة التانية.

الأحضان بتخفف الآلام:

الأبحاث بتقول إن الأحضان ممكن تساعد فى تقليل الألم واكتشفوا ده لما جربوا على مجموعة من الأشخاص مصابين بمرض fibromyalgia عن طريق تجربة ست أنواع من العلاج باللمس عليهم والمرضى قالوا إنه خفف الألم وحياتهم بقت أحسن.

الأحضان بتخلينا سعداء أكتر:

لما بنحضن حد أو نلمسه أو حتى نقعد قريب منه جسمنا بيفرز مادة اسمها الأوكسيتوسين أو زى ما بيسميها العلماء أحيانًا “هرمون الدلال” والهرمون ده بيرتبط بالسعادة وتقليل التوتر وليه تأثير قوي على الستات بيقلل ضغط الدم وبيقلل هرمون الإجهاد وكمان الدراسات لقت إن الستات اللي عندها علاقات أفضل مع شريكها وبيحضنوا بعض باستمرار فوايد الهرمون أقوى وكمان لقوا أحاسيس حلوة لتأثير الأوكسيتوسين لما حضنوا أطفالهم الرضع.

مش بس الكبار اللي محتاجيين أحضان بالعكس الأطفال محتاجين الأحضان زينا و أكتر مننا كمان و اللي أثبتلنا ده تجربة عملها زمان فى جنوب إيطاليا الملك فريديريك التاني ومن كتر ما كانت تجربة مؤلمة سموها “التجربة المحرمة” والتجربة دى كانت قايمة على فكرة وهى إن الملك يجيب مجموعة من الأطفال يربيهم فى بيئة خالية من أى شخص بس المربيات هترضعهم وتغيرلهم ويسيبوهم لوحدهم وممنوع أى حد يتكلم قدامهم والعلماء بس هما اللي يراقبوهم علشان يعرفوا هيتواصلوا مع بعض ازاي وايه اللغة الأصلية اللي هيتكلموا بيها لو مسمعوش حد بيتكلم حواليهم بس المفاجأة إن الأطفال متكلموش ولا لغة لأنهم ماتوا كلهم لأنهم مخدوش احتياجاتهم الأساسية زي الرعاية واللمس و الحب اللي الإنسان محتاجهم علشان يعرف يعيش لأن الإنسان بطبعه كائن اجتماعي بيحب يتفاعل مع الناس اللي حواليه ويقرب منهم.

أخصائية العلاج الأسري Virginia satir بتقول إننا بنحتاج 4 أحضان يوميًا علشان نفضل عايشين وبنحتاج 8 أحضان يوميًا علشان تعيننا على الحياة  و12 حضن يوميًا للنمو وعلى الرغم من الأحضان دي تبان كتيرة بس لكن أحضان كتيرة أحسن من مفيش.. فاحضنوا بعض يا جماعة.

Related Articles

Back to top button