ليه بندور على علاقة في الشتاء؟

إنه فصل الشتاء.. الفصل الجميل اللي بيجمد الأطراف وبيطلب منك قعدة في البيت وتقعد تشغل فيلم وتكلفت نفسك ومعاك أكلك ومشروبك السخن الجميل، وبعد ما تعمل كل حاجة ينفع تتعمل.. تبدأ تحن للإكس أو تقول هو الواحد ليه مش مرتبط؟ ولما أكبر مين هيرعاني ومين هياخد باله مني والحاجات دي.. طيب ده بيحصل ليه؟

معهد بيكر لأبحاث القلب في أستراليا، عمل دراسة لقى فيها، مستويات هرمون السيروتونين “الهرمون اللي بينظم مزاجنا” بينخفض بسبب قلة التعرض للشمس، وده بيأثر على الإنسان اللي بيحسسه بالقلق والوحدة وده بالتالي بيخليه عايز يدخل في علاقة، والباحثين لقوا علاقة بين الشعور بالبرد والفٌرجة على الأفلام الرومانسية،

دكتورة هيلين فيشر، الباحثة في معهد كينزي بجامعة إنديانا في أمريكا، وعالمة الأنثروبولوجيا البيولوجية بتقول لموقع “bustle”، إن الموضوع بيتعلق بالهرمونات، يعني مثلا عند الرجال، هرمون التستوستيرون بيرتفع في نوفمبر، ومفيش تفسير للتغيرات اللي بتحصل للهرمون ده أو هرمون الأستروجين أو أي هرمونات تانية، ولكن الموضوع ممكن يكون له تأثير بسبب الضوء والظلام أو السخونة والبرودة واللي كل ده بيكون بسبب اختلاف بين الصيف والشتاء طبعا.

في 2015، أبلكيشن “Hinge” وده Dating App، عمل مسح على 1000 مستخدم للأبلكيشن، لقوا إن الرجالة اللي بيدوروا على علاقات في الشتاء زادوا بنسبة 15% أكتر من أي موسم تاني، وإن النساء كانت بتدور على علاقة أكتر بنسبة 5% من أي فصل تاني وتحديدا خلال الشتاء.

الطبيب النفسي تريستان كوبرسميث بيقول لموقع “Bustle”، إنه بسبب الضوء ودرجة الحرارة، بيحصل تغيرات في هرمونات المسؤولة عن الرغبة الجنسية، فا بيكون في حالة من الجوع حرفيا لممارسة الجنس خلال الوقت ده من العام.. حسب ما الموقع قال.

بس ده مش معناه إنك تفتح الواتساب وتبعتلها وحشتيني، اثبت على موقفك ومتبوظش الدنيا ولكن ممكن تقعد تفكر مع نفسك في العلاقة دي، إيه اللي كان حلو فيها وحش فيها، ليه أنت والشخص ده محصلش بينكم توافق؟ طب أنت محتاج إيه في المستقبل من الشخص اللي هتقابله؟ فكر في كل ده.