6 حاجات لازم تعملها لو حسيت إن حد بيراقبك وماشي وراك!

رجع انتشر الفترة اللي دي فيديو لشخص كان واقف يصور فيديو عادي وبنت جات تتكلم معاه وعملت نفسها عارفاه، لكن هو فهم إن فيه حد ماشي وراها وبيطاردها، وبعدها اتوجهت دعاوي للشباب إنهم لو لقوا واحدة راحت تتكلم معاهم وعاملة نفسها تعرفهم يبدأوا يخمنوا إنهم ممكن تبقى بتتعرض لخطر إن حد ماشي وراها أو بيطاردها.

لو اتعرضت لتجربة إن حد يبقى بيراقبك أو ماشي وراك فهي تجربة سخيفة ومخيفة فعلا، ولو ماتعرضتش لتجربة زي دي خلينا نقولك شوية خطوات تعملها لو حسيت بأي خطر وخوف إن حد بيراقبك حسب ما قال موقع “peoplesafe”:

1- خليك هادي وحاول تسيطر على خوفك:

لو كنت بتشك في شخص ما ماشي وراك على رجلك أو ماشي وراك بالعربية، فأول حاجة هتحس بيها هو الذعر والخوف وإنك بتحاول تهرب منه، وده في الحقيقة هيوصل الأمور لمرحلة أسوأ وهيعرضك لخطر أكبر، خصوصا لو كنت سايق عربية، فبدل من الخوف والذعر ده، اهدى وبطئ وخد نفس عميق وشوف الشخص اللي أنت بتشك فيه ده هيفضل ماشي وراك زي ما هو ولا هيتحرك عادي.

2- خليك على علم بالبيئة اللي حواليك:

وأنت في أي طريق عمومًا سواء سفر أو طريق شغل أو مواصلات خليك منتبه، لإن أغلبنا بيسرح وبيفضل يفكر أو بيبص في موبايله ومابيكونش منتبه بالكامل إيه اللي بيحصل حواليه، ومهم طبعا تحافظ على ذكائك في كل الأوقات، لإن بالطريقة دي لو حصل حاجة مش مرغوب فيها هتقدر تستجيب أسرع ومحدش هيقدر يفاجئك، ولو كنت سايق وحاسس إن حد ماشي وراك حاول تمشي في وسط العربيات والزحمة بلاش تمشي على جنب عشان يبقى صعب العربية تمشي وراك على طول.

3- امشي في طريق غلط:

امشي في طرق مختلفة عن عمد عشان تعرف لو ان لسه بيتابعك أو لا، وأحسن طريقة عشان تتأكد هي الطريقة الكلاسيكية بتاعت الأفلام والمسلسلات، هي إنك تاخد طريق غلط وتلف وترجع تاني خصوصا إن صعب شخص يمشي غلط مرة واحدة فتخيل تعمل كده مرتين وهو يعمل كده زيك المرتين؟ 

عشان كده لو ده حصل خد طريق تاني مليان ناس وشوف لو كان لسه وراك ولا لا، وأنسب حل وقتها هو إنك تطلب المساعدة.

4- روح مكان عام:

اتجنب إنك تروح البيت وخليك في مكان عام مليان ناس وبلاش تمشي من شوارع جانبية ولا حواري لإن لو الشخص عايز يضرك، صعب يأذيك في مكان عام أو مكان زحمة.. فممكن تدخل مطعم زحمة وتقول لشخص واثق فيه إنك شاكك إن حد بيراقبك، ويمكن بليل بيكون صعب تلاقي مكان آمان لكن ممكن تروح عند أي سوبر ماركت من اللي بيشتغلوا 24 ساعة، وساعات بيكون فيه رجال أمن على محلات مقفولة فممكن تروح تقوله.

5- بلاش تفضل تبص وراك كتير:

بالرغم إنك هتفضل تحاول تبص وراك عشان تشوف مين الشخص اللي وراك ده أو مين اللي بيراقبك، فمن الأفضل إنك تبطل تعمل كده، عشان لو كنت مركز على اللي بيحصل وراك فأنت برضه مش هتبقى عارف إيه ممكن يحصل من قدامك، ده غير إنك لما تفضل تبص وراك ممكن تضطر للمواجهة وأنت مش عارف إيه الخطر اللي مستنيك لو واجهت فالأفضل إنك تطلب مساعدة هي اللي تتعامل مع الشخص ده.

6- اطلب مساعدة: 

خلي موبايلك في ايدك واتصل بأي حد واثق فيه وقريب منك فهمه الموقف وابعتله “لوكيشن” عشان يتابعك ويتطمن عليك ويعرف آخر مكان وصلت له، ولو كنت تحت تهديد مباشر فكلم النجدة ولو كنت سايق عربية فأنت محتاج تأمن على الأبواب والشبابيك الأول وتدور على أي لجنة أو كمين وتطلب منهم مساعدة.