ليه فيه ناس بتحب الأكل الحار؟
يوم 16 يناير من كل سنة هو اليوم العالمي للأكل الحار.. وكل حد فينا يعرف على الأقل واحد في حياته بيعشق الشطة والأكل الحار أو السبايسي، لازم في كل شلة وانتو قاعدين بتاكلوا، حد بيطلب أكله سبايسي ولازم يبقى فيه شطة أو صوص حار أو قرن فلفل حراق جنب الأكل، والأكل ميبقاش سبايسي بحق وحقيقي غير لما وشه يحمر ويبدأ يعرق.
الأكل الحار بيسبب بعض الآلام والحرقان وحرارة الجسم بتعلى، طب ليه ممكن حد يكون بيستمتع بهذا الكم من المعاناة؟
فيه أسباب مقنعة جدا بتخلي ناس كتير بتحب نوعية الأكل التوكسيك دي، ومش بس حب، ده ساعات بتوصل لمراحل من إدمان الأكل الحار والشطة والفلفل الحراق.
طيب ليه فيه ناس بتحب الأكل الحار وبتقدر تستحمله وناس تانية مابتستحملش الفكرة نفسها؟
حسب موقع “EatThis”، الإجابة المختصرة هي إن ده بيرجع لجسم كل شخص وطاقته وإدراكاته الحسية المختلفة، ده غير إن أذواق الناس مختلفة، وخصوصا في الأكل، وبيدخل مع ده كمان عوامل تخص حساسية اللسان والنتوءات اللي فيه، ودرجة احتمال اللسان للحاجات الحراقة.
كل ده طبعا بالإضافة للجينات الخاصة بحاسة التذوق، وعوامل تانية تخص النشأة وطبيعة الأكل اللي انت متعود تاكله من وأنت صغير.. يعني مثلا شخص في الهند أكيد هيبقى متعود على التوابل الحارة والأكل السبايسي أكتر من حد مثلا في مصر.
ناس كتير بتحب الأكل الحار عشان فوايده الكتير. موقع “Melinda’s” و “Cookingenie” نشروا مجموعة من الفوايد دي:
التوابل الحارة اللي بتخلي الأكل سبايسي بتفرز مادة الإندورفين في الجسم، ودي المادة اللي بيطلق عليها “هرمون السعادة”، واللي بتدي للشخص إحساس بالسعادة، فتلاقي بعض الناس مودهم بيتغير وبيتبسطوا بمجرد ما ياكلوا أكل حار.
الأكل الحار بيعلي من معدل التمثيل الغذائي عندك، وبالتالي بيقلل شوية من الشهية، وأحيانا بيساعد على إنقاص الوزن.
الأكل الحار كمان بيقلل الالتهابات وممكن يساعد في محاربة الخلايا السرطانية، على سبيل المثال، الفلفل أحيانا بيكون مفيد للمرضى اللي بيعانوا من القرحة واضطراب المعدة وغازات المعدة والإسهال والتشنجات، وده عشان مادة الكابسيسين الكيميائية اللي بتشتغل كمضاد للتهيج في الجهاز الهضمي.
دراسات كتير قالت إن الأكل الحار كمان بيعزز صحة القلب وبيخفف الصداع النصفي وبيقلل الإحساس العام بالألم، وبتفرز كمان هرمون السيروتونين اللي بيساعد في تخفيف الاكتئاب والتوتر.
وطبعا، الناس اللي بتاكل أكل سبايسي كتير ممكن تحصلهم أعراض جانبية، زي الحموضة الشديدة، وظهور حب الشباب، وطبعا رحلة دخول الحمام بتكون رحلة عذاب.
وأخيرا، كل سنة واللي بيحبوا الأكل الحار طيبين!
