ليه قبل ما ننام بنتسحل في التفكير.. وإيه حل الـ Overthinking

أنت أخيرا روحت وبقيت على سريرك مستلقي في هدوء بعد يوم طويل وصعب، بيبقى إحساس حلو أوي.. بس اللي بيخش عليك ويبوظ الإحساس ده هو الـ “Overthinking” وتبدأ تجيلك أسئلة عشوائية في مخك.

طيب إيه الأسباب اللي بتخلي الشخص يـ Overthinking أصلا؟ هنقولك ليه وفي نفس الوقت إزاي تعرف لو أنت بتفكر كتير وكمان إزاي توقف ده لو بيسببلك إرهاق!

حسب موقع “pinkvilla” في 4 أسباب مشتركة بين الناس زي:

1- الماضي: 

الإنسان عارف كويس إنه مايقدرش يغير في الماضي لإنه عدى خلاص ولكن مع ذلك بيفضل يفكر فيه ويفكر لو كان أخد قرارات مختلفة للي كان بيعمله وطبعا مع إحساس بالندم على بعض القرارات.

2- الوظيفة: 

لما كورونا انتشرت في العالم، ده خلى الناس تفكر بشكل زيادة ويكون عندهم إحساس بالخوف من فقدان وظائفهم، وده كان من الأسباب المشتركة بين الناس للإفراط في التفكير.

3- عدم الثقة بالنفس:

 على سبيل المثال لو شخص في وقت من الأوقات فقد وظيفته، ده ممكن يخليه يفكر كتير ويحس إنه ماكنش كويس في الشغل ده أو في أي حاجة تانية وده بدوره بيخليه يفرط في التفكير وخصوصا في نفسه.

4- المستقبل:

التخطيط للمستقبل شيء كويس ومهم ولكن مش صحي إن الموضوع يوصل لمرحلة القلق المرضي، خلينا في النهاردة.

طيب إزاي تعرف إنك شخص بتفرط في التفكير؟ موقع Inc. بيقولنا على 10 حاجات لو بتعملها فا أنت كده هذا الشخص.

1- بتسترجع اللحظات المحرجة اللي مريت بيها بشكل متكرر.

2- بتسأل نفسك دايما أسئلة بتاعت “ماذا لو حصل كذا أو عملت كذا”.

3- بتفكر هل في معنى خفي في كلام أو أفعال الناس؟

4- بتعيد المحادثات اللي حصلت بينك وبين الناس بس في ذهنك وتقعد تقول كان نفسي أقول كده وياريتني ماقولتش كده.

5- مش بتبطل تفكير في أخطائك.

6- بتفكر كتير في الحاجات اللي مالكش سيطرة عليها أو مش هتعرف تتصرف فيها.

7- بتسرح جامد في أحداث الماضي أو اللي ممكن يحصل في المستقبل لدرجة إنك بتنعزل عن الحاضر.

8- مش بتعرف تنام من كتر التفكير.

9- لو حد قال حاجة او اتصرف بشكل مش بتحبه، بتفضل تعيده في مخك.

10- مش بتقدر تبطل تفكير عن مخاوفك.

بعد ما عرفنا الأسباب والعلامات، موقع Healthline بيقولنا على طرق عشان نوقف التفكير المفرط:

1- فكر في التفكير.. يعني إيه؟ يعني وقت ما تحس إنك هتبدأ تفكر في حاجة، سجل ده بيخليك حاسس بإيه، يعني حالتك المزاجية بتكون غاضب ولا متوتر ولا بتشعر بالذنب؟ يعني إيه مشاعرك اللي حسيت بيها من الأفكار دي، لما يبقى عندك وعي ده بيكون أول خطوة في التغيير لإن الشكل اللي بتستجيب بيه أو مشاعرك اللي بتحس بيها لما تفكر ممكن تخليك تفضل تلف في نفس الدايرة.

2- إتلهي: يعني شوف حاجة تلهيك عن التفكير المفرط، تقوم تعمل وصفة جديدة كان نفسك تعملها أو تتطوع مع جمعية خيرية،المهم إنك تكون في نشاط بتحبه ومبسوط بيه ومش شرط حاجات من اللي قولناها.. المهم تنبسط.

3- خد نفس: جملة ممكن تكون بتسمعها كتير بس عملية، في الوقت اللي هتحس فيه إن فقرة التفكير هتشتغل، غمض عينك وخد نفسك عميق.

4- التأمل: ممارسته مهمة جدا في عملية تصفية ذهنك من أي زحمة حاصلة فيه، ممكن تقرأ أكتر عن إزاي تعمل Meditation والموضوع مش هياخد من وقتك كتير سواء في السيرش أو التنفيذ.

5- بص من زاوية تانية: يعني بكل بساطة فكر هل المشاكل اللي بتفكر فيها دلوقتي لها أهمية؟ هتأثر عليك في المستقبل؟ ماتخليش المشاكل الصغيرة تتحول لحاجة ضخمة ومصيرية.

6- ركز على النجاحات: بص حتى لو كانت بسيطة ولكن لو حسيت إنك هتبدأ مرحلة التفكير اليومية، وقف تفكير وهات ورقة وقلم وممكن حتى على Notes الموبايل وسجل كل الحاجات اللي انبسطت إنك عملتها بشكل كويس خلال الأيام اللي فاتت، وزي ما قولنا مهما كانت بسيطة زي إنك حوشت مبلغ كويس، خلصت تاسك مهم أو كورس، نضفت مكتبك مثلا.. ومهما كانت حاجات صغيرة ولو حسيت إن الموضوع ده كان مفيد بالنسبالك إرجع للقائمة دي وسجل حاجات جديدة.

7- خد خطوة: في حاجات ممكن تكون بتفكر فيها بشكل مفرط عشان بتاخد لها أي خطوة، ولذلك وبكل بساطة فكر إزاي تأخد خطوة جدية في الموضوع اللي بتفكر فيه وأبدأ شوف خطوات عملية للتنفيذ.

8- اطلب المساعدة: شوف شخص مؤهل عشان يساعدك في الموضوع ده واللي هيكون طبيب نفسي.