قائمة بـ 15 لعبة بتخلي الـ”جيمرز” يشتموا.. Rainbow Six Siege و FIFA في المقدمة
كجيمر مخضرم أو قديم، هتبقى عارف إن الفيديو جيمز زي ما هي حاجة ممتعة ومسلية، ساعات بتخليك تخرج عن شعورك وتشتم.. خلينا نتفق على ده في البداية بس!
موقع “Buzz Bingo” عمل دراسة عن أكتر الألعاب اللي بتخلي اللاعبين يشتموا، عن طريق إنهم اتفرجوا 25 ساعة على فيديوهات البث المباشر في موقعين “Twitch” و “YouTube Gaming” بإجمالي 100 فيديو للألعاب الأكثر شهرة خلال شهر أغسطس الماضي.
فريق الموقع عمل قائمة بأهم 15 لعبة، وحسبوا متوسط عدد الشتائم كل 15 دقيقة وكل ساعة:
1- لعبة “Tom Clancy’s Rainbow Six Siege”:في المركز الأول بمعدل 146 في 15 دقيقة، و584 كل ساعة.
2- لعبة “FIFA 21”:بتيجي في المركز التاني بـ 138 في ربع ساعة، 552 في ساعة.
3- لعبة “Call of Duty: Warzone”: اتقال فيها 121 كلمة في 15 دقيقة و484 في الساعة
4- لعبة “Halo: The Master Chief Collection”:اللاعبين شتموا فيها بمعدل 109 كلمة في الربع ساعة، و436 خلال ساعة.
5- لعبة “GTA V” و “Counter Strike”:كان نصيبهم من الشتائم 107 كلمة خلال 15 دقيقة و428 في الساعة الواحدة.
6- “لعبة “Fortnite”:نصيبها في الدراسة بـ 102 كلمة في ربع ساعة و408 كلمة في ساعة.
7- “Apex Legends”:لاعبين لعبة الباتل رويال الشهيرة استخدموا 99 كلمة في 15 دقيقة و396 في الساعة.
8- وبالنسبة للعبة “Dark Souls 3” و “Chivalry 2”: كان معدل الشتائم في ربع ساعة ما بين 95 لـ 96 خلال ربع ساعة، ومن 384 لـ 380 كلمة خلال ساعة.
9- ولعبة “F1 2020” مع “Rocket League” في نفس المستوى، من 85 كلمة لـ 89 في ربع ساعة، ومن 356 لـ 340 خلال ساعة.
10- وآخر 3 ألعاب وهما “League of Legends” و “RE Village” و “Forza Horizon 4” بمعدل من 69 لـ 44 كلمة خلال ربع ساعة، ومن 276 لـ 176 كلمة خلال ساعة.
وإذا حسبناها من حيث جهازك المفضل في اللعب، فمستخدمين الـ”PC” هما أكتر ناس بيشتموا بمعدل 95 كلمة في الربع ساعة، و380 خلال ساعة
وفي المرتبة التانية Xbox اللي بيلعبوا بيه بيشتموا 92 مرة خلال 15 دقيقة و368 كلمة خلال ساعة
وفي النهاية، مستخدمين “PS” بمعدل 83 كلمة في ربع ساعة، و332 كلمة خلال ساعة.
