موضوع مايهمكش: معلومات ماتعرفهاش عن كريمة الخفق.. وإزاي ممكن تعملها في البيت!
سواء كنت بتحب التورتة أو الكيكة بالكريمة ولا بتحبها بالشوكولات الشوكولاتة فأنت أكيد لما بتعملوا كريمة في البيت لأي سبب مابتقدرش تمسك ايدك وبتفضل تاخد حبة منهم تاكلهم حاف.. يوم 5 يناير هو يوم كريمة الخفق ولإننا عارفين إن الكريمة دي حاجة مابتتقاومش وكلنا بنحبها فحبنا نعرفك على 5 حقايق ومعلومات ماتعرفهاش عن كريمة الخفق حسب ما قال موقع “food and wine” عشان كل ما تاكلها تفتكر المعلومات وتفتكرنا:
1- كريمة الخفق اختراع قديم:
الكريمة اختراع موجود من القرن الـ 16، وموجود في الوصفات اللي بيرجع تاريخها لسنة 1549 في إيطاليا و 1604 في فرنسا، واتسمت لأول مرة بكريمة الخفق في سنة 1673 وده وفقًأ لقاموس أكسفورد الإنجليزي.
2- كان ليها اسم تاني:
كان اسمه “milk snow” وفي الكتابات القديمة كان بيتقال عليه بالفرنساوي “neige de lait” وبالإيطالي ” neve di latte ” وكلهم نفس المعنى اللي هو “تلج الحليب”، أما الوصفة الإنجليزية “A Dyschefull of Snowe” اللي اتسجلت سنة 1545 هي نوع كريمة مختلف عن الكريمة المخفوقة وبيبقى فيها بياض بيض ومياه ورد.
3- طريقة خفقها اختلفت:
لحد القرن الـ 19 كان بيتم خفق الكريمة بفرع شجرة بدل المضرب، بس خفق الكريمة كان بياخد وقت حوالي ساعة عشان يتعمل حبة.
4- الحرارة ممكن تحوله زبدة:
كريمة الخفق بتتخفق في درجة حرارة أقل من 50 ولازم تكون ساقعة لإن أي حرارة زيادة بتخليه يتحول لزبدة.
5- أطول عروسة من كريمة الخفق:
الرقم القياسي العالمي لأطول عروسة اتعملت من الكريمة المخفوقة على كوباية “هوت شوكليت” كانت حوالي 71.4 بوصة، وحطمت “ميليسا أركين وكيسي ماكلولين” الرقم القياسي ده في سنة 2011
وبعد كل المعلومات الغريبة دي تعالي بقى نقولك طريقة عمل كريمة الخفق في البيت:
المقادير:
1- كوباية (250 مل) لبن كامل الدسم غير معلب
2- ربع كوباية (40 جم) سكر بودرة
3- معلقة صغيرة (5 جم) جيلاتين بودرة + ملعقة كبيرة (15 مل) ماء بارد
4- معلقة صغيرة (5 مل) فانيليا سائلة
طريقة التحضير:
1- هاتي طبق كبير ودوبي فيه الجيلاتين في المياه.
2- زودي اللبن واضربي المكونات بالمضرب اليدوي لحد ما يختلطوا كويس.
3- ضيفي السكر والفانيليا، وقلبي كويس.
4- حطي الخليط في الفريزر لمدة 15 دقيقة.
5- طلعي الخليط من الفريزير واضربيه بالمضرب الكهربائي لحد ما توصلي في اللأخر لقوام الكريمة المخفوقة.
