5 تطبيقات تسلي نفسك بيهم خصوصا في زحمة الطريق 

بمناسبة الـ “لونج ويك إند” هتلاقي دلوقتي كل الطرق زحمة جدا والطريق اللي بياخد نص ساعة ممكن ياخد معاك أكتر من ساعة، وللأسف ده مابيحصلش في الإجازات الطويلة بس ده بيحصل كل “ويك إند” وممكن فيه أيام كمان في نص الأسبوع بيبقى فيها زحمة غير مبررة.. وعشان عارفين قد إيه الزحمة دي بتضايقك سواء كنت سايق أو راكب أوبر أو تاكسي أو حتى مواصلات عادية فخلينا نحاول نساعدك شوية ونقولك على كام “أبلكيشن” ممكن تنزلهم على موبايلك تسلي بيهم نفسك في زحمة الطرق دي:

1- أبلكيشين “OpenTalk”:

زي ما كلنا عارفين إن الكلام يعتبر من أحسن الطرق عشان تخلي الوقت يعدي، والتطبيق ده من أهم مميزاته إنه بيخليك تتكلم مع أي حد، مش مع صحابك بس، “OpenTalk” بيخليك تقدر تتواصل مع أي شخص في العالم.

2- أبلكيشن “Paperama”:

التطبيق ده بقى لكل الناس اللي كانت بتحب تلعب الألعاب الأوريجامي وهما أطفال أو كبار عادي بس على الموبايل ومن غير أي ورق فتقدر تستخدمه في أي وقت وأي مكان، ده غير إن التطبيق بيخلي شكل الورق ثلاثي الأبعاد وفيه أكتر من 70 لغز وشكل تقدر تعملهم.

3- أبلكيشن “QuizUp”:

كلنا بنحب نلعب لعبة إننا نجاوب على أسئلة ومعلومات عشوائية حد بيسألهالنا ويطلع لها تفسير في الأخر حتى لو كان مش منطقي، عشان كده فيه ناس كتير بتحب التطبيق ده فلو زهقان أي وقت تقدر تنزله وتحافظ على مجتمع الناس التافهة واللي بيحبوا التفاهة دي.

4- أبلكيشن “Duo Lingo”:

أكيد قولت في يوم من الأيام إنك عايز تتعلم لغة جديدة أيا كانت إيه هي اللغة دي، فممكن تاخد الوقت الضايع ده فرصة في إنك تتعلم لغة جديدة ممكن تبدأ تتعلم لغة زي “الإسباني أو الفرنساوي أو الألماني وفيه كمان 20 لغة تانية على التطبيق ده، والتمارين المتنظمة والدروس على التطبيق هتساعدك تتعلم اللغة الجديدة وتبقى ضربت عصفورين بحجر واتعلمت حاجة جديدة واتسليت في نفس الوقت.

5- أبلكيشين “Bubble Wrap”:

أكيد لما بتجيب أي أوردر أونلاين وبيبقى ملفوف بالـ ” Bubble Wrap” بتمسكها تفضل تفرقع فيها ودي حاجة بتحسسك إنك أحسن وبتهدى أكتر وحتى لو مش متعصب بتحب تلعب بيها برضه، عشان كده التطبيق ده مناسب جدا للزحمة وبتقدر تفرقع الفقاقيع وتسمع صوتها وهي بتفرقع.