موضوع يجوعك: أفكار للساندويتشات في اللانش بوكس تنفع من سن 5 سنين لـ 57 سنة 

أغلبنا زمان ماكنش يعرف حاجة اسمها “لانش بوكس” هو كان أي حاجة في رغيف وبنحطهم في كيس بلاستيك في شنطة المدرسة، بعدين العالم اتطور بشكل مفاجئ وصحينا من النوم لقينا السندويتشات بقيت تتحط في علبة اسمها لانش بوكس.. التطور ده -حتى لو أنت ضده- فهو مفيد برضه لأسباب كتير منها إن الساندويتشات مابتتعجنش، وبدل ما كل حاجة تبقى في كيس لوحدها تقدر تحط أصناف كتير مع بعض في نفس العلبة بس لو جبت علبة متقسمة حلو.

ومن بعد تطور حوار اللانش بوكس ده بدأنا إحنا كمان ناخد معانا سندويتشات وأكل الشغل وبقى زي ما بنعمل للأطفال لانش بوكس بنعمل لنفسنا.. وعشان تدلع نفسك وتفك من ضغط الشغل فأنت محتاج تاكل أكل يبقى حلو فجمعنالك شوية سندوتشات تدلعك:

1- الوصفة الأولى ساندوتش “vietnamese sandwich”:

المقادير:

1- ليمون طازة 

2- سكر

3- ثوم مفروم 

3- فلفل حراق 

4- ملح 

5- صدور فراخ مخلية 

6- خل الأرز 

7- فجل

8- فلفل أحمر شرايح 

9- جزر حلقات 

10- عيش فينو 

11-مايونيز 

12- خيار حلقات 

13- كزبرة خضرا مفرومة 

14- مياه سخنة 

طريقة التحضير:

1- في الأول بنحضر الفراخ وده عن طريق إننا بنخلط الليمون مع السكر والثوم والفلفل الحراق والملح مع بعض وبنحط عليهم صدور الفراخ المخلية وبعدين بنحطهم في التلاجة لمدة ساعة على الأقل.

2- بعدين بنخلل الخضار والطريقة هي إننا نجيب المياه السخنة ونحط عليها السكر والخل والملح ونحط فيها الخضار اللي هو الفلفل الأحمر والجزر والفجل وبنحطهم في التلاجة نص ساعة على الأقل.

3- بنجيب بقى بعد كده الشواية ونحط عليها الفراخ لحد ما تستوي ولما تبرد شوية بنقطعها شرايح، وبنصفي الخضار المخلل من المياه.

4- وفي الآخر بنجيب الفينو نحط عليه مايونيز وننزل عليه بالفراخ وعليهم الخضار والكزبرة الخضرا وممكن نحط فلفل حراق كمان، ويتقطع ويتحط في اللانش بوكس.

2- الوصفة التانية ساندويتش “Mediterranean Grilled Cheese Sandwich”:

المقادير:

1- شريحتين توست أبيض 

2- معلقة كبيرة زيت زيتون

3- 2  فنجان جبنة موتزاريلا مبشورة 

4- فنجان جبنة فيتا مقطعة مكعبات

5- كوبايتين سبانخ طازة 

6- 4 شرايح طماطم 

7- معلقتين زيتون أسود 

8- معلقة كبيرة بصل أحمر مفروم ناعم 

9- معلقتين صغيرين ريحان طازة مفروم 

10- ربع معلقة صغيرة ثوم مفروم ناعم 

11- فلفل أسود مطحون

طريقة التحضير:

1- هنسخن زيت الزيتون في طاسة على النار وهنحط عليها الثوم المفروم والسبانخ ونقلبهم لحد ما السبانخ تدبل ونشيلها من على النار، وبعدين نحط الريحان.

2- نبدأ في الساندويتش بقى، بنحط الجبنة الموتزاريلا والجبنة الفيتا على شريحة توست واحدة بشكل متساوي، ونحط عليهم شرايح الطماطم وعليها السبانخ اللي لسه عاملينها ونضيف الزيتون الأسود والبصل الأحمر فوق الطماطم ونديها رشة فلفل أسود ونحط عليهم شريحة التوست التانية.

3- بعدين بندهن الساندويتش بمعلقة زيت زيتون من كل النواحي، ونحطه في طاسه ونسخنه على نار متوسطة لحد ما التوست يتحمص شوية ويبقى لونه دهبي وده هياخد حوالي 3 أو 4 دقايق، ونقلبه الناحية التانية دقيقتين أو 3 دقايق برضه ونرفعه من على النار ويتقطع ويتحط في اللانش بوكس للأطفال الصغار أو للأوز الكبار.

3- الوصفة التالتة ساندويتش “Chili Cheese Dog Grilled Cheese Recipe”:

المقادير:

1- شريحتين عيش 

2- 2 معلقة مايونيز 

3- تلت كوباية فلفل حراق 

4- قطعتين هوت دوج 

5- نص فنجان جبنة شيدر

6- هالبينو وبصل أخضر 

طريقة التحضير:

1- بنجيب التوست بنحط على كل قطعة توست معلقة كبيرة مايونيز ونوزع الفلفل الحراق وطبقة من الجبنة ونحط عليهم الهوت دوج، ولو فيه باقي من الجبنة والفلفل بنحط طبقة تانية وعليهم طبقة هالبينو وبصل أخضر ونغطية بشريحة التوست التانية. 

2- بنسخن طاسة ونحط فيها معلقة زبدة ونحط الساندويتش على النار لحد ما يبقى لونه دهبي اللي هو حوالي 4 دقايق، ونقلبه يتحمص من الناحية التانية ويتقطع نصين وعلى اللانش بوكس.

4- الوصفة الرابعة ساندويتش “turkey salad with cranberries and walnuts”:

المقادير:

1- كوبايتين تركي مدخن مقطع 

2- ربع كوباية توت بري مجفف أو طازة مقطع 

3- ربع كوباية عين جمل مفروم

4- كرفس مقطع مكعبات صغير 

5- معلقة كبيرة بقدونس طازة مفروم 

6- ربع كوباية مايونيز 

7- ملح وفلفل أسود حسب الرغبة 

طريقة التحضير:

هنقلب كل المكونات دي في طبق كبير وبنحطهم على شريحة توست ونقطع الساندويتش ونحطه في اللانش بوكس وبالهنا والشفا على قلبنا.