١٢ حاجة تعرف من خلالهم إن طفلك تعرض للتحرش الجنسي.. وإزاي تتصرف لو ده حصل

بعد انتشار فيديو المحاسب اللي تحرش بطفلة في حوش عمارة في المعادي وواحدة جارتهم هي اللي اكتشفت الواقعة بعد ما الكاميرا صورتهم، وحوادث تحرش بالأطفال تانية كانت من فترة انتشرت فيه تقارير بتقول إن تقريبا أكتر من ¾ الأطفال في العالم اتعرضوا للتحرش، وكتير منهم مابتكلموش عن التحرش اللي اتعرضوا له، ومن المحتمل كمان إن المتحرشين يكونوا أشخاص العيلة تعرفهم، لإن 8 من 10 أطفال يعرفوا المعتدي عليهم، وغالبا ما بيكون فرد من أفراد الأسرة أو الصحاب أو الجيران أو جليسات الأطفال، وكل ما كانت العلاقة بين المعتدي والضحية أقرب كل ما قل احتمالية الكلام عليها.

وغالبا الأطفال بدل ما بيقولوا إن فيه حاجة حصلت ضايقتهم بيبان عليهم بعض العلامات اللي بتقول إنهم اتعرضوا للتحرش الجنسي :

1- التصرف بطريقة غريبة وغير معتادة مع اللعب والأشياء

2- الكوابيس الكتير وقت النوم والتعرض لمشاكل في النوم 

3- يبقى عنده أسرار كتير وبيخبي حياته بشكل غير معتاد 

4- تغيرات مفاجئة في الشخصية، وتغيرات في المزاج بدون مبررات واضحة 

5- الرجوع لسلوكيات أصغر سنا، زي التبول اللإرادي 

6- الخوف الغير مبرر من أماكن أو أشخاص معينة والغضب الشديد 

7- تغير في العادات الغذائية 

8- كلمات لأجزاء من الجسم بلغة الأشخاص الكبار من غير مصدر واضح أو معروف 

9- الكلام عن أصدقاء جداد أو فلوس أو هدايا من غير أسباب 

10- إيذاء النفس عن طريق الحرق أو تعوير الجسم أو أي أنشطة ضارة 

11- العلامات الجسدية زي وجع أو كدمات في الجسم حوالين الفم أو أعضاءهم 

12- الهروب ورغبته في إنه يكون وحيد أو مايبقاش مع شخص أو طفل في مكان لوحدهم

لو ظهر على طفلك العلامات دي فإنت أكيد محتاج تتكلم معاه ومحتاج كمان تتصرف بطريقة حكيمة عشان تحتويه وتعرف تخليه يجتاز الموضوع في سلام وهو كمان يعدي بيه علي خير.. موقع “parents protect” قال في واحد من مقالاته إزاي الأب أو الأم مع ابنهم أو بنتهم لو اتعرضوا للتحرش أو العنف الجنسي:

1- تفاعل مع إلحاحه واعتني بيه:

لو كنت شايف إن ابنك بيحاول يقولك على موقف مؤذي له جنسياً فاتكلم معاه على طول بعناية واسمعه للأخر، أو اعرضه على دكتور نفسي متخصص للأطفال يقدر يتكلم معاه.

2- صدق ابنك:

لو ابنك كان واثق فيك بدرجة كبيرة عشان يحكيلك عن الأ ذى اللي اتعرض له، فلازم تبقى عارف كويس إنه صعب يكدب عليك في حاجة زي كده، وعلى الرغم من إنها هتبقى حاجة صعب تصدقها إن شخص إنت واثق فيه اعتدى على طفلك إلا إن بيبقى شئ مستبعد إن الطفل يألف حكاية زي كده عن السلوكيات الجنسية والتحرش.

وخليك عارف إن الطفل عشان يتكلم ده بيتطلب منه شجاعة كبيرة وبيبقى ضغط كبير عليه، فاللي ممكن يحصل العكس هو إن الطفل يقول إنه ماحصلوش اعتداء جنسي في حين إنه يبقى اتعرض له، وممكن يتغير طريقة شرح الطفل أو حكايته للقصة لكن ده أمر شائع فبلاش تتهمه بالكدب.

3- ادعمه:

مهم جدا إن طفلك يحس بالدعم فبلاش تقلل من كلامه أو ترفضه أو ماتهتمش بيه.

4- خليك هادي:

لو اتكلم معاك عن الاعتداء أو الحادثة اللي حصلت له حاول ماتغضبش أو تنزعج قدامه وخليك ثابت وهادي لإنك لو غضبت الطفل هيبقى معتقد إنك هتعاقبه وده هيصب في مصلحة المعتدي اللي بيبقى محذر الطفل أصلا من إنه يقول لحد، فمن الأفضل تحتفظ بمشاعرك لنفسك من غير ما يبان عليك عشان تحمي طفلك عاطفياً.

5- اهتم بالطفل:

خليك متأكد من إن الطفل عارف إنك بتحبه وإنه ماعملش أي حاجة غلط، واستمر في إنك تقوله ده لإنه هيحتاج يشوف إن الكبار بيصدقوه وبيعملوا اللي في وسعهم عشان يجموه، والطفل هيحس إنه واثق فيك أكتر وهيتبسط إنه اختارك عشان يتكلم معاك.

6- واجه المشكلة:

لما الأذي اللي حصل للطفل بيتعرف المفروض الكبار بيواجهوا المشكلة وبيحموا الطفل بأي ثمن ويتحملوا المسؤولية بشكل مناسب مع المعتدي ويواجهوه، وممكن يقدموا فيه بلاغ كمان.

7- اطلب المساعدة:

اتكلم مع متخصصين ودكاترة واعرف إزاي ممكن تخلي طفلك يتعافى من آلام الحادثة اللي حصلت له، واعرف إزاي ممكن تحمي طفلك أو أي طفل عندك بعد كده.

8- بلاش تيأس:

الأطفال ممكن يتعافوا من الاعتداء الجنسي ويقدروا يعيشوا حياتهم بعد كده بكل هدوء، وطرق التعافي والعلاج موجودة، وبلاش تسيب حق طفلك يضيع ولا تيأس من إنك تجيب لطفلك حقه.