محمد دياب: 90% من أدوار المصريين في “Moon Knight” بيمثلوها مصريين فعلا!
أكيد كلنا سمعنا عن إن محمد دياب المخرج المصري هو اللي بيخرج مسلسل Moon Knight اللي بينتمي لسلسلة مارفيل وسمعنا كمان عن موسيقى المسلسل التصويرية اللي شارك فيها هشام نزيه، وبعد انتشار مشهد الكريديت من الحلقة التانية من المسلسل اللي استخدم فيه محمد دياب أغنية الملوك لعناب ودبل زوكش وأحمد سعد لقينا إن فيه مواقع عالمية كتير اتكلمت عن المسلسل.
المواقع الأجنبية اللي اتكلمت عن المسلسل قالت إن دي المرة الأولي اللي مارفيل بتغامر فيها بالتاريخ المصري القديم وجزء كبير من الأحداث بيحصل في مصر، وعلاقة المسلسل بمصر مش بس بالأحداث كان فيه مجموعة كبيرة من أفضل المواهب المصرية موجودة بقيادة المخرج والمنتج التنفيذي للمسلسل محمد دياب وهو أول مخرج عربي مصري لمارفيل.
موقع “hollywood reporter” اتكلم عن محمد دياب وقال إنه مخرج مصري عايش دلوقتي ومقيم في لوس أنجلوس واتشهر بأعمال وكتابات ناجحة له في مصر زي فيلم الجزيرة، وإخراج أفلام درامية زي فيلم 678 .. وقال محمد دياب إن جزء كبير من تقديمه للمسلسل بيحاول يضمن فيه تصويره لمصر بصورة واقعية على الشاشة وبيحاول يتجنب الصورة النمطية والكليشيهات اللي بنشوفها كتير في الأفلام الأجنبية عن مصر.
وقال محمد دياب لموقع “hollywood reporter” إن جزء كبير من عرضه المسلسل هو تجنب النظرة الاستشراقية، اللي دايما بتجردنا من انسانيتنا، واللي دايما بيظهر فيها الستات مطيعات والرجالة أشرار ومش الناس بس اللي كان عايز يغير صورتهم التقليدية ده كمان المكان.
وقال محمد دياب إن كان شئ مؤلم إن معظم أفلام هوليوود اللي كان قصتها في مصر ماتصورتش هناك، وبيقول إنه من عدم الاحترام قلة الاهتمام بالتفاصيل، وعرض القاهرة إنها مدينة غامضة وغريبة بدل ما يتم إظهارها للعالم إنها مدينة صاخبة وفوضوية وعصرية زي ما هي في الحقيقة بالفعل، ده غير إن في بعض الأوقات بيتم تصوير مصر إنها مافيهاش حاجة غير الأهرامات في وسط صحرا بالرغم إن الأهرامات أصلا موجودة وسط المدينة، وشبه محمد دياب اللي بيحصل ده كأنك بتصور باريس وحاطط ساعة بيج بن في الخلفية.
وأضاف محمد دياب إن للأسف ماتصورش لقطة واحدة من مسلسل Moon Knight في مصر لأسباب مختلفة، وبدل من التصوير في مصر تم التصوير في استديوهات بودابست في المجر، وقال إنه استعان بعدد كبير من المبدعين المصريين للمساعدة في تنفيذ رؤيته.
وقال موقع “hollywood reporter” إن من أبرز الملحنين اللي شاركوا في الموسيقى التصويرية للمسلسل Moon Knight هو هشام نزيه ، واللي يعتبر أول عمل له مع استديوهات هوليوود وده بعد ما عمل موسيقي تصويرية لأكتر من 40 فيلم واللي كان من ضمنهم الفيل الأزرق لمروان حامد.
وقال هشام نزيه إنه اشتغل على الموسيقى بتاعت حفل نقل المومياوات اللي كان في أبريل سنة 2021 وكان عبارة عن احتفال ثقافي كبير تم نقل فيه 22 مومياء من المتحف المصري القديم اللي في ميدان التحرير للمتحف القومي للحضارة المصرية اللي اتبنى جديد.
وقال كمان هشام نزيه إنه كان حدث كبير جدا في شوارع القاهرة واتكلمت عنه أخبار كتير وبعد كذا يوم وصل لمدير أعماله إيميل من شركة مارفيل بيطلبوا فيه “ديمو”.
وقال محمد دياب في النهاية إن سبب ترشيحه لهشام نزيه هو إنه كان معجب بالطريقة اللي بيجمع بيا بين العناصر المصرية الأصيلة بطريقة معاصرة وده اللي عمله في Moon Knight، وقال إنه ابتكر مزيكا في الأول تبان إنها كلاسيكية وشرقية لكن بتتحول بسرعة لمزيكا أكتر حداثة.
وقال دياب عن نزيه كمان إنه مصري جدا وقدر يمزج الأغاني القديمة بالجديدة، عشان يأكد إن القاهرة مدينة معاصرة وكبيرة وهي المدينة اللي مابتنامش، بمزيكا خاصة بيه، وبشوية حاجات مشتركة مع الغرب ومن غير ما يلجأ للموسيقى التقليدية اللي بتبان كأنها من العصور الوسطى.
وغير هشام نزيه كمان فمحمد دياب جاب أحمد حافظ مونتير لحلقات المسلسل واشتغل على حلقتين من ضمن 6 حلقات وقال إن كان فيه تعاون بينه وبين حافظ قبل كده في فيلم اشتباك.
وقال محمد دياب إن تم بناء مبنين مصريين كاملين في بودابست، وكان بيواجه مشاكل كل يوم مع مصمم الأزياء ومصمم الإنتاج وإن الموضوع ماكنش سهل خصوصا لما الأمور كانت بتبقى متعلقة بأصغر التفاصيل اللي ممكن عدد قليل من الناس ياخد باله منها وإن التفاصيل الصغيرة دي ماتقلش أهمية عن شكل الأهرامات، وعلى سبيل المثال زي طريقة حجاب المرأة، يعني مثلا لو ربطتها بشكل تاني هتحس إنك في بلد تانية تمامًا.
وتم توظيف مساعدين مصريين وكلهم اشتغلوا شغل رائع وخلقوا الإحساس المصري، وقال دياب كمان وهو بيهزر إنه خلى مشرف المؤثرات البصرية في مسلسل Moon Knight ” ” شون فادن” يبقى بيجيله كوابيس إن الأمور دي مش زي مصر.
وماوقفتش مجهودات محمد دياب للشغل ورا الكاميرا بس، ده رشح الممثلة المصرية الفلسطينية بطلة مسلسل رامي “مي كالماوي” عشان تقوم بدور ليلى الفوالي ودي شخصية مهمة من ماضي سبيكتور، ورشح كمان الممثل المصري البريطاني خالد عبد الله، نجم The Kite Runner واللي ظهر كمان في الفيلم الوثائقي The Square المرشح لجائزة الأوسكار من Netflix، وظهر في The Crown اللي لعب دور صديق الأميرة ديانا Dodi Al Fayed .. وقال دياب إنه كان نفسه يشتغل مع خالد.
وماوقفش دور دياب عند الأدوار الرئيسية كمان، ده ركز مع الأشخاص اللي بيعملوا أدوار صغيرة على سبيل المثال سواق التاكسي اللي ماقالش غير جملة واحدة بس، فبيقول محمد دياب إن لو شوفت شخص مصري في المسلسل احتمال يبقى مصري فعلا لإن 90% من أدوار المصريين راحت لمصريين فعلا.
قال محمد دياب كمان إن من قبل ما المسلسل يتعرض على الشاشات وهو كان بيثبت نجاحه فعلا، وبيقول إن معظم الإضافات اللي حصلوا عليها كانت من مصريين عايشين في بودابست، ولما شافوا المسلسل كانوا بيقولوا قد إيه هو قريب للحقيقة فعلا.
وشكر محمد دياب مارفيل اللي قال إنها كانت داعمة بشكل كبير وإنهم بذلوا مجهود وموارد كتير عشان يساعدوه على إنه يبني مظهر أصلي ماحدش شافه في هوليوود قبل كده، وقال إن رئيس شركة مارفيل “كيفن فيجي” قاله إن فيه كتير من المبدعين المصريين اللي جابهم هيتم استخدامهم مرة تانية.
وقال كمان إن من المهم إننا ماننساش دور مارفيل الرئيسي لإنهم استعانوا بيه عشان يساعدهم في إنهم يبتكروا وقال إنه بيشوف إن مارفيل كانت محتاجة شئ من ذوقه، وحاجة من أرض الواقع ومختلف، وقال إنه مارفيل بتعيد اكتشاف نفسها وبيدوا فرصة لدم جديد.
وكمل وقال لو بقى فيه Moon Knight الموسم التاني فعنده خطط عشان يرفع مستويات الواقع بشكل أكبر وقال إنه حريص جدا على التصوير في مصر لإنه بغض النظر عن مدى جودة الشغل فمصر جميلة أكتر.
وقال إن الحصول على تصاريح لتصوير الموسم التاني دلوقتي واضح إنها مش سهلة لكن مع إطلاق Disney + في الشرق الأوسط في شهر يونيو اللي جاي ولما الناس تقدر تشوف Moon Knight ويعرفوا اللي بيتعرض على الشاشة اتمنى إن ده يساعد في تغيير الموقف.
